Take a fresh look at your lifestyle.

طرق عمل أنواع الحلويات الشرقية المختلفة

736

مقال مجمع لطرق عمل أنواع الحلويات الشرقية المختلفة انشروه وخلوه عندكم هينفعكم في أوقات كتير

البسبوسة

طريقة عمل البسبوسة الشرقي

طريقة عمل البسبوسة

المقادير :-

  • كوبين ونصف سميد (500 جرام)
  • نصف كوب سمنة
  • كوب سكر
  • كوب حليب أو زبادي أو لبن رايب
  • 2 معلقة كبيرة جوز الهند (اختياري) ولكن أنصحكم بيه
  • معلقتين كبار شربات تقيل أو عسل نحل أو عسل جلوكوز

طريقة التحضير :-

  1. نخلط الحليب مع الشربات أو العسل والسمنة والسكر ومعلقتين جوز الهند على نار هادية لحد التدفئة فقط ونرفعهم عن النار وننزل عليهم بالسميد ونقلبهم ونبسهم مع بعض كويس لحد ما المكونات تتجانس مع مراعاة عدم العجن .
  2. نجهز صينية مقاس 28 وندهنها سمنة وطحينة وبعدين نبل إيدينا ماء ونفرد فيها الخليط ونحددها بالسكينة ممكن نزينها بالبندق أو اللوز أو السوداني حسب الرغبة .
  3. ندخلها الفرن على درجه حرارة 180 درجه لمدة 20 دقيقة، ونسقيها اول ما تطلع من الفرن بشربات خفيف سخن .

ملحوظة مهمة :-

البسبوسة بتبوظ لما تتعجن وتتقلب جامد وتضغط بالفرد في الصينية يادوب تقلبي تقليبتين وتمزجي المكونات بس وتخبطي الصينية خبطتين على الرخامة عشان لو فيه هوا يخرج . 

الكنافة النابلسية 

طريقة عمل الكنافة النابلسية 

المقادير:-

  • 250 جرام كنافة
  • 250 جرام جبنة عكاوي او موتزاريللا
  • نصف كوب سمنة مذابة
  • معلقتين كبار سكر بودرة

طريقة التحضير :-

  1. اول حاجة لو هنعملها بالجبنة العكاوي لازم ننقع الجبنة ساعتين في مياة فاترة عشان ننزع منها الملح اللي فيها وبعدين نصفيها كويس .
  2. نفرم الكنافة في الكبة ونخليها زي البودرة أو نقطعها بايدينا قطع صغيرة جداً ونضيف عليها معلقتين السكر والسمنة ونقلبها كويس .
  3. نجهز صينية و ندهنها سمنة و ننزل بنصف كميه الكنافة و نضغط عليها و نساويها و نفرد فوقها الجبنة العكاوي او الموتزاريلا بالتساوي و نضيف باقي كمية الكنافه و نكبسها بإيدينا .
  4. ندخلها فرن مسخن على درجه حرارة متوسطة لمده ربع ساعة لحد ما الاطراف تحمر نشغل الشواية عليها خمس دقايق لحد ما لونها يبقا ذهبي .
  5. نسقيها وهي سخنة بشربات تقيل بارد و ممكن نزينها بالفستق أو المكسرات المفضلة حسب الرغبة .

صوابع زينب “بلح الشام”

زينب
طريقة عمل صوابع زينب “بلح الشام”

طريقة عمل صوابع زينب “بلح الشام”

المقادير :-

  • كوب ونصف دقيق
  • نصف كوب سميد
  • ربع كوب سمنة
  • معلقة كبيره سكر
  • نصف معلقة صغيرة خميرة
  • نصف كوب ماء دافي
  • ذرة ملح

طريقة التحضير :-

  1. نقلب المكونات الجافة مع بعض الدقيق و السميد والخميرة والسكر والملح وننزل عليهم بالسمنة ونخلطهم مع الدقيق لحد ما نحصل على خليط رملي وبعدين نضيف الماء ونعجن لحد ما تلم معانا ونسيب العجينة ترتاح لمدة ربع ساعة .
  2. وبعدين نبدأ نشكلها على بصامة الكحك أو مبشرة الجزر .
  3. ونقليها في زيت ساخن لحد ما لونها يبقا ذهبي ونسقيها شربات بارد .

رموش الست

طريقة عمل رموش الست

المقادير :-

  • نصف كوب سميد
  • كوب و ربع دقيق
  • نصف كوب زبدة
  • معلقتين كبار سكر مطحون
  • معلقتين كبار جوز هند ناعم
  • بيضة
  • نصف معلقة صغيرة فانيليا
  • نصف معلقة صغيرة بكينج باودر
  • معلقة كبيرة حليب

طريقة التحضير :-

  1. في طبق نحط الزبدة على السكر البودره ونضربهم كويس بمضرب يدوي لحد ما السكر يدوب خالص وبعدين نضيف البيضة والفانيليا ومعلقة الحليب ونضرب كويس لحد ما البيضه تختفي .
  2. في طبق تاني ننخل الدقيق ونضيف معاه السميد وجوز الهند والبيكينج البودر و بعدين نضيفهم على خليط الزبدة و السكر البودرة و نحرك لحد ما العجينة تبقا متماسكة .
  3. نحط الخليط بدون عجن في كيس نضيف و ندخله .

لينزا 

طريقة عمل لينزا 

طريقة عمل لينزا 

المقادير :-

  • كوب و نصف دقيق
  • كوب جوز الهند ناعم
  • كوب زبدة طرية بدرجة حراره الغرفة
  • كوب سكر بودرة
  • بيضتين
  • معلقة صغيرة فانيليا
  • معلقة صغيرة خل
  • رشة ملح
  • ربع معلقة صغيرة بكينج باودر
  • الحشو : مهلبية باردة

طريقة تحضير الحشو:-

  • في حلة نضيفه كوبين حليب معاهم 3 معالق كبار نشا و معلقة كبيره بودرة كريم شانتيه و نصف معلقة صغيرة فانيليا وندوبهم مع بعض على البارد .
  • نحطهم على النار مع التقليب المستمر لحد ما تتقل نرفعه من ع النار و نسيبها تبرد خالص .

طريقة التحضير :-

  1. نسخن الفرن على درجه حراره 180 وبعدين نضرب الزبدة مع السكر لحد ما السكر يختفي .
  2. نضيف بيضتين واحدة واحدة مع الخفق النستمر و نضيف الفانيليا و رشة الملح .
  3. نضيف الدقيق و جوز الهند و البيكينج باودر و نخلطهم كويس لحد ما نحصل على عجينة طرية تلزق في الإيد .
  4. نجهز صينية و ندهنها سمنة، وبإستعمال سباتولا (معلقة بلاستيك) نفرد طبقة مهلبية تقيلة ونوزعها على العجينة ونسيب مسافة 1 سم عند الحواف .
  5. نعبي العجينة الباقية في كيس تزيين ونقص جزء صغير من طرف الكيس ونعمل خطوط رفيعة وبعيد عن بعضها عشان بتنفش ف الفرن .
  6. ندخلها الفرن لمدة من 15 : 20 دقيقة لحد ما لونها يبقا دهبي نخرجها ونوزع عليها شربات خفيف سخن ونزينها بالكريز أو المكسرات حسب الرغبة .

جلاش بالكاسترد

طريقة عمل جلاش بالكاسترد

المقادير :-

  • لفة جلاش
  • معلقتين كبار بودرة كاسترد
  • معلقتين كبار سكر
  • كوب حليب
  • زبدة

طريقة التحضير :-

  1. نحط الكاسترد البودرة مع الحليب والسكر ونقلبهم على البارد لحد ما يدوب الكاسترد مع السكر خالص .
  2. نحط الحلة على نار هادية لحد ما القوام يتقل نرفعه من على النار ونسيبه يبرد شوية .
  3. نجهز صينية وندهنها زبده ونفرد نصف لفة الجلاش وندهن زبدة بين كل ورقه والتانية .
  4. نضيف طبقه كاسترد و نكمل بنصف كمية الجلاش وندهن زبدة برضه بين كل ورقة والتانية ونوزع زبدة سايحة على الوش .
  5. ندخله فرن سخن على درجة حرارة 180 لحد ما الوش يحمر ولونه يبقى ذهبي نخرجه ونسقيه شربات بارد ونغطيه لحد ما يبرد ونقطعه ونقدمه .

كنافة بالقشطة

بالقشطة
طريقة عمل الكنافة بالقشطة

طريقة عمل كنافة بالقشطة

المقادير :-

  • ربع كيلو كنافة
  • نصف كوب سمنة مذابة
  • معلقتين كبار سكر بودرة
  • الحشو:
  • كوبين حليب
  • 3 معالق كبار نشا
  • 2 معلقة كبيره بودرة كريم شانتيه
  • كوب قشطة
  • معلقة صغيرة فانيليا

طريقة تحضير الحشو:-

في حلة نضيف الحليب وندوب النشا والفانيليا وبودرة الكريم شانتيه على البارد ونحطهم على النار مع التقليب المستمر لحد ما تتقل نرفعه من على النار ونضيف القشطه ونقلب كويس ونسيبها تبرد شوية .

طريقة التحضير :-

  1. نقطع الكنافة قطع صغيرة ونضيف عليها السكر البودرة و السمنة .
  2. نجهز الصينيه و ندهنها سمنة و نفرد عليها نصف كمية الكنافة و نضغط عليها كويس و نفرد عليها طبقة من الحشو و نوزعها براحة و نسيب الاطراف فاضيه بدون حشو و بعدين نضيف كميه الكنافه الباقية ونضغط عليها براحه ونوزع سمنة على الوش .
  3. ندخلها فرن ساخن على درجه حراره 200 واول ما الاطراف تتحمر نفتح شواية الفرن لحد ما لونها يبقى دهبي نخرجها من الفرن ونسقيها شربات تقيل بارد وهي سخنة ونسيبها مكشوفة لحد ما تبرد شويه وبعدين نغطيها و نقدمها باردة .

البقلاوة 

طريقة عمل البقلاوة 

المقادير :-

  • لفة جلاش
  • كوب زبدة
  • 2 معلقة صغيرة قرفة المطحونة
  • كوب ماء الفاتر
  • كوب سكر
  • معلقة صغيرة فانيليا سائلة
  • نصف كوب عسل
  • نصف كيلو جرام من الفستق الحلبي أو الجوز أو اللوز (حسب الرغبة)

طريقة التحضير :-

  1. نخرج الزبدة من الثلاجة ونسيبها لمدة 15 دقيقة لحد ما تبقى كريمية عند استخدامها.
  2. ندهن صينية فرن مقاس 20×30 بالزبدة من جميع الجهات.
  3. نقطع المكسرات (الفستق الحلبي او الجوز او اللوز) قطع صغيرة وليست ناعمة عشان يظهر طعمها عند التذوق.
  4. نضع المكسرات المقطعة في طبق عميق، وتضاف إليها القرفة المطحونة، ونخلطهم كويس، ونسيبهم على جنب.
  5. نبدأ نحط رقائق الجلاش في الصينية: ندهن الطبقة الأولى بالزبدة وتضاف الطبقة الثانية وندهنها بالزبدة، ونكرر الخطوة لحد 8 طبقات من الرقائق.
  6. تضاف 3 معالق كبيرة من خليط المكسرات والقرفة فوق الرقائق المدهونة بالزبدة ويوزع الخليط بالصينية.
  7. تضاف طبقة من الرقائق فوق طبقة المكسرات وتدهن بالزبدة وتوضع طبقة أخرى من الرقائق وتدهن بالزبدة، وتوضع طبقة ثالثة من الرقائق وتدهن بالزبدة، وتكرر الطريقة إلى 8 طبقات من الرقائق.
  8. تضاف 3 ملاعق كبار من خليط المكسرات والقرفة، فوق الرقائق المدهونة بالزبدة.
  9. بإستخدام سكينة حادة تقطع رقائق البقلاوة مربعات شكلها مناسب زي الصورة كده.
  10. يسخن الفرن على درجة حرارة 180 درجة.
  11. ندخل الصينية الفرن لمدة 45-50 دقيقة لحد ما تستوي وتبقى ذهبية اللون ومقرمشة.
  12. نحضر الشربات (الشيرة) بوضع السكر والماء في حلة على نار متوسطة لحد ما يغلي يضاف العسل والفانيليا السائلة، ونسيبه لمدة 20 دقيقة.
  13. بعد ما نخرج البقلاوة من الفرن نصب فوقها الشربات (الشيرة) ونسيبها لحد ما تتشرب الشيرة ونقدمها.

أرز بالحليب 

بالحليب
طريقة عمل الأرز بالحليب “الأرز بلبن”

طريقة عمل أرز بالحليب 

المقادير :-

  • كيلو حليب
  • معلقة كبيرة حليب بودر (25 جرام)
  • معلقة كبيرة زبدة (25 جرام)
  • كوب أرز (200 جرام)
  • كوب إلا ربع سكر (175 جرام)
  • 3 معلقة كبيرة كريم شانتية بودر
  • قرفة بودر أو مكسرات للتزيين

طريقة التحضير :-

  1. في حلة على النار نغلى الحليب وننقع فيه الأرز لمدة 3 ساعات .
  2. في حلة على النار نحط الأرز والحليب والحليب البودر والزبدة ونقلبهم مع بعض كويس جداً بمضرب سلك مع التقليب المستمر لحد ما يبدأ يغلي نخفض عليه النار للنصف ونقلبهم مع بعض لحد ما الأرز يستوي في الحليب ونضيف السكر والكريم شانتيه والزبيب ونقلبهم مع بعض ( لازم نقلب الأرز فى الحليب لحد ما يتقل خالص)، وبعدين نغرفه في بولات أو كاسات ونزينه بالقرفة او الزبيب والمكسرات حسب الرغبة . 

أساور الست  

طريقة عمل أساور الست  

المقادير :-

  • لفة جلاش
  • كوب سمنه بلدي سايحه
  • نصف كوب فستق مفروم
  • نوتيلا
  • للسيرب:
  • كوبين سكر
  • كوب مايه
  • معلقة صغيرة عصير ليمون

طريقة التحضير :-

  1. نعمل السيرب بوضع مكوناته على النار لمده 7 دقايق ونحط عصير الليمون وتغلي غلوتين ونطفي ونسيبه يبرد
  2. نقسم الجلاش نصفين بالسكينه وناخد طبقة من الجلاش وندهنها بالسمنة ونطبقها علي شكل مربع وندهنها مره تانيه وبعدين نلفها علي مسن أو خشبة رفيعة زي القلم الرصاص وبعدين نخرجها ونلفها دايره علي بعضها.
  3. نرص الأساور جنب بعضها في صينيه فرن مدهونه زيت أو سمنة وبعدين ندهن الأساور بالسمنة وندخلها الفرن علي الرف الاوسط على درجة حرارة 180 لحد ما تاخد لون ذهبي ونخرجها ونسقيها بالسيرب البارد
  4. نحط في منتصف الأساور نوتيلا أو مكسرات مفرومة حسب الرغبة. 

الهريسة

الهريسة

طريقة عمل الهريسة

المقادير :-

  • 3 كوب سميد (600 جرام)
  • كوب الا ربع دقيق (175 جرام)
  • كوب وربع جوز هند ناعم (150 جرام)
  • نصف كوب سمنة (100 جرام)
  • كوب الا ربع حليب دافي (175 جرام)
  • ربع كوب عسل جلوكوز (50 جرام)

الحشو :-

  • كوب جوز هند مبشور (200 جرام)
  • كوب مكسرات (200 جرام)
  • كوب زبيب (200 جرام)
  • نصف كوب عسل جلوكوز (100 جرام)

طريقة التحضير :-

الحشو :-

في طبق نخلط جوز الهند والمكسرات والزبيب وعسل الجلوكوز ونقلبهم مع بعض .

الهريسة :-

  1. فى طبق نحط السميد والدقيق وجوز الهند والسمنة ونقلبهم مع بعض كويس .
  2. في حلة على النار ندفي الحليب وعسل الجلوكوز ونقلبهم مع بعض لحد ما العسل يدوب فى الحليب
  3. ونخلط خليط السميد مع خليط الحليب ونقلبهم لحد ما الخليط يتجانس كويس ويكون خليط رملى
  4. نجيب صينية وندهنها سمنة ونصب فيه نصف كمية العجينة ونفردها ونحط الحشو وبعدين صبي باقي كمية العجينه ونساويها ونقطعها
  5. ندخل الصينية الفرن على درجة حرارة 180 لمدة 25 دقيقه ولما تخرج وتبرد نصب عليها شربات تقيل دافي ونقدمها.

بلح الشام

طريقة عمل بلح الشام

المقادير :-

  • كوب دقيق
  • كوب ماء
  • معلقة كبيره زبدة
  • معلقة كبيره نشا
  • معلقة صغيرة فانيليا
  • 3 بيضات

طريقة التحضير :-

  1. نضيف الماء مع الزبدة على النار لحد ما يسخنوا
  2. نضيف الدقيق على النشا و نقلبهم كويس جداً بمعلقة خشب لمجة دقيقتين و بعدين نرفعه من ع النار و نسيبه يبرد لمده 10 دقايق.
  3. و بعدين نضيف البيض و الفانيليا واحدة واحدة مع الضرب لحد ما العجين يكون متجانس.
  4. نعبي العجين في كيس الحلواني ونشكل بلح الشام في زيت هادي على نار هادية لحد ما لونه يبقي ذهبي وبعدين نسقيه وهو سخن بشربات بارد.

كرات التمر المشكلة

التمر المشكلة
كرات التمر المشكلة

طريقة عمل كرات التمر المشكلة

المقادير :-

  • 500 جم عجوة
  • 3 معالق كبار زبدة مذابة
  • 2 كيس بسكوت مطحون
  • نصف معلقة صغيرة هيل مطحون
  • نصف معلقة صغيرة قرفة

للتغليف :-

  • ربع كوب بودرة كاكاو
  • ربع كوب سكر بودرة
  • ربع كوب جوز الهند
  • ربع كوب سمسم
  • طريقة التحضير :

طريقة التحضير :-

  1. في طبق كبير نحط العجوة و الزبدة المذابة و نقلبهم كويس و لو حسينا ان العجوة جافه بعد اضافة الزبدة نضيف معلقتين مياة سخنة و بعدين نضيف البسكوت المطحون و الهيل و القرفة
  2. نشكل الخليط على هيئه كرات صغيرة و نغلف كل واحدة منهم بمكون واحد من مكونات التغليف و هكذا لحد ما الكميه تخلص 

زنود الست 

طريقة عمل زنود الست 

المقادير :-

  • لقشطة:
  • 2 كوب حليب
  • صلث كوب نشا
  • 2 معلقة كبيرة سكر
  • معلقة كبيرة ماء زهر
  • علبة قشطة
  • الشربات
  • 2 كوب سكر
  • كوب ماء
  • معلقة صغيرة عصير ليمون
  • معلقة كبيرة ماء زهر
  • لفة جلاش 400 جرام
  • بياض البيض : حسب الحاجة (مخفوق)
  • ثلث كوب زيت لدهن العجينة
  • فستق حلبي مطحون : حسب الرغبة (للتزيين)
  • – كوب ونصف زيت (للتسوية)

طريقة التحضير :-

لتحضير القشطة :-

  1. حطي الحليب، النشا، السكر وماء الزهر في حلة على النار.
  2. قلبي المكونات كويس لحد ما تحصلي على مزيج متجانس.
  3. ارفعي الحلة عن النار، وسيبي المزيج على جنب لحد ما يبرد وبعدين ضيفي القشطة وقلبي لحد ما تتداخل مع المزيج .

لتحضير القطر:-

  1. سخني الماء والسكر في قدر على النار مع التحريك المستمر لحد ما السكر يدوب.
  2. ضيفي عصير الليمون وماء الزهر واول ما القطر يغلي ارفعيه عن النار وسيبيه يبرد.
  3. افردي قطعة من عجينة البقلاوة بطول 8 سم بشكل أفقي على سطح صلب وادهنيها بالقليل من الزيت.
  4. حطي عجينة ثانية مدهونة بالقليل من الزيت وبطول 24 سنم في الوسط بشكل عمودي على العجينة الأولى.
  5. حطي القليل من القشطة في وسط العجينة بعيد عن الأطراف.
  6. اثني الأطراف كويس ولفيها على شكل رول وإدهني الأطراف بالقليل من زلال البيض ورصيها في صينية فرن وادهنيها زيت على وشها.
  7. كرري العملية لحد إنتهاء الكمية.
  8. اخبزي زنود الست في فرن محمى مسبقاً على درجة حرارة 170 لمدة 25 دقيقة او لحد ما تتحمر.
  9. خرجي الصينية من الفرن وحطي زنود الست على مناديل ورقية تتشرب الزيت وبعدين غمسيها في الشربات البارد.
  10. وزعي حلى زنود الست في طبق، ورشي عليها فستق الحلبي المطحون وقدميها.

بودينج السميد 

السميد
بودينج السميد 

طريقة عمل بودينج السميد 

المقادير :-

  • 100 جرام زبدة
  • 2 كوب سميد ناعم
  • 2 كوب سكر
  • كوب ونصف ماء
  • جوز الهند : حسب الرغبة (للتزيين)
  • مكسرات : حسب الرغبة (للتزيين)

طريقة التحضير :-

  1. حطي الزبدة في حلة على النار، وذوبيها وضيفي السميد وقلبي وبعدين ضيفي السكر بالتدريج مع التقليب بين كل إضافة والتانية.
  2. صبي الماء وقلبي لحد ما يبدأ المزيج بالغليان والتماسك.
  3. صبي المزيج في أكواب التقديم، وزيني بجوز الهند والمكسرات بحسب الرغبة.

مهلبية الشوكولاتة

طريقة عمل مهلبية الشوكولاتة

المقادير :-

  • كوب حليب
  • نصف كوب سكر
  • 3 معلقة كبيرة نشا
  • 8 قطع شوكولاتة (داكنة وناعمة ومقطعة)

طريقة التحضير :-

  1. حطي الحليب في حلة وضيفي السكر والنشا ودوبيها فيه كويس مع التقليب المستمر.
  2. حطي الخليط على نار متوسطة الحرارة لحد ما يغلي ويبقى تقيل.
  3. ارفعي الخليط عن النار وضيفي الشوكولاتة وقلبي لحد ما تذوب وتختلط كويس.
  4. اغرفي المهلبية في كؤوس التقديم، وممكن تحطي طبقة بسكويت مطحون من تحت زي التيشز كيك وتصبي عليها المهلبية.
  5. خليها تبرد قبل ما تحطيها في الثلاجة، وعند التقديم ممكن تزيني الوجه بالكريمة المخفوقة حسب الرغبة.

حلاوة الجبن 

الجبن
حلاوة الجبن 

طريقة عمل حلاوة الجبن 

المقادير :-

  • ؤكوب ماء مغلي (200 مل)
  • نصف كوب سكر (100 جرام)
  • كوب دقيق سميد (200 جرام)
  • 2 كوب جبنه عكاوي أو موتزاريلا (400 جم)

القشطه :-

  • كوب قشطه بلدي (200 جرام)
  • نصف معلقة ماء ورد (10جرام)
  • نصف معلقة ماء زهر (10جم)
  • فستق مطحون للتزيين
  • شربات تقيل بارد

طريقة التحضير :-

  1. أول حاجة لو هنعملها بالجبنة العكاوي لازم ننقع الجبنة ساعتين في مياة فاترة عشان ننزع منها الملح اللي فيها وبعدين نصفيها كويس.
  2. في حلة على النار نحط الماء المغلي وندوب فيه السكر ونضيف سميد بسبوسه ونقلبهم مع بعض لحد ما تتجمع فى مكان واحد وبعدين نضيف الجبنة ونقلبهم لحد ما الجبنة تسيح ونرفعها من على النار ونسيبها لحد ما تبرد خالص.
  3. على الرخامه نفرد كيس بلاستيك ونحط الخليط ونحط كيس من فوق ونفردها بالنشابة بسمك ربع سم ونحشيها بالقشطه ونضيف عليها ماء الورد وماء الزهر ونلفها رول ونقطعها شرائح ونرش عليها فسدق ونسقيها شربات تقيل بارد ونقدمها.

المبشورة 

طريقة عمل المبشورة 

المقادير :-

  • 4 بيضات
  • ربع معلقة صغيرة خل
  • نصف معلقة صغيرة فانيليا
  • 2 كوب سكر
  • كوب زبدة
  • 3 كوب دقيق عليهم 3 معلقة صغيرة بيكنج بودر
  • مربى مشمش أو أي طعم تحبوه بحسب الحاجة

طريقة التحضير :-

  1. أخفقي الزبدة مع السكر لحد ما تحصلي على مزيج كريمي.
  2. ضيفي البيض والخل والفانيليا واخفقي تاني وبعدين ضيفي البيكنج بودر والدقيق تدريجياً مع الخفق كويس لحد ما تحصلي على عجينة متماسكة.
  3. قسمي العجينة لقسمين وافردي القسم الأول في صينية مدهونة بالقليل من الزبدة ومرشوشة بالدقيق.
  4. إدهني الوجه بالمربى وابشري القسم الثاني من العجينة على الوجه.
  5. دخلي الصينية فرن محمى مسبقاً على حرارة متوسطة لحد ما تستوي والوش يحمر وياخد لون ذهبي.

كنافة مبرومة بالقشطة 

مبرومة بالقشطة
كنافة مبرومة بالقشطة 

طريقة عمل كنافة مبرومة بالقشطة 

المقادير :-

  • باكيت عجينة كنافة
  • 2 كوب زبدة
  • 2 كوب قشطة أو عبوة جبنة كريمي
  • 2 كوب شربات
  • فستق حلبي : حسب الرغبة (للتزيين)

طريقة التحضير :-

  1. قصي شعيرات الكنافة لنصفين، وحطي قليل من الشعيرات في طبق جنب بعضها، وحطي قطعة الجبنة على الطرف ولفيها أو احشيها بملعقة صغيرة من القشطة وبعدين رصي القطع جنب بعضها في صينية مدهونة بالقليل من الزبدة أو السمنة.
  2. دخليها الفرن على درجة حرارة 180 لمدة 10 دقايق أو لحد ما تتحمر وبعدين صبي عليها الشربات البارد وزينيها بالفستق. 

الشعيرية بالحليب 

طريقة عمل الشعيرية بالحليب 

المقادير :-

  • شعيرية
  • حليب
  • ماء
  • سكر
  • زبدة

طريقة التحضير :-

  • في حلة على النار قلبي الشعيرية فى الزبدة لحد ما تتحمر وبعدين ضيفى الماء لحد ما تتشرب الشعيرية وبعدين ضيفى الحليب وضيفي السكر الرغبة وبعدين أغرفيها فى أطباق التقديم وضيفي عليها قشطة أو زينيها بالزبيب وجوز الهند حسب الرغبة وقدميها. 

أرز بالحليب في الفرن 

بالحليب في الفرن
أرز بالحليب في الفرن 

طريقة عمل أرز بالحليب في الفرن 

المقادير :-

  • لتر حليب طازج
  • كوب إلا ربع رز أبيض مغسول
  • كوب إلا ربع ماء
  • 6 معلقة كبيرة سكر
  • 3 معلقة كبيرة كريم شانتية بودر

طريقة التحضير :-

  1. حطي الحليب على النار لحد ما يغلى وبعدين ضيفي الأرز المغسول.
  2. نسيبهم على النار يغلوا وخلال الغليان ابدأي فى إضافة الماء والسكر مع التقليب وبعدين ضيفي الكريم شانتيه.
  3. هدي النار على الخليط وسيبي الأرز يستوي على نار هادية خالص لمدة نصف ساعة ونقلب من فترة للثانية.
  4. أغرفي الأرز بالحليب فى القوالب الفخار.
  5. وبعدين دخليه الفرن لمدة 10 دقايق لحد ما وشه يتحمر ويبقى لونه ذهبي وقدميه سخن أو بارد حسب الرغبة.
  6. يمكن تقديمه بدون ما تدخليه الفرن بعد تزيينه بالطريقة اللي تحبيها.

كيكة البسبوسة 

طريقة عمل كيكة البسبوسة 

المقادير :-

  • 2 كوب دقيق منخول
  • كوب سميد خشن
  • كوب زبادي
  • كوب سكر
  • كوب زيت نباتي
  • معلقة كبيرة خل
  • 4 بيضات
  • معلقة كبيرة فانيليا
  • معلقة كبيرة بيكنج بودر
  • ربع معلقة صغيرة ملح
  • 2 كوب شربات (قطر أو شيرة)
  • فستق حلبي مفروم للتزيين

طريقة التحضير :-

  1. اخفقي البيض مع السكر والفانيليا وضيفي الخل وقلبي.
  2. ضيفي الزيت واخفقي وبعدين ضيفي الزبادي والسميد والدقيق والملح والبيكنج باودر واخلطي المكونات كويس لحد ما تحصلي على خليط ناعم ومتجانس.
  3. ادهني صينية بالقليل من الطحينة وصبي المزيج فيها ودخليها الفرن على درجة حرارة 180 درجة لمدة 45 دقيقة لحد ما تستوي.
  4. خرجيها من الفرن وسيبيها تبرد شوية، وبعدين وزعي الشربات فوقها وزينيها بالفستق الحلبي وقطعيها وقدميها. 

وربات القشطة 

القشطة
وربات القشطة 

طريقة عمل وربات القشطة 

المقادير :-

  • 5 معلقة كبيرة نشا
  • كوب قشطة
  • 4 كوب حليب
  • معلقة كبيرة ماء زهر
  • ثلث كوب سكر
  • باكيت عجينة جلاش
  • كوب زبدة
  • كوب شربات (قطر أو شيرة)

طريقة التحضير :-

  1. في حلة حطي الحليب والنشا والسكر ودبيهم مع بعض وبعدين حطيهم على النار مع التقليب المستمر لحد ما الخليط يتقل وبعدين ضيفي القشطة وماء الزهر مع التقليب المستمر وبعدين ارفعيها عن النار وسيبيها لحد ما تبرد خالص.
  2. افردي طبقات الجلاش وادهني كل طبقة بالزبدة لحد ما تخلصي كل طبقات الجلاش، وبعدين قطعيها على شكل مربعات متساوية.
  3. حطي كمية معلقة من القشطة واثني طرف المربع وشكليها على شكل مثلث.
  4. حطيها في صينية مدهونة زبدة وبعدين ادهني الجلاش مرة كمان بالزبدة ودخليها الفرن على درجة حرارة 180 من فوق وتحت لحد ما تتحمر.
  5. صبي الشربات على وربات القشطة وزينيها بالفستق الحلبي.

لقمة القاضي 

طريقة عمل لقمة القاضي 

المقادير :-

  • كوبين دقيق
  • معلقة صغيرة نشا
  • معلقة صغيرة خميرة فورية
  • معلقة كبيره حليب بودرة
  • رشة ملح
  • رشة فانيليا
  • كوبين ماء دافي

طريقة التحضير :-

  1. نخلط الدقيق مع النشا والخميرة والحليب البودرة والملح والفانيليا ونضيف الماء الدافي بالتدريج
  2. ونقلب لحد ما العجينة تبقى طرية ولينة.
  3. نغطي الطبق لمدة نصف ساعة لحد ما العجينة تخمر ويتضاعف حجمها.
  4. نبل معلقة صغيرة بالزيت ونشكل بيها لقمة القاضي ونقليها في زيت على نار متوسطة لحد ما تحمر وتبقى ذهبيه اللون نخرجها ونسقيها بشربات تقيل بارد أو نرشها بسكر بودرة حسب الرغبة.

كنافة بالنوتيلا 

بالنوتيلا
كنافة بالنوتيلا 

طريقة عمل كنافة بالنوتيلا 

المقادير :-

  • ربع كيلو كنافه
  • نصف كوب سمنة او زبدة
  • معلقتين كبار سكر بودرة
  • عبوة نوتيلا

طريقة التحضير :-

  1. نفتت الكنافة ة نضيف عليها السمنة او الزبدة و السكر البودره و نخلطهم مع بعض كويس جدا
  2. نجهز صينية و نضيف نصف كميه الكنافة و نضغط عليها و نساويها و نوزع فوقها طبقه نوتيلا و نضيف باقي كمية الكنافه و نساويها كويس
  3. ندخلها فرن مسخن مسبقاً على درجه حرارة 200 لحد ما لونها يبقا ذهبي نخرجها و نسيبها تبرد و نزينها بالنوتيلا.

أرز معمر حلو 

طريقة عمل أرز معمر حلو 

المقادير :-

  • معلقتين سمنة
  • كوب أرز
  • كيلو حليب
  • معلقتين زبدة
  • باكو فانيليا
  • كوب إلا ربع سكر
  • معلقتين قشطه
  • معلقتين سمنة

طريقة التحضير :-

  1. في طبق نخلط الأرز والسمنة ونقلبهم مع بعض كويس لحد ما الأرز يتشرب السمنة ونضيف عليه الحليب ونسيبه منقوع لمدة 2 : 3 ساعة.
  2. في حلة على النار نحط خليط الأزر ونقلبه من وقت للتاني لحد ما الأرز يستوى ونضيف السكر والفانيليا والقشطه ونقلبهم مع بعض لحد ما ياخد غلوة، ونجيب بايركس أو طاجن فخار ونصب فيه خليط الارز والحليب ونضيف عليه سمنة.
  3. ندخل البايركس أو الطاجن الفرن تحت الشوايه ياخد لون وبعدين نطلعه ونقدمه. 

‫أم علي‬ 

علي‬
‫أم علي‬ 

طريقة عمل ‫أم علي‬ 

المقادير :-

  • ‫5 ورقات عجينة ميل فاي (بف باستري)‬
  • ‫5 كوب حليب‬
  • ‫معلقتين كبار زبدة‬
  • ‫3 معالق كبار دوبل كريم‬
  • ربع كوب بندق‬
  • ربع كوب زبيب‬
  • ‫ربع كوب لوز‬
  • ‫كوب سكر‬

طريقة التحضير :-

  • حمي الفرن على درجة حرارة متوسطة.‬
  • ‫في طاجن كبير حطي ورقات عجينة الميلفاي ودخليها الفرن لحد ما تتحول للون الذهبي.‬
  • ‫إغلي الحليب على النار وضيفى السكر وقلبي لحد ما السكر يذوب.‬
  • ‫ضيفي اللوز والبندق والزبيب والحليب بالسكر على الميلفاي.‬
  • ‫دخلي الطاجن الفرن لمدة ربع ساعة لحد ما العجينة تنفش وتتشرب الحليب.‬
  • ‫خرجي الطاجن وضيفي عليه الزبدة والقشطة ورجعيه الفرن تاني لمدة ربع ساعة كمان ويمكن تشغيل الشواية فى آخر دقيقتين عشان تحصلي على لون ذهبى للوجه.‬ 

العزيزية 

طريقة عمل العزيزية 

المقادير :-

  • لتر حليب
  • كوب سكر (200 جرام)
  • ربع معلقة فانيليا (5 جرام)
  • معلقة كبيرة كريم شانتية بودر
  • نصف كيس مكرونة سباجيتي (200 جرام)
  • 2 صفار بيض
  • فانيليا
  • معلقة كبيرة نشا (25 جم)
  • 2 معلقة كبيرة ماء (50 مل)
  • سكر بودر

طريقة التحضير :-

  • في حلة على النار نحط الحليب يغلي ونضيف مكرونه ونضيف الفانيليا والسكر ورشة ملح بسيطة ومعلقة كبيرة كريم شانتيه بودر ونقلبهم مع بعض كويس
  • وبعدين ندوب النشا فى الماء ونضيفهم على الخليط ونضربهم في الخلاط او بالهندبلندر لحد ما يكون ناعم خالص ونرجعه على النار تانى ونسيبه يغلي وبعدين نرفعه عن النار
  • نجيب طبق ونخلط صفار البيض والفانيليا ونضيفه على الخليط السابق ونقلبهم مع بعض لحد الحصول على القوام المطلوب
  • نجهز طبق بايركس وندهنه زبدة او سمنة ونصب فيه العزيزيه ونرش عليها سكر بودر وندخل البايركس الفرن على درجة حرارة 180 لمدة 25 دقيقة. 

مهلبية المانجو 

المانجو
مهلبية المانجو 

طريقة عمل مهلبية المانجو 

المقادير :-

  • كوب ونصف عصير مانجو (300 مل)
  • كوب ونصف حليب (300 مل)
  • كوب سكر (200 جرام)
  • رشة فانيليا
  • 3 معلقة كبيرة نشا (75 جم)
  • نصف كوب عصير مانجو (100 جم)
  • نصف كوب مانجو مكعبات (100 جم)

طريقة التحضير :-

  • في حلة على النار نحط عصير المانجو والحليب ونضيف السكر والفانيليا ونقلبهم مع بعض لحد ما يغلوا وبعدين ندوب النشا في نصف كوب عصير مانجو ونضيفهم على الخليط ونقلبهم مع بعض لحد ما يتقل ونضيف مكعبات المانجو ونقلبهم مع بعض ولما يغلي نرفعه من على النار ونجيب بولات ونصب فيها المهلبية ونزينها بمكعبات المانجو ونقدمها.

البسبوسة الطرية 

طريقة عمل البسبوسة الطرية 

المقادير :-

  • 2 كوب سميد (350 جرام)
  • نصف كوب سكر (100 جرام)
  • 2 معلقة كبيرة عسل أبيض
  • كوب زبادي أو لبن رايب (200 جرام)
  • كوب سمنة بلدي (100 جرام)
  • معلقة صغيرة بيكنج بودر

طريقة التحضير :-

  1. اخلطي السمنة مع السميد وبسيها بأطراف الاصابع، مع مراعاة عدم العجن فيها.
  2. ضيفي السكر والعسل والزبادي والبيكنج بودر وقلبي لحد ما تتجانس المكونات فقط.
  3. صبي الخليط في صينية مقاس 28 أو 30 مدهونة بالسمنة أو الطحينة، ودخليها الفرن أول 5 دقايق على درجة 200 وبعدها خفضي درجة الحرارة على 180 لمدة 20 دقيقة أو لحد ما تاخد لون الذهبي.
  4. خرجيها واسقيها بالشربات الساخن وغطيها لحد ما تبرد لحد ما تبرد خالص وزينيها بالقشطة والفستق المجروش حسب الرغبة.

ملحوظة هامة :-

البسبوسة بتبوظ لما تتعجن وتتقلب جامد وتضغط بالفرد في الصينية يادوب تقلبي تقليبتين وتمزجي المكونات بس وتخبطي الصينية خبطتين على الرخامة عشان لو فيه هوا يخرج .

كيك الرواني 

الرواني
كيك الرواني 

طريقة عمل كيك الرواني 

المقادير :-

  • 5 بيضات
  • كوب سكر (200 جرام)
  • ربع معلقة صغيرة فانيليا (5 جرام)
  • كوب الا ربع دقيق ابيض (175 جرام)
  • كوب الاربع دقيق سميولينا (175 جرام)
  • نصف معلقة صغيرة ملح (5 جرام)
  • الشربات
  • كوب ونصف سكر (300 جرام)
  • كوب ونصف ماء (300 مل)
  • نصف معلقة عصير ليمون (10 مل)
  • نصف كوب جوز هند (100 جرام)

طريقة التحضير :-

  1. فى حلة ندوب السكر فى الماء ونرفعه على النار ونسيبه يغلى لمدة ربع ساعة ونضيف عصير ليمون لحد ما يغلي ونرفعه عن النار ونسيبه يبرد شويه
  2. نخفق البيض والسكر والفانيليا مع بعض لحد ما الخليط يتجانس.
  3. في طبق نخلط الدقيق الأبيض ودقيق السمولينا والملح ونقلبهم مع بعض ونضيفهم على خليط البيض ونخفقهم مع بعض لحد ما الخليط يتجانس
  4. نجيب صينية وندهنها سمنة ونبطنها سميد ونصب فيها الروانى وندخلها الفرن على درجة حرارة 180 لمدة 25 دقيقة واول ما تخرج من الفرن نصب عليها شربات ونزينها بجوز الهند ونسيبها تبرد ونقطعها ونقدمها.

قدرة قادر 

طريقة عمل قدرة قادر 

المقادير :-

الكيك :-

  • 3 بيضات
  • 200 جرام سكر (كوب)
  • باكو فانيليا
  • 200 جرام دقيق (كوب)
  • 25 جرام كاكاو(معلقة كبيرة)
  • 10 جرام بيكنج بودر (نصف معلقة صغيرة)
  • 100 مل زيت (نصف كوب)
  • 100 مل ماء دافي (نصف كوب)

الكريم :-

  • 4 صفار بيض
  • 4 بيض كامل
  • 150 جرام سكر (كوب )
  • باكو فانيليا
  • رشه ملح
  • لتر حليب

الكراميل :-

  • 250 جرام سكر (كوب)
  • 25 مل ماء (معلقة كبيرة)

طريقة التحضير :-

الكراميل :-

  • في حلة ندوب السكر في الماء ونرفعه على النار ونسيبه يعمل كراميل غامق ونصبه فى قالب الكيك ونسيبه لحد ما يبرد خالص .

الكريم :-

  • في حلة على النار نغلي الحليب ونجيب طبق ونخلط السكر والبيض وصفار البيض وكبشة أو مغرفة من الحليب ونقلبهم مع بعض لحد ما الخليط يتجانس ونصبه على الحليب حبه حبه ونقلبهم مع بعض لحد ما الخليط يتجانس ونرفعه من على النار ونصبه على الكراميل .

الكيك :-

  • في طبق نحط البيض والفانيليا والسكر ونخفقهم مع بعض كويس لحد ما السكر يدوب خالص ونضيف الماء والزيت ونخفقهم مع بعض كويس.
  • وفي طبق تاني نخلط الدقيق والكاكاو والبيكنج بورد ونقلبهم مع بعض ونضيفهم على الخليط السابق ونخفقهم مع بعض لحد ما الخليط يتجانس ونصبه على الكريم
  • ندخل القالب الفرن على 150 درجة لمدة 45 دقيقه فى حمام مائي وبعدين نسيبه يبرد ونقطعه ونقدمه. 

البسيمة 

البسيمة 

طريقة عمل البسيمة 

المقادير :-

  • 3 بيضات
  • نصف كوب سكر (100 جرام)
  • نصف معلقة فانيليا (5 جرام)
  • نصف كوب زبدة (100 جرام)
  • كوب لبن رايب (200 جرام)
  • كوب دقيق ابيض (200 جرام)
  • كوب جوز هند خشن (200 جرام)
  • نصف معلقة بيكنج بودر (10 جرام)
  • نصف معلقة ملح (5 جرام)

طريقة التحضير :-

  1. في طبق نحط البيض والسكر والفانيليا واللبن الرايب والزبدة ونخفقهم مع بعض كويس.
  2. في طبق نخلط الدقيق وجوز الهند والبيكنج بودر والملح ونقلبهم مع بعض ونضيفهم على خليط اللبن والبيض ونقلبهم مع بعض لحد ما الخليط يتجانس.
  3. في صينبة او صاج مدهون سمنة نصب البسيمة
  4. وندخل الصينية الفرن على درجة حرارة 180 لمدة 35 دقيقة ولما تخرج نصب عليها شربات تقيل دافي ولما تبرد نقطعها ونقدمها. 

المحوجة 

طريقة عمل المحوجة 

المقادير :-

  • كوبين ونصف دقيق (500 جرام)
  • نصف كوب تحوجيه من العطار (100 جرام)
  • نصف معلقة بيكنج بودر (10 جرام)
  • نصف كوب سكر (100 جرام)
  • نصف كوب سمسم (100 جرام)
  • نصف كوب حبة البركة (100 جرام)
  • نصف كوب سمنة بلدى (100 جرام)
  • كوب وربع عسل اسود (250 جرام)
  • كوب وربع زيت (250 جرام)

طريقة التحضير :-

  1. في العجان نحط الدقيق والتحوجيه والبيكنج بودر والسكر والسمسم وحبة البركة والسمنة ونخلطهم مع بعض ونضيف الزيت والعسل الأسود ونخلطهم مع بعض لحد ما نحصل على خليط رملى
  2. نجيب صينية وندهنها سمنة وطحينة ونحط فيه المحوجة ونبل ايدينا ماء ونفردها بسمك متوسط ونقطعها مربعات
  3. ندخل الصينية الفرن على درجة حرارة 180 لمدة 30 دقيقه وبعدين نطلعها ونسيبها تبرد ونقدمها.

البغاشة 

البغاشة 

طريقة عمل البغاشة 

المقادير :-

  • كوبين ونصف دقيق (500 جرام)
  • نصف معلقة ملح (10 جرام)
  • نصف معلقة سكر (10 جرام)
  • نصف كوب زبدة مكعبات (100 جرام)
  • 2 بيضه مخفوقه
  • ربع معلقة فانيليا (5 جم)
  • كوب ماء (200 مل)
  • الحشو
  • نصف كوب زبدة سايحة (100 جرام)
  • بيضه مخفوقه
  • فانيليا
  • زيت للقلى
  • شربات تقيل بارد أو سكر بودر أو قرفة بودر

طريقة التحضير :-

  1. في العجان نخلط الدقيق والملح والسكر والزبدة ونخفقهم مع بعض لحد ما نحصل على خليط رملي. في طبق نخلط البيض والفانيليا والماء ونخفقهم مع بعض ونضيفهم على الخليط السابق ونخفقهم مع بعض لحد ما يكون خليط متجانس
  2. نلف العجينة رول ونقطعها 10 كرات متساويه ونرصها فى طبق ونغطيها ونسيبها ترتاح لمدة ساعة
  3. وبعد ساعة نرش الرخامة نشا ونفرد الكرات ونسيبها ترتاح ربع ساعة
  4. في طبق نخلط زبدة وبيض ونجيب كل كورة وندهنها زبدة وبيض ونحط عليها الكورة التانية وندهنها زبدة وبيض وهكذا لحد ما نخلص كل الكرات ونسيبها ترتاح ربع ساعه (هنرص كل الكورات على بعض مع مراعاة دهن كل كورة زبدة وبيض).
  5. وعلى الرخامه نرش نشا ونفردها بسمك متوسط ونقطعها مثلثات أو مربعات.
  6. في طاسة على النار فى زيت سخن غزير نقلى البغاشة لحد ما تاخد لون ذهبى فاتح ونرش عليها شربات تقيل بارد أو سكر بودر أو قرفه بودر وبعدين نقدمها. 

الحجازية 

طريقة عمل الحجازية 

المقادير :-

  • كوبين ونصف دقيق سميد (500 جرام)
  • نصف كوب دقيق أبيض (100 جرام)
  • معلقة كبيرة سكر (25 جرام)
  • معلقة صغيرة خميرة فورية (25 جرام)
  • معلقة صغيرة ملح (25 جرام)
  • نصف كوب سمنة (100 جرام)
  • نصف كوب زيت (100 جرام)
  • نصف كوب ماء دافي (100 جرام)

الحشو :-

  • كوب سكر (200 جرام)
  • نصف كوب زبيب (100 جرام)
  • نصف كوب دقيق سميد (100 جرام)
  • نصف معلقة قرفه بودر (5 جرام)
  • ربع كوب عسل جلوكوز (50 جرام)

طريقة التحضير :-

  • في العجان نحط دقيق السميد والدقيق الأبيض والسكر والخميرة والملح والسمنة والزيت ونخلطهم مع بعض ونضيف الماء ونخلطهم مع بعض كويس لحد ما الخليط يتجانس .

الحشو :-

  • في طبق نخلط دقيق السميد والسكر والقرفة والزبيب وعسل الجلوكوز ونقلبهم مع بعض كويس .
  • نجيب صينية وندهنها سمنة ونحط فيها نصف الخليط ونساويه ونحط الحشو ونفرده عليه وبعدين نصب باقى الخليط ونساويه ونقطعها وبعدين ندخل الصينية الفرن على درجة حرارة 180 لمدة 35 دقيقة وأول ما تخرج من الفرن نصب عليها شربات تقيل بارد . 

المفروكة اللبنانية 

اللبنانية
المفروكة اللبنانية 

طريقة عمل المفروكة اللبنانية 

المقادير :-

  • كوب سميد (200 جرام)
  • نصف كوب عسل ابيض (100 جرام)
  • 2 ونصف معلقة زبدة (60 جرام)
  • معلقة ماء زهر (25 جرام)
  • معلقة ماء ورد (25 جرام)
  • كوب حليب دافي (200 جرام)

التقديم :-

  • قشطه بلدى
  • كوب فسدق(200 جرام)
  • كوب عين جمل(200 جرام)
  • كوب لوز مقشر محمص(200 جرام)

طريقة التحضير :-

  1. في حلة على النار نحمر السميد ياخد لون ذهبى فاتح ونضيف الزبدة والعسل الأبيض وماء الورد وماء الزهر ونقلبهم مع بعض ونضيف الحليب ونقلب كويس لحد ما الخليط يتجانس .
  2. نجيب صينية وندهنها سمنة ونصب فيها الخليط ونزينها بالقشطة والفستق واللوز وعين للجمل ونقدمها .

عيش السرايا 

طريقة عمل عيش السرايا 

المقادير :-

  • كوبين ونصف دقيق أبيض(500 جرام)
  • كوبين ونصف سميد (500 جرام)
  • 2 معلقة خميرة فورية (50 جرام)
  • معلقة سكر (25 جرام)
  • نصف معلقة ملح (10 جرام)
  • ربع معلقة كبيرة محسن خبز أو خل (5 جرام)
  • كوبين ونصف ماء للعجن (500 مل)
  • 2 معلقة زيت
  • الفورمة:
  • 2 معلقة سمنة
  • 2 معلقة سميد

التزيين :-

  • ربع كوب فستق بودر(50 جم)
  • كوب قشطه بلدى(200 جم)

طريقة التحضير :-

  1. في العجان نضيف الدقيق الأبيض والسميد والخميرة والسكر والملح ومحسن الخبز أو الخل والزيت ونخفقهم مع بعض ونضيف الماء حبه حبه لحد ما نحصل على عجينة متماسكة طرية سهلة التكشيل.
  2. نجيب فورمة وندهنها سمنة ونرش فيها دقيق سيمولينا ونفرد فيها العجينة ونخرمها بخله ونغطيها ونسيبها فى مكان دافي تخمر لمدة ساعه على الأقل
  3. ندخل العجينة الفرن على درجة حرارة 180 درجة لمدة 60 دقيقة ولما تبرد نقطعها على 4 ديسكات ولازم نشيل الحروف.
  4. نجيب منخل ونحط فيه ديسك من عيش السرايا ونحط فيه تلشربات ونسيبه يشرب الشربات ونصفيه او نشيل الشربات الزيادة بسفنجة نظيفة.
  5. نحط الديسك فى طبق التقديم ونفرد عليها القشطة ( نعمل القشطه بلوك او دائرى) ونزينه بالفستق بودر أو كريم شانتية.

أرز بحليب بالشوكولاتة 

بحليب بالشوكولاتة
أرز بحليب بالشوكولاتة 

طريقة عمل أرز بحليب بالشوكولاتة 

المقادير :-

  • نصف كيلو حليب
  • نصف كوب ارز
  • صوص الشيكولاتة:
  • كوب حليب
  • ملعقة كاكاو
  • معلقة شيكولاتة قطع أو شوكليت شيبس
  • ملعقة سكر
  • ملعقة عسل
  • ملعقة زبدة

صوص الشوكولاتة :-

في حلة على النار نحط الحليب والسكر والعسل والكاكاو والشوكولاتة ونقلبهم مع بعض ونسيبها تغلي ونضيف الزبدة ونقلبهم مع بعض كويس ونرفعها من على النار .

طريقة التحضير :-

  1. في طبق ننقع الأرز فى الحليب لمدة 4 ساعات.
  2. في حلة على النار نحط الأرز والحليب ونقلبهم مع بعض ولما ياخد غلوة نخفض النار عليه النار للنصف ونقلبهم مع بعض لحد ما الأرز يستوى فى الحليب وبعدين نضيف صوص الشوكولاتة ونقلبهم مع بعض ( لازم نقلب الأرز فى الحليب لحد ما يتقل خالص) وبعدين نصبه في بولات أو كاسات ونقدمه.

كرات جوز الهند ( الشكلمة) 

طريقة عمل كرات جوز الهند ( الشكلمة) 

المقادير :-

  • كوبين حوز الهند
  • معلقة صغيرة فانيليا
  • كوب سكر
  • ربع معلقة صغيرة ملح
  • 4 بياض بيض

طريقة التحضير :-

  1. في طبق كبير نضيف بياض البيض و عليه الملح و نضرب كويس باستخدام المضرب او الخلاط الكهربائي لمدة 5 دقايق
  2. نضيف السكر و الفانيليا لبياض البيض و نستمر في الخفق لحد م القوام يتقل و حجمه يتضاعف
  3. نضيف جوز الهند على الخليط و نحرك كويس جدا لحد ما نحصل على عجينة متماسكة
  4. نبدا نشكل كرات جوز الهند بحجم حبة الليمون
  5. نجهز صينية و نحط فيها ورق زبدة و نرص كرات الشكلمة عليها
  6. ندخلها فرن مسخن مسبقا على درجه حراره 150 درجة لمدة 20 دقيقة و ضروري نتابعها عشان م تتحرقش
  7. لحد ما تحمر من فوق نخرجها و نسيبها تبرد و نقدمها

أرز بحليب بالكراميل 

بحليب بالكراميل
أرز بحليب بالكراميل 

طريقة عمل أرز بحليب بالكراميل 

المقادير :-

  • نصف كيلو حليب
  • نصف كوب أرز
  • صوص الكراميل:
  • كوب الا ربع سكر
  • معلقة ماء
  • 2 معلقة كريمة طهي
  • معلقة زبدة
  • رشه فانيليا

لعمل صوص الكراميل :-

  • في طبق ندوب السكر في الماء والفانيليا ونرفعه على النار ونسيبه يعمل كراميل غامق ونضيف كريمة الطهي والزبدة ونقلبهم مع بعض ونرفعها من على النار.

طريقة التحضير :-

  1. فى طبق ننقع الأرز فى الحليب لمدة 3 ساعات
  2. وفي حلة على النار نحط الأرز والحليب ونقلبهم مع بعض ولما ياخد غلوة نخفض عليه النار للنصف ونقلبهم مع بعض لحد ما الأرز يستوى فى الحليب وبعدين نضيف صوص الكراميل ونقلبهم مع بعض ( لازم نقلب الأرز فى الحليب لحد ما يتقل خالص) وبعدين نصبه في بولات أو كاسات ونقدمه. 

كب كنافة 

طريقة عمل كب كنافة 

المقادير :-

  • ربع كيلو كنافة
  • نصف كوب سمنة
  • معلقتين كبار سكر بودرة
  • الحشو :
  • نوتيلا او
  • قشطة او
  • مكسرات او
  • زبدة لوتس

طريقة التحضير :-

  • نفرم الكنافة في الكبة او نقطعها بايدينا قطع صغيرة و نضيف عليها السمنة و معلقتين سكر بودرة و نخلطهم كويس مع بعض
  • نحط كمية من الكنافة في قوالب الكب كيك و نضغط عليها بايدينا و نساويها
  • و بعدين نضيف معلقة كبيره من الحشو و بعدين نضيف عليها كميه من الكنافة و نكبسها كويس و ندخلها فرن سخن على درجة حرارة 200 لحد ما تحمر و لونها يبقا ذهبي
  • نطلعها نسقيها شربات بارد و نسيبها تبرد و بعدين نقلبها و نزينها بالفستق او اي نوع مكسرات نحبه
  • طريقة تحضير الحشو :
  • في حلة نضيف كوبين حليب معاهم 3 معالق كبار نشا و معلقتين كبار بودرة كريم شانتيه و معلقة صغيرة فانيليا و ندوبهم مع بعض ع البارد
  • نحطهم ع اانار مع التقليب المستمر لحد ما تتقل نرفعه من ع النار و نضيف عليه كوب قشطة و نقلب كويس

بسبوسة بالشوكولاتة 

بالشوكولاتة
بسبوسة بالشوكولاتة 

طريقة عمل بسبوسة بالشوكولاتة 

المقادير :-

  • 3 بيضات
  • علبة قشطة
  • ربع كوب سمنة
  • ربع كوب جوز هند
  • كوب إلا ربع سميد خشن
  • علبة حليب مركز محلي للتسقية
  • ربع كوب سكر
  • معلقة صغيرة بكينج باودر
  • معلقة صغيرة فانيليا
  • معلقة كبيرة كاكاو
  • معلقة كبيرة نسكافيه

طريقة التحضير :-

  1. نحط علبة القشطه في طبق و نضيف السكر و جوز الهند و البيض و الكاكاو و النسكافيه و البيكينج باودر و الفانيليا و السميد الخشن و السمنة و نعجنهم كويس بايدينا.
  2. نجهز صينية و ندهن القاع و الجوانب سمنة و طحينة
  3. ننزل بخليط البسبوسه في الصينيه و نفردها باطراف الاصابع.
  4. ندخلها فرن مسخن مسبقا على درجة حرارة 180 لمدة 30 دقيقة لحد ما لونها يبقي دهبي.
  5. نخرجها و نخرمها بالشوكة و نسقيها بالحليب المكثف المحلى و نزينها بشوكولاتة مبشورة أو مكسرات حسب الرغبة ونقدمها.

كنافه بالمانجو 

طريقة عمل كنافه بالمانجو 

المقادير :-

  • 250 جرام كنافة
  • 150 جرام سمنة
  • نصف كيلو مانجة مقشرة ز مقطعة مكعبات
  • معلقتين كبار سكر بودرة
  • 200 جرام كريمة خفق سائلة
  • ربع لتر عصير مانجة
  • رشة فانيليا

طريقة التحضير :-

  1. نقطع الكنافة و نضيف عليها السمنة و معلقتين السكر البودرة و عاى نار هادية نقلب الكنافة لحد ما تحمر كلها بلون ذهبي
  2. نضيف عليها رشة فانيليا و نسيبها تبرد خالص
  3. نضرب كريمة الخفق السائلة لمدة دقيقتين على اقل سرعة في المضرب عشان م تفصلش
  4. و لو كريم شانتيه بودر نضربه خمس دقايق و نضيف عليه كوب ماء مثلج
  5. في كاسات التقديم او صينية البيركس نضيف طبقة كريمة خفيفه عشان الكنافة تمسك فيها
  6. نضيف عليعا طبقة كنافة ثم عصير مانجا بسيط ثم كريمة ثم مانجو
  7. نكرر الطبقات كنافة عصير كريمة مخفوقة مانجا لحد م الكمية تخلص

ليالي لبنان 

لبنان
ليالي لبنان 

طريقة عمل ليالي لبنان 

المقادير :-

  • 4 كوب حليب سائل
  • كوب سميد ناعم
  • ربع كوب سكر
  • معلقة صغيرة مستكة مطحونة
  • معلقة صغيرة فانيليا

للوجه :-

  • علبتين قشطة
  • فستق مطحون او اي نوع مكسرات تحبوه

طريقة التحضير :-

  1. نحط الحليب مع السميد و السكر و ماء الورد على النار هاديه و نتابعه
  2. و نقلب من وقت للتاني و نسيبه على النار لحد ما نحصل على القوام النطلوب نضيف المستكة و الفانيليا و نقلب و نرفعه من على النار
  3. نصب الخليط في طبق تقديم بايركس بارتفاع نص سم فقط مش اكتر من كدا و نسيبه يبرد خالص و نفرد القشطة على الوجه
  4. و نوزع القستق المطحون و ندخلها التلاجة لمدة ساعتين
  5. نقطعها و نقدمها باردة مع اضافة الشربات التقيل على الوجه وقت التقديم

الحلاوة الطحينية 

طريقة عمل الحلاوة الطحينية 

المقادير :-

  • كوب ونصف سكر بودرة منخول
  • كوب ونصف حليب بودرة منخول
  • كوب طحينة
  • كوب بندق أو فستق حلبي مجروش خشن

طريقة التحضير :-

  1. في طبق حطي الحليب البودرة مع السكر البودرة واخلطيهم كويس.
  2. ضيفي الطحينة تدريجياً مع العجن باستمرار باليد للحصول على قوام زي الرمل المبلل.
  3. غلفي قالب كيك مستطيل الشكل بورق نايلون.
  4. حطي نصف كوب من البندق أو الفستق في قعر القالب.
  5. وزعي الحلاوة في القالب وحطي عليها الكمية المتبقية من البندق أو الفستق.
  6. اقفلي النايلون على الحلاوة ورصيها كويس وبعدين دخليها الثلاجة لمدة 4 ساعات.
  7. عند التقديم خرجي النايلون من القالب وقطعي الحلاوة.

كب البقلاوة 

البقلاوة
كب البقلاوة 

طريقة عمل كب البقلاوة 

المقادير :-

  • نصف كوب سكر
  • معلقة كبيرة عصير ليمون من نصف ليمونة صغيرة
  • ثلث كوب ماء
  • ربع كوب عسل
  • لفة جلاش
  • 2 كوب من المكسرات كوب ونصف جوز + نصف كوب فستق
  • نصف معلقة صغيرة قرفة
  • 3 معلقة كبيرة زبدة غير مملحة سايحة
  • نوتيلا أو ربع كوب شوكولاتة مذابة للتزيين (اختياري)

طريقة التحضير :-

  1. سخني الفرن على درجة حرارة 180.
  2. في حلة صغيرة اخلطي مكونات الشربات وخلي المزيج على نار متوسطة / عالية ، مع التقليب لحد ما السكر يذوب وبعدين هدي النار وخليه يغلي لمدة 4 دقايق بدون تقليب وارفعيه عن النار وسيبيه يبرد في درجة حرارة الغرفة أثناء تحضير.
  3. في الكبة اخلطي كوبين من المكسرات مع بعض وافرميهم فرم خشن وانقليهم في طبق ​​وضيفي عليهم نصف معلقة صغيرة قرفة + 3 معلقة كبيرة زبدة سايحة وقلبي لحد ما يمتزجوا كويس.
  4. قطعي شرائح الجلاش مربعات ورصي كل ورقة جلاش في ورق خبز الكب كيك واقسمي خليط الجوز بين الأكواب (حوالي ملعقتين صغيرين لكل كوب ، واضغطي عليهم من فوق بصوابعك.
  5. اخبزي لمدة 10 دقائق على درجة حرارة 180.
  6. بمجرد الخروج من الفرن حطي معلقة صغيرة من الشربات البارد فوق المكسرات واسقي القطع نفسها بالشربات وبعدين سيبيها تبرد وقدميها.

القطايف 

طريقة عمل القطايف 

المقادير :-

  • كوبين دقيق
  • نصف كوب سميد
  • معلقة كبيره حليب بودرة
  • معلقة كبيره خميرة
  • معلقة كبيره سكر
  • معلقة صغيرة بكينج باودر
  • كوبين مياه
  • رشة ملح

طريقة التحضير :-

  1. في الخلاط الكهربائي نخلط المقادير كلها مع بعض لمدة 3 دقايق وبعدين نصب الخليط في طبق و نغطيه و نسيبه يخمر لمدة ساعة.
  2. نحضر طاسه تيفال و نسخنها بدون زيت و ننزل بمقجار كبشة من الخليط على شكل قرص صغير أو حسب الحجم اللي تحبوه.
  3. على نار متوسطة لمدة دقيقة تقريبا لحد ما نلاحظ ظهور فقاعات على السطح والعجينة تنشف، نرفعها من على النار في طبق فيه فوطة نضيفة و نكرر نفس الخطوة لحد ما الكمية تخلص.

الغريبة 

الغريبة 

طريقة عمل الغريبة 

المقادير :-

  • كوبين دقيق (250 جرام)
  • كوب سمنه (125 جرام)
  • نصف كوب سكر بودرة (75 جرام)
  • ربع معلقة صغيرة فانيليا
  • ذرة ملح بسيطة
  • للتزيين لوز أو فستق مقطع انصاف

طريقة التحضير :-

  1. نطلع السمنة من الثلاجة ونحطها فى بولة و عليها السكر البودرة الفانيليا و الملح ونضربهم مع بعض كويس بالمضرب الكهربائى لحد ما نحصل على قوام كريمى تقيل ولونه فاتح.
  2. نضيف الدقيق ونقلب بايدينا او بمعلقة خشب لحد ما نحصل على عجينه ناعمة.
  3. ندخل العجينة الثلاجة لمدة ساعة وبعدين نشكلها كرات صغيرة ونضغط عليها ضغطة خفيفة فى المنتصف ونزينها باللوز أو الفستق ونرصها فى الصواني.
  4. ندخلها الفرن على درجة حرارة 120 لمدة 12-10 دقيقة ونخلى بالنا ان لونها مش حيتغير احنا نبص عليها ولما نلاقيها مسكت نفسها كده تبقى استوت وبعدين نخرجها من الفرن ونسيبها تبرد خالص وبعدين نشيلها من الصينية.

المعمول 

طريقة عمل المعمول 

المقادير :-

  • كوبين دقيق
  • معلقة كبيرة سكر
  • نص كوب سميد
  • نص معلقة صغيرة ملح
  • معلقة كبيرة حليب بودرة
  • نصف كوب سمنه بارد
  • نصف معلقة صغيرة بيكنج بودر
  • كوب وربع ذبدة باردة
  • نصف معلقة صغيرة محلب
  • نصفمعلقه كبيره خميره فوريه

الحشو :-

  • نصف كوب سكر
  • نصف كوب عين جمل او اى مكسرات
  • نصف كوب سميد
  • معلقة صغيرة قرفة
  • نصف كوب عجوة طرية
  • معلقة صغيرة ماء زهر
  • نصف كوب سمسم
  • معلقة كبيرة شربات تقيل عسل ابيض

طريقة التحضير :-

لعمل الحشو :-

فى بوله نخلط السكر والعجوة والسمسم والسميد وعين الجمل والقرفة وماء الزهر والعسل ونقلبهم مع بعض كويس ونعمل كرات صغيرة .

لعمل المعمول :-

  • نضيف الدقيق والسميد والحليب البودرة والبيكنج بودر والسكر والسمنه والذبدة ونبثهم مع بعض بإيدينا او بالميكسر لحد ما الخليط يتجانس
  • نجيب نص كوب ماء دافئ وندوب فيه الخميرة مع نص معلقه سكر صغيرة ونقلبهم على بعض ونضيفهم للخليط السابق ونكمل عجين لحد ما الخليط يتجانس
  • نحط العجينه فى طبق كبير ونغطيه و نسيب العجينة ترتاح ساعة فى الثلاجة
  • نقطع عجينة المعمول حسب حجم القالب وناخد كل قطعه من العجينه فى بطن الايد الشمال ونحفرها باصبع الايد اليمين بحيث نعمل تجويفه داخل العجينه بالتساوى ونحشيها ونحط فيها كورة من الحشو ونلف اطراف العجينه فوق الحشو بالراحة
  • نجيب قالب المعمول ونرش دقيق بسيط ونحط فيه القطعه ونضغط عليها بالراحة وبعدين نضرب حافة القالب على حافة الطرابيزة او الرخامه عشان تقع المعمول من القالب
  • نجيب صينية ونمسحها بنقطة زيت بسيطة باستخدام منديل ورقى ونرص فيها المعمول وندخلها الفرن فى الرف الوسطانى على درجة حرارة 190 لحد ما ياخد لون دهبى غامق شويه

بسكويت البرازق 

البرازق
بسكويت البرازق 

طريقة عمل بسكويت البرازق 

المقادير :-

  • كوب ذبده بدرجة حرارة الغرفة
  • كوب سكر بودرة
  • نصف كوب حليب بودرة
  • معلقة كبيرة بيكنج بودر
  • بيضه
  • 4 كوب دقيق منخول
  • ربع كوب زيت نباتى
  • معلقة صغيرة فانيليا سايلة
  • ذرة ملح

الحشو :-

  • كوبين سمسم محمص مع ٦ معالق شربات تقيل
  • نص كوب فستق او لوز (مجروش)

طريقة التحضير :-

  • فى بولة وبمضرب كهربائى او يدوى نضرب الذبده لحد ما تبقى ناعمة وبعدين نضرب السكر البودرة لحد ما يبقى القوام كريمى
  • نضيف البيضة والفانيليا والزيت ونخفقهم كويس
  • نضيف ذرة الملح والدقيق والحليب البودرة والبيكنج بودر ونقلب كل المكونات لحد ما نلم العجينه وتبقى طرية ولو حسينا انها ناشفة ممكن نزود معلقتين مياه كبيرة ونغطيها وندخلها الثلاجة نص ساعة وبعدين نكورها كور صغيرة ونغمسها فى الفستق اواللوز
  • نرصها فى صنية مدهونة زيت بسيط ويكون الفستق لتحت ومن فوق نزين الوجه بخليط من السمسم
  • نضغط عليها بكف الايد بحيث سمكها يبقى رقيق
  • ندخلها فرن سخن على 170 درجة لمدة 10 دقايق أو لحد ما تاخد لون ذهبى وبعدين نخرجها.

منين بالعجوة (كعب الغزال) 

طريقة عمل منين بالعجوة (كعب الغزال) 

المقادير :-

  • نصف كيلو دقيق
  • نصف معلقة صغيرة ملح
  • نصف معلقة كبيرة خميرة فورية
  • كوب سمنه سايحة (200 جرام)
  • نصف معلقة كبيرة سكر
  • نصف كوب قشطه أو زبادى او لبن رايب (100 جرام)
  • ربع كوب ماء دافي

الحشو :-

  • كوب عجوة او ملبن حسب الرغبة
  • معلقتين ونصف زبدة طرية

الغطاء :-

  • ربع كوب سمسم
  • ربع كوب سمنه
  • ربع كوب حليب

طريقة التحضير :-

  • فى بوله تخلط الخميرة والسكر والماء ونذوبهم مع بعض ونضيف الدقيق والملح ونعجنهم مع بعض لحد ما الخليط يتجانس ونصيف الذبادى والسمنه ونكمل عجن لحد ما نحصل على عجينه طريه سهلة التشكيل.
  • نغطى العجينه فى مكان دافئ ونسيبها تخمر لمدة ساعة.
  • في طبق نخلط العجوة او الملبن من الذبده
  • نشكل العجينه رول طويلة ونحشيها ملبن او عجوة ونلفها رول على الحشو ونقطعه بالسكينه على هيئه اصابع صغيرة و نرصه فى صنية ونسيبه يخمر ربع ساعه تانى ونلمعه بسمنة وحليب ونرش عليه سمسم.
  • ندخله فى الفرن على درجة حرارة 180 لمدة 25 دقيقة.

الشربات التقيل والخفيف ( الشيرة أو القطر )

التقيل والخفيف الشيرة أو القطر
الشربات التقيل والخفيف ( الشيرة أو القطر )

طريقة عمل الشربات التقيل والخفيف ( الشيرة أو القطر )

الإختلاف الأساسي بينهم يعتمد على كمية السكر في المياة يعني الشربات الخفيف كمية المياة فيه أكتر من السكر عكس الشربات التقيل لكن خطوات التحضير واحدة .

المقادير :-

الشربات التقيل :-
لكل كوب سكر يضاف نصف كوب ماء
الشربات الخفيف :
لكل كوب سكر يضاف كوب ماء

طريقة التحضير :-

  • في حلة على النار متوسطة نحط السكر و المياة لحد الغليان و نضيف عصير نصف ليمونة و نهدي النار خالص و نسيبه من 10:20 دقيقة على نار هادية لحد ما يعقد أو يتقل .
  • بلاش تقليب الشربات نهائيا اثناء التحضير عشان ما يسكرش او يبلور بعد كده .

Comments are closed.