كاثرين ملكة الدم (18+)

كاثرين ملكة الدم (18+) حكاية حصلت في أستراليا جاهزين ؟؟

تحذير : الحكاية فيها تفاصيل مؤلمه وممكن تتعب نفسية بعضكم ، فاللي مش هيقدر وقلبه مبيتحملش القصص المرعبة يكمل لف علي الفيس بوك او يدخل ينام ..لكن كتيبة ال Heartless مدمنين الأدرينالين ، تنفذ طقوس حكاية نص الليل وكل واحد فيكم يجيب كوباية اللمون بالنعناع ويشوف مكان هادي في البيت ويهدي الأضاءة علي الأخر ويحاول ينسي العالم اللي حواليه ويخلي كل تركيزه معايا علشان انا هخدك معايا لعالم مختلف .. يالا بينا..

مشهد 1

عريس وعروسة في اول ليلة ليهم في عش الزوجية ، العروسة أسمها كاثرين نايت Katherine Knight ، وكانت مبسوطة وفرحانة في اول ليله ليها مع جوزها بس واضح ان جوزها بدأ يتاوب وكان عايز ينام وهي عايزاه يفضل صاحي معاها وهو بيقولها تعبان وعايز انام ونقعد مع بعض بكرا ..

وفجأة صوتها اخشن وبدأت تكلمه بعنف وهجمت عليه وبالاقلام علي وشه وكل ما يجري منها تجيبه وتكمل عليه ضرب وتخربشه بضوافرها بتوحش وكانت بتحاول تخنقه والموضوع كبر اوي والعريس لاحول له ولا قوه ومبقاش عارف يعمل أيه ..

كاثرين كانت متعوده دايما تحط سكينة تحت المخده بتاعتها حتي يوم فرحها كانت حاطة سكينه حامية زي أمواس الحلاقة تحت مخدتها ، ولما الغضب اتملك منها سابت الراجل اللي كانت روحه هتطلع في ايديها وجريت علي السرير ومدت ايديها بسرعة تحت المخدة وفي اقل من ثانيه كانت مطلعة السكينه وبتجري في اتجاه زوجها وعنيها علي رقبته علشان تفصل راسه عن جسمة ..

في اللحظة دي كانت الجيران اتجمعوه عند بيت كاثرين من كتر الصراخ والخبط اللي كان حاصل ، والجيران كسروا الباب ودخلوا في اخر لحظة وانقذوا زوجها من بين ايديها قبل ما تدبحه وخدوه ورواحوا بيه المستشفي لأن كانت حالته صعبة من كتر الضرب وجسمه كله بيترعش من كتر الخوف ..

بعد المشهد اللي فات ده اكيد تخيلتوا بشكل كبير شخصية كاثرين كانت عامله أزاي ، فكاثرين كانت ست في الشكل الخارجي بس لكن كان قلبها صلب وقاسي جدا وكانت عنيفة ومتسلطة ..

قصة كاثرين من البداية

تعالوا معايا نشوف قصة كاثرين من البداية وزي ماعرفنا عملت ايه مع زوجها الأول تعالوا نشوف هي عملت اية في زوجها الثاني !!..

كاثرين ولدت سنة 1955 في أستراليا وكان ليها أخت تؤم اسمها جوي ، والاختين كانوا نتيجة علاقة غير شرعية لأمهم مع عشيقها ، فكانت أمهم (بربرا) متزوجة من رجل أسمه (جاك روان) وعندها 4 أطفال منه وكانت بتخون زوجها جون مع شريكة في العمل (كين نايت) وهربت معاه وسابت زوجها جون ..

كاثرين طفولتها كانت بائسة جدا ، وكان والدها كين بيشتغل جزار ، وكان دايما سكران لأنه كان بيشرب بشكل مبالغ فيه لدرجة أنه معظم الوقت كان مش حاسس باللي حواليه ، وكان دايما لما يكون سكران بيغتصب بربرا قدام بناتها بكل وحشية ، وكانت كاثرين لما بتشوف المنظر ده كانت بتبكي بمراره لكن لكونها طفله صغيرة مكنتش بتقدر تعمل اي حاجة ، وهي نفسها اتعرضت للتحرش الجنسي وهي طفلة صغيرة علي أيد أخوتها لأمها وفضلوا يتحرشوا بيها لحد ما بقي عندها 11 سنة ..

كان ابوها كين مش مستقر في شغله وكان دايما بيتنقل هو وعيلته بين مزارع الماشية علشان شغله وبعد فترة أستقروا فى مدينة أسترالية اسمها أبردين وكانت مشهورة بصناعة اللحوم ، وكان كين لقي شغل ثابت في مجزر في المدينة دي .كاثرين لما كانت صغيرة كانت طفلة لطيفة بتحب الحيوانات وبتعطف عليهم وبتلعب في هدؤ ودايما بتبتسم للناس ..

لكن في مرحلة معينه في حياتها حصلها تغير كبير ، وبقت عصبية جدا لدرجة انها اوقات كانت بتفقد اعصابها وممكن تعمل اي حاجة حتي لو برا حدود العقل ، وعلشان الحالة المزاجية المرعبة والعصبية اللي بقت كاثرين فيها ، الكل بقي يخاف يزعلها وبقوا يعملولها الف حساب ..

كان زمايلها في المدرسة بيقولوا انها كانت لوحدها معظم الوقت لكن كانت بتتنمر على زمايلها وبتجر شكالهم ، لكن لما كانت تبفي مزاجها كويس كانت بتكون كويسه جدا ، لكن لو غضبت واتعصبت فمكنش حد يقدر يقف قدامها ، حتى الولاد في المدرسة كانوا بيبعدوا عنها من كتر خوفهم منها ، و فى مرة ضربت زميلها في المدرسة وطلعت سكينه من شنطتها وحطتها علي رقبته وكانت لسه هتشد السكينه في الاتجاه التاني وتدبحة لولا المدرسين وباقي الطلبة اتدخلوا وخطفوا السكينه من ايديها ، وفى مرة تانية كانت بتهجم علي مدرس علشان تضربه وفي أثناء ماكان المدرس المسكين بيدافع عن نفسه السكينه اللي في ايديها جت فيها وجرحتها .. دي أمثله بسيطة لعنف كاثرين وحبها للسكاكين .

كاثرين اتعرضت لصدمة كبيرة هزت كيانها وهي طفلة صغيرة وهي انتحار عمها أوسكار نايت ، وكانت بتحبه جدا ، وكان قريب منها وبيحبها يمكن كمان كان قريب منها اكتر من والدها ، وكانت دايما بتقول ان شبح عمها بيزورها باستمرار وبيطمن عليها ..

بداية شغل كاثرين

لما وصلت لسن ال 15 سنة كانت كاثرين بتعرف تقرأ وتكتب بس سابت المدرسة و أشتغلت فى مصنع خياطه كام شهر وسابته واشتغلت بعد كدا الشغل اللي كانت بتحبه جدا ونفسها تشتغله ، فكاثرين قررت تشتغل مع والدها وأخوها وأختها فى المجزر ، وكان الشغل بسيط في الأول وبعد فترة بسيطة المدير لاحظ انها موهوبه ومحترفه في شغل المجازر واستخدام السكاكين بكل انواعها بالرغم من ان سنها لسه صغير ومشتغلتش في المجال ده قبل كدا ، وقرر المدير انه يرقيها الى جزارة ، وكانت أسعد لحظات حياتها لما سلموها ادوات العمل الخاصة بها لأول مرة الساطور والسكاكين بكل احجامها ..

عنف وشراسة كاثرين ومهنتها اللي كلها دم وتقطيع في لحوم الحيوانات ممنعتش انها تكون أمرأة ليها أحاسيس ومشاعر ونفسها تحب وتتحب وتسمع كلام حلو ويكون في حياتها واحد حنين عليها وفي النهاية تتجوز وتعيش حياة مستقرة ، لكن المشكلة الكبيرة أن الرجال كانوا بيخافوا منها لأن بشهاده كل الرجال حواليها انهم مشافوش قبل كدا أمرأه بالعنف والقسوة والجبروت ده ، أمرأة جزارة علي طول ماسكة السواطير و السكاكين حوالين وسطها ودايما ببتخانق مع الرجال فى الشارع ولو واحد وقع تحت ايديها بتضربه وتقطع وشه بالسكينة ..

أنوثة كاثرين

وفى مرة من المرات واحد شاف فيها نوع من الانوثة و حاول انه يتقرب منها ، وراح كلمها بكل لطف وفجأة ايديها اتحركت في سرعة الفهد لسكينه من السكاكين اللي دايما حولين وسطها وحطت السكينه علي رقبتة قدام كل الناس ، فجري الرجل وهو مذعور ، وده كان زي تحذير لبقية الرجال وفعلا محدش قدر يقرب منها تاني ابدا ..

كانت عندها حاجة نفسيه بتخليها سعيدة لما تذل راجل وتشوفه بيترعش من الخوف قدامها او بيجري منها وهو مرعوب ، لكن في نفس الوقت كانت نفسها تلاقي شخص يكون شريك حياتها وحبيبها ، ومع الوقت اتأكدت كاثرين ان طول ما هي ماسكة الساطور في ايديها وحاطة السكاكين حولين وسطها مفيش راجل هيقرب منها ..

وفي الاخر وبعد ما يئست ان حد ممكن يقربلها راحت هي بنفسها لواحد زميلها في الشغل أسمه ديفيد كيليت وعرضت عليه قلبها ، فوافق الراجل المسكين علي ان يكون حبيبها بعد تردد ، لكن غالبا سبب موافقته هو الخوف من رد فعلها لو رفض طلبها ..

حبيب كاثرين

بعد ما وافق ديفيد علي انه يكون حبيب كاثرين خرجوا تاني يوم مع بعض وكان راكب الموتوسيكل بتاعه وكاثرين راكبه وراه وطبعا كل الناس في المدينه لما شافوا المشهد ده كانوا في حالة صدمه ومش مصدقين نفسهم وكانوا بيقولوا لبعضهم ازاي المتوحشة دي لقت راجل يقبل انه يكون حبيبها ؟؟ وقالوا محدش عارف يمكن يقدر يروضها ويغير عصبيتها وعنفها ..

وكانت كاثرين بتدافع عن ديفيد بكل شراسة وعنف وكانت كمان بتحميه في بعض الاوقات لما كان بيحتاج لحماية ، ففي مرة من المرات كان ديفيد في البار واتخانق مع بعض الرجال والخبر وصل لكاثرين وفي وقت قصير ركبت الموتوسيكل بتاعها وراحت البار وضربت الرجاله اللي اتخانقوا مع حبيبها علقه خلت كل رجال مدينة أبردين يفكروا الف مره قبل ما يزعلوا ديفيد اللي بقي تحت جماية الجزارة المتوحشة ..

زواج كاثرين

سنة 1974 كاثرين وديفيد تزوجوا وبعد اجرائات الزواج ركبت كاثرين العروس الموتوسيكل بتاعها وخدت عريسها وراها و طارت علي بيتهم ..

لما وصلوا البيت لقوا بربرا أم كاثرين في انتظارهم ورحبت بيهم وبصت لديفيد وابتسمت ابتسامه ليها معني وقالتله : خلي بالك يا ديفيد من كاثرين واوعي تزعلها علشان متقتلكش ، واوعي تتعامل معاها بطريقة غلط او تعمل حاجة غلط والا هتكون نهايتك واوعي تفكر تخونها او تخدعها لانها بكل بساطة هتدبحك زي ما بتدبح المواشي والاغنام في المجزر ، فكاثرين بنتي عندها مفك ضارب في دماغها ..

دي كانت اول نصيحة من بربرا ام كاثرين لعريس بنتها في ليلة دخلتهم ، لكن اللي حصل بعد كدا بسبب ان ديفيد كان عايز ينام فزي ما قولتلكم في بداية الحكاية ان الجيران قدروا يلحقوه من تحت ايديها قبل ما تدبحة وخدوه ودوه المستشفي في حاله صعبة جدا ، وللأسف مش هتكون المرة دي هي المرة الأخيرة اللي هيضرب فيها من زوجته كاثرين ..

لكن علشان نكون منصفين ونقول الحق ، فا كاثرين كانت زوجة حنونة ومحبة ورائعة لما بيكون مزاجها حلوا ورايق ، زي البحر هادىء وصافي فى معظم الأوقات ، لكن لما بتغضب وبتتعب بيحصل بركان وزلازل وبتتحول لوحش مجنون واللي بيشوف عنفها وجبروتها بيحس انها اتحولت لشيطان عنيف بيدمر كل شئ ..

وفى ليلة من اليالي ديفيد اتأخر برا شويه ولما رجع لقي كاثرين حارقة كل ملابسه وأول ما سأالها ليه عملتي كدا ضربته على رأسه بالطاسة واغمي عليه والجيران خدوه تاني علي المستشفي وهناك عرفوا انه اتصاب بكسر بسيط في الجمجمة ..

وبالرغم من عصبيتها وعنفها والوحشيه اللي بتعامل بيها ديفيد لكن نتج عن زواجهم ولادة طفلين ميليسا سنة 1974 ، ونتاشا سنة 1980 ..

وبعد كام شهر من ولادة بنته الثانية مبقاش ديفيد طايق الحياة مع كاثرين فهرب مع أمرأة تانية ولما عرفت كاثرين اتحولت لوحش بدون قلب وكانت عايزة تنتقم منه وتحرق قلبه باي شكل .. تخيلوا عملت ايه ؟؟؟ ..

خدت طفلتها الرضيعة وحطتها على قضبان السكة الحديد ، وكانت خلاص البنت هتتقطع تحت قضبان القطر لولا ان كان في رجل بيعدي صدفة فأنقذها قبل دقيقة واحدة من مرور القطر عليها ، وبسبب اللي عملته كاثرين البوليس عرف وقبض عليها و نقلوها لمستشفى الأمراض العقلية ، لكنها مقعدتش كتير في المستشفي وخرجت ..

بعد خروجها عملت مصيبة جديدة .. لما عرفت ان ديفيد هرب هو وحبيبتة وأمه لكوينز لاند فوقفت في الطريق ووقفت عربية كانت واحدة ست سايقاها وضربتها في وشها بالسكينة وجرحتها جرح كبير وأجبرتها على أن تنقلها الى كوينز لاند ، لكن صاحبة السيارة قدرت تهرب وهي فى محطة بنزين على الطريق و بلغت الشرطة ..

الشرطة استجابت لاستغاثة الست فورا وبعتت قوات أحاطوا بالمحطة من كل مكان ، لكن كاثرين مستسلمتش بسهولة ، ومسكت ولد صغير وحطت السكينه علي رقبتة وهددت انها هتدبحه لو الشرطة مسبتهاش تمشي ، لكن الشرطة قدرت تنقذ الولد والسيطرة على كاثرين عن طريق ضربها بالعصى الكهربائية وتم نقلها للمستشفى تاني ..

وفي المستشفي كانت بتقول للممرضات انها كانت ناويه تروح لورشة تصليح السيارات علشان تدبح العامل اللي صلح عربية زوجها وده خلاه يقدر يهرب بالعربية ، وبعد كدا كانت ناوية تروح كوينز لاند علشان تدبح زوجها وأمه ..

الشرطة أتصلت بديفيد وقالتله علي اللي زوجته ناوية تعمله ، ولما ديفيد سمع الكلام ده فضل في الحمام لمده ٥ ساعات لان بطنه كانت بتألمه جدا من شده الخوف والرعب ، وبعد تفكير خد قراره وساب حبيبته الجديدة وخد والدته معاه ورجع الى كاثرين يتوسل اليها أنها تسامحه وتغفر له ..

وطبعا ديفيد مر بابشع سنين بعد حادثة هروبه مع أمرأه تانيه وكانت حياته كلها بوئس وسنة 1984 رجع ديفيد للبيت بس ملقاش حد ، البيت كان فاضي ، وعرف ان كاثرين خدت البنتين وخدت كل الحاجات الغالية اللي كانت في البيت وسابتله البيت وراحت لبيت والديها وكان ده احسن حاجه حصلت لديفيد في حياته كلها ..

بعد ماسابت ديفيد بكام شهر حصلها حادثة وقعت علي ضهرها واضطرت تفضل في البيت منغير شغل فتره وعلشان كدا الدوله اديتها شقة كأعانه ..

وفي الفترة دي كانت بدأت تدور علي راجل جديد علشان يكون شريكها ، وكاثرين بالرغم من وحشيتها لكنها كانت تبان جميلة وجذابة لأي حد يشوفها للمرة الأولى ، لكن معظم رجال مدينة أبردين كانوا عارفين حالات الغضب المسعورة اللي كانت بتحصلها ، وكانوا عارفين كمان انها ليها رغبات قوية في العلاقة الحميمية وقليلين اللي يقدروا علي اشباع رغباتها المستمرة ، وعلشان كدا كان مجرد القرب منها كان مغامرة محفوفة بالمخاطر ..

لكن كان في رجل شجاع قرر يدخل المغامرة دي ويرتبط بالوحش الكاسر كاثرين ، الراجل ده كان اسمه ديف ساندريز ، عنده 38 سنه ، كانت اتعرفت عليه كاثرين سنة 1986 فى لوبي فندق من الفنادق اللي كان متعود يقعد فيه لشرب الخمر ولعب القمار ..

ساندريز راح يعيش مع كاثرين فى شقتها لكنه خلي شقته زي ماهي فى بلدة سكون اللي كانت قريبه من ابردين ، وده بعد ما سمع تحذيرات كتير عن طبع واخلاق صديقته كاثرين ..

الأسابيع الأولى كانت جميلة وكلها رومانسية ، لكن شياطين كاثرين بدأت ترجعلها تاني .. وفجأة .. فى مساء يوم جميل وبدون أى مقدمات ، أتهمت كاثرين حبيبها الجديد بأنه على علاقة بأمرأة تانيه غيرها ، الرجل دافع عن نفسه بكل طاقته لكن مفيش فايدة ، ضربته بعنف و ترضته برا شقتها ، فرجع ساندريز لشقته ، وبعد دقايق راحتله كاثرين وفضلت تتوسل اليه وتبكى علشان يسامحها ويرجع معها ، وبالرغم من ان ساندريز شاف جنونها بس بعد الحاح كاثرين وافق على الرجوع معاها ..

ودي كانت البداية لأن من بعد الحادثة دي بقي ضرب وطرد ساندريز حاجه عادية وروتينية ، وبقي عارف ان كل مره هترحله وتتوسل اليه وتترجاه فى كل مرة تطرده فيها ، والغريب انه كان بيوافق ويرجع معاها ..

كاثرين جنونها كان ملهوش حدود ، في ليلة من الليالي ومن غير سبب محدد ، مسكت كلب ساندريز الصغير اللي كان عنده شهرين وذبحته قدامه بسكينه من سكاكينها المرعبه علشان يعرف اللي ممكن يحصله لو اتجرأ وخانها في يوم من الايام ، ولما ساندريز شاف المشهد المرعب ده كان مصدوم ومش مصدق اللي شافه وبعد ثواني فاق من صدمته ونزل علي ركبه علشان يشوف الكلب المسكين وهو غرقان دم ، في اللحظة دي جت كاثرين من وراه وضربته بالطاسه على رأسه فوقع مغمي عليه ..

كانت علاقة كاثرين وساندريز غريبة ومش مفهومه ، فى كل مرة يتخانقوا مع بعض كاثرين تجري وراه وترجعه البيت ، ويقعدوا كويسين كام يوم وبعدين يتكرر الموضوع من جديد ، وكان نتيجه الزواج العجيب ده طفلة اسمها سارة اتولدت سنة 1989 ..

بعد ولادة سارة انتقلت كاثرين من الشقة الحكومية لبيت اشترته لما خدت فلوس علي سبيل السلف من زوجها ساندريز وكانت رجعتهم تاني بعد كدا ، وكان البيت ده أول حاجة كاثرين تتملكها في حياتها ، كانت فرحانة بالبيت جدا ومهتمه بتزين كل ركن فيه لدرجة انها غطت كل الجدران والارضيات والسقف بجلود البقر والجاموس ، وعلقت عدد كبير من جماجم الحيوانات والقرون على حيطانه ، وزينت اركانه بالسكاكين والسواطير وفخاخ الحيوانات وجواكيت الموتيسيكلات والاحذية الطويلة وحاجات غريبة تانيه ، البيت كان شكله متحف اكتر ما كان شكله بيت من كتر الحاجات اللي علي جدرانه وفي كل ركن فيه .. كان كل ده بيدل علي ان كاثرين مضطربه نفسيا وعقلها الباطن مليان بالالغاز والعقد ..

بعد فتره قصيره من فرحة كاثرين بالبيت الجديد ، رجعت الخلافات تاني بينها وبين ساندريز بس المرا دي الموضوع اتطور عن كل مره وكاثرين ضربت زوجها بماسوره حديد كبيره وطعنته فى بطنه بمقص وقطعت كل ملابسة ، وفي الوقت ده كان ساندريز وصل لمرحله من الغضب والثوره محصلتش قبل كدا وساب البيت وزي كل مرا راحت تدور عليه علشان ترجعه البيت تاني و سألت عنه فى المنجم وزمايله في الشغل قالولها مش بنشوفه من فتره ، فراحت البار اللي كان بيسهر فيه وبرضو مش موجود ..

دورت عليه في كل مكان لكن مفيش فايدة ، قاعدت مع نفسها وهي في حالة صدمه ، واللي جيه في بالها وهي في قمه العصبيه والجنون انه يكون هرب وسابها وعند اللحظة دي كل شياطين الدنيا بقوا يتنططوا قدام عنيها ، فقررت انها تنتقم منه وراحت بلغت الشرطة ان سانريز مختل عقليا وانه عنيف جدا معاها ودايما بيضربها ضرب شديد ، وطبعا الشرطة وقفت في صفها و خدت كاثرين من الشرطة أمر انه يفضل بعيد عنها وعن اطفالها وميقربش ليهم ابدا ، وبعد شهر رجع ساندريز علشان يشوف بنته الصغيرة ، فاتفاجئ بالامر اللي خدته كاثرين من الشرطة وكانت دي نهاية العلاقة ..

وعلشان نفهم حقيقة تصرف كاثرين الاخير بانها قررت تبعد ساندريز عنها تماما فلازم تعرفوا انها كانت علي علاقة بزميلها في المجزر وكان اسمه جان شيلنكوورث وكان عنده 43 سنة واستمرت العلاقة بينهم بشكل متقطع لمدة 3 سنين ونتج عنها طفل اسمه ايريك ، وخلال السنين دي كانت كاثرين بتخون شيلنكوورث مع كذا راجل تاني ، وفي الاخر سابت جان شيلنكوورث علشان واحد من عشاقها وكان اسمه جون برايس وكان بيشتغل في منجم ، كان مطلق وعنده 3 اطفال ومنهم أتنين عايشين معاه ، وكان جون على دراية بالقصص المنيلة اللي بتتقال علي كاثرين لأنها كانت اشهر أمرأه في المدينه كلها وكانت بتمشي في اي شارع الكل بيبص عليها في خوف ورعب والناس بتخاف تتعامل معاها او مجرد بس عنيهم تيجي في عنيها من كتر خوفهم منها ، ومع كل ده جون برايس سمحلها انها تعيش فى شقته والكلام ده كان سنه 1995 ..

وزي كل العلاقات في بدايتها بتكون جميله وكلها سعاده فكانت علاقة كاثرين وبرايس برضو في بدايتها سعيدة وجميلة و كانت كاثرين لطيفة وساحره لدرجة أن اطفال جون حبوها واتعلقوا بيها لكن زي كل مرا الجو الجميل الهادي ده مستمرش كتير وبدأت المشاكل ، وكانت المشكله المرا دي ان برايس مكنش عايز يتجوز كاثرين بشكل رسمي ، وكل ما تقولوا نتجوز يتهرب منها لحد في يوم ما حصلت بينهم خناقة كبيره وصوتهم علي وكل الجيران سمعوا صوتهم العالي ومن غضبها وجنونها حبت تنتقم منه فصورت شريط فيديو لبعض الحاجات اللي كان برايس سرقها من شغله وبعتت الشريط للشركة بتاعته ، وكان برايس قضي 17 سنه من عمره في الشركة دي وطبعا لما الاداره وصلها شريط الفيديو قررت فورا طرد برايس ..

برايس لما عرف اللي كاثرين عملته وانه اطرد من شركته وبقي منغير شغل وسمعته في كل مكان بقت ملوثة غضب وطرد كاثرين من بيته ورجعت تاني لبيتها ، لكن علشان هي ست مجنونه ومتقلبه وفي نفس الوقت خبيثه وبتقدر تعمل اللي هي عايزاه في اي وقت فقدرت بعد كام اسبوع انها ترجع تتصالح تاني مع برايس وعاشت في بيته تاني ، لكن بعد فتره قصيره رجعت تاني للعصبيه والجنون والخناق مع برايس وبقي كل اصحاب برايس بمجرد انهم يعرفوا ان كاثرين معاه فبيبعدوا عنه وبيختفوا من قدام عنيه تماما من كتر خوفهم من كاثرين ..

وفى فبراير سنة 2000 العلاقة بينهم بقت سيئة جدا ووصلت لطرق مسدودة ، وفي خناقة من خناقتهم مع بعض مسكوا في بعض وكاثرين طعنت برايس بالسكينة فطردها من البيت وكان خد قراره انه مش ممكن يعيش تاني مع الست المجنونه دي لانها بقت خطر علي حياته وحيات اولاده وراح لقسم الشرطة وقدر يحصل علي امرا بيقضى انها متقربش منه او من اولاده ..

وطبعا وانتوا بتقروا دلوقتي متخيلين واحدة بشخصية كاثرين لما تعرف ان حبيبها عمل فيها كدا هتكون حالتها عامله ازاي!!بقت عامله زي المجنونه وبتلف في البيت في كل مكان زي الاسد الغضبان ومش عارفه تعمل ايه وعرفت انها وصلت لنهايه العلاقه مع برايس لما اتاكدت انه باللي عمله ده عايز يقطع العلاقه للأبد ، وبرايس برضو عرف ان كاثرين مش هتسكت وقال لزمايله في المنجم بانه لو مجاش الشغل بكرا الصبح يبقي يعرفوا ان كاثرين قتلته ، فنصحوه انه ميرجعش البيت لكنه قال بانه خايف لو مروحش البيت كاثرين تنتقم من ولاده الصغيرين ..

عقاب كاثرين لزوجها برايس

ولما رجع برايس بليل لقي البيت فاضي وعرف ان كاثرين بعتت الطفلين لمنزل ناس قاريبهم علشان يباتوا عندهم الليله دي ، برايس راح عند واحد جاره وقضى معاه كذا ساعة ورجع علي بيته وكانت الساعة 11 بليل ودخل نام ، بعدها بفترة قصيرة رجعت كاثرين ودخلت البيت اكلت واتفرجت علي التلفزيون شويه وبعد كدا دخلت الحمام وخدت شاور ولبست طقم ملابس داخلية اسود اشترته في نفس اليوم العصر ودخلت لغرفة برايس وصحته ودخلوا في علاقة ورجع تاني برايس نام ..

وتاني يوم الصبح كل العمال بدأوا يدخلوا محل عملهم في المنجم وبعد فتره بدأوا يسألوا عن برايس علشان اتأخر لكن بعد كذا ساعه مظهرش برضو ، وكانت سيارته لسه واقفة قدام البيت ، ولانه كان قايل لأصدقائه وجيرانه قبل كدا انه خايف يتعرض لأي خطر بسبب كاثرين ، فبدأ الجميع يحس بالقلق وراحوا بيته وفضلوا يخبطوا علي الباب بس مفيش حد كان بيرد عليهم فبصوا من الشباك ..

واتصدموا . . لما شافوا الدم في كل مكان في البيت على الارضية وعلي الجدران وفي كل مكان .. بلغوا الشرطة وعلي الساعة 8 صباحا وصل اتنين من الشرطة البيت ودخلوا عن طريق الباب الخلفي ، كان في دم فى كل مكان على الارضية والجدران وحتى في السقف ، وفى الصالة لقوا برايس . او.. اللي اتبقي منه .. فكانت اطرافة كلها متقطعة .. وراسه مفصولة عن جسمة .. وجلده كله مسلوخ .. وفى غرفة تانية لقوا كاثرين مغمي عليها ، وكانت واخده حبوب منومه بكميه كبيره علشان تنتحر فنقلوها للمستشفى وقدروا انهم ينقذوها ..

جريمة القتل حصلت فى ساعة متأخرة من الليل وده كان كلام ضباط الادلة الجنائية ، وقالوا كمان ان من الواضح ان كاثرين فى لحظة معينة من الليلة دي قررت انها تقتل جون فدخلت غرفته وطعنته بالسكينة فى صدره ، فصحي وهو مفزوع من نومه وحاول يفتح النور علشان يشوف ايه اللي بيحصل بس كاثرين فضلت تطعنه بالسكينه منغير توقف فحاول يهرب من الغرفة وجري علشان يهرب من البيت كله ، لكن حتي وهو بيحاول يجري كانت كاثرين بتطعنه والسكينه بتدخل وتخرج في اماكن مختلفه في جسمه وكان غريب ان برايس بالرغم من كل لاىالطعنات دي بسكينه كبيره وسلاحها حاد جدا يقدر يجري كل الوقت ده ويوصل لمدخل البيت ، لكن مهما كان قادر علي تحمل الطعنات فهو في النهايه انسان وفعلا انهار ووقع علي الارض من كتر الرعب والألم ..

وفي اللحظة دي هجمت عليه كاثرين زي الاسد ما بيهجم علي الفريسة بتاعته وسحبته من رجله ودخلته البيت تاني ، و كان تقرير الطبيب الشرعى بيقول أن جون برايس اتعرض ل 37 طعنة فى مناطق مختلفة من جسمه من قدام ومن ورا .كاثرين سحبت جون للصالة ، وبدأت بسلخ جلده زي ما هي متعودة تسلخ الحيوانات بعد ما بتدبحها في المسلخ ، والبشع والمرعب في الموضوع ان برايس كان لسه عايش وبيترجاها تسيبه بس كان مش قادر يتحرك من كتر الدم اللي نزل منه وكانت كاثرين بتسلخ جلده وهي مش مهتمه بتوسلاته ..

سلخت كاثرين الجلد بأحترافية وبراعة واتقان لدرجة انها سلخته قطعة واحدة ، حتى جلد اصابع القدم واليد سلخته واخرجته سليم من غير ما يتقطع منها وكان خلال عملية السلخ برايس بيصرخ من الألم الرهيب والسكاكين بتفصل جلده عن لحمة وكانت بتقلب فيه علشان تكمل سلخ وكل ما لحمه اللي منغير جلد ما يلمس ايديها او يلمس الارض عينه تبرق في مشهد من ابشع ما يكون ومع توسلاته وبكائه وهو شايف جلده بيتشال من عليه بدأ صوته يهدي ومات من الطعنات ومن العذاب اللي استمر اكتر من نص ساعه وكاثرين بتفصل جلده عن لحمه بمنتهي الجبروت والوحشية .

المنظر كان رهيب بكل ما تحمله الكلمه من معاني .. كان نتيجة عمل كاثرين في سلخ برايس هي قطعة كبيرة من الجلد بتحتوى على فروة الرأس والودان والشفاه والأنف ومحاجر العيون والصره و حتى العضو التناسلى سلخته ، سلخت راجل كامل بكل احتراف وخرجت جسمه كله بكل التفاصيل اللي فيه مهما كانت صغيرة ودقيقة في قطعة جلد واحدة ..

وبعد ما خلصت سلخ خدت الجلد ونشرته على باب الصالة ، ورجعت للجثة تاني وبدأت بتقطيعها ، بدأت في الاول بفتح الصدر والبطن وخرجت القلب والكبد والاحشاء ، وبدأت تقطع شرايح من اللحم من منطقة المؤخره والفخذ وحطتهم فى وعاء ، وقامت بفصل الرأس ووضعته فى وعاء كبير .وقال تقرير الطب الشرعي أن العملية كلها بداية من القتل والسلخ والتقطيع ، مخدتش من كاثرين أكثر من 40 دقيقة ، وطبعا ده وقت قياسي لأن عمليه زي دي لو بتحصل علي خروف صغير هتاخد من ساعتين ل 3 ساعات لكن السرعه في الاداء بيرجع لشغلها في الجزارة من وهي طفلة صغيرة ..

كاثرين خدت اللحمة والرأس للمطبخ ، و حطت اللحمة فى طاسة واضافت اليه التوابل والبصل واللفت والبطاطا والكوسا وصلصة الطماطم والملح والفلفل و فضلت تقلبهم لحد ما استوت ، فقسمته على 3 اطباق وحطت 2 منهم على طربيزة الأكل وقدام كل واحد ورقة فيها اسم واحد من اطفال برايس ، وكانت عايزه اطفاله لما يرجعوا للبيت الظهر يكلوا لحم ابوهم ، أما الطبق التالت فالشرطة لقته واقع علي الارض فى الحديقة الخلفية وكان كل اللي في الطبق واقع علي الارض وباين كدا ان كاثرين كلت منه كام قطعه من لحم برايس لكن مستحملتش طعمة وحست بالغثيان ورمته ، لكن بالنسبه للراس فلقوها بتغلي في أناء كبير مع تشكيله من الخضار..

بعد ماخلصت كاثرين طبخ رجعت خدت صور لجسد برايس المتقطع قطع بعد ما حطت فى ايده الشمال زجاجة خمرة فاضية ، وكتبت على الصورة بالدم انها عملت كدا انتقام من برايس لانه اغتصب واحده من بناتها وده طبعا كلام مفيش عليه اي اثبات ..

كانت جريمة قتل جون برايس مرعبه و مروعة وبشعة ، الجريمة هزت مدينة أبردين ومش بس كدا دي هزت أسترليا كلها وكانت كل الصحف والقنوات الاستراليه والعالمية بتتكلم عن الحادثة المرعبه وكان الكل بأنتظار ان كاثرين تفوق من غيبوبتها علشان يعرفوا هتقول ايه وازاي عملت كدا ، وازاي من الاساس قدرت تعمل كدا ؟لكن كاثرين فأجئت الجميع لما فاقت من غيبوبتها وقالت للمحققين أنها مش فاكرة اي حاجة عن الليله اللي حصلت فيها الجريمة وان أخر حاجة فكراها أنها رجعت لبيت برايس واتصالحوا ودخلوا في علاقه حميمية وكانوا في منتهى السعادة وبعدها قام برايس من علي السرير علشان يدخل الحمام وهي كانت عايزه تنام وفعلا نامت ومش فاكره اي حاجة من اللي حصلت بعد كدا ..

الطبيب النفسى اللي كشف عليها قال انها فعلا كانت في حالة جنون تام في وقت ارتكابها الجريمة ، وقال بأن نسيانها للي حصل كله سببه عدم تقبل عقلها لبشاعة اللي عملته ، خصوصا لما اكلت أجزاء من جسد الضحية ، وعلشان كدا عقلها مسح الذكريات في الليلة الدموية المرعبه دي ..

كاثرين اتعرضت علي اطباء نفسيين كتير خلال الاسابيع اللي بعد الجريمة وكان كل طبيب نفسي يقعد معاها ويكشف عليها يقرر انها مش فى كامل قواها العقلية ، وأنها مصابة بمرض نفسى اسمه اضطراب الشخصية الحدى وأهم اللي بيميز المرض ده هو أن المصابين به بتكون عندهم خوف شديد للتعرض للتهميش والاقصاء وبيجلهم نوبات شديدة من الغضب والعنف ، وده كان وصف دقيق جدا لسلوك كاثرين طول حياتها ..

لكن بغض النظر عن رأي الطب والكلام اللي قالوه الاطباء النفسيين كانت في حاجات كتير بتدين كاثرين ، واولها انها عندها سوابق كتيره فى الاعتداء العنيف على الرجال ، ثانيا انها هددت انها هتقتل برايس وده كان في العلن قدام شهود كتير ، وبرضوقبل الجريمة بيوم كانت صورت شريط فيديو مع اطفالها قالت فيه كلام بيدل على نيتها القيام بعمل هيأدي الى انها هتبعد عن عيلتها ، وكانت كلالحاجات دي بترجح انها نفذت الجريمة عن سابق اصرار وترصد ..

كاثرين اتقدمت للمحاكمة . .و فى البداية كانت مصممه على أنها بريئة وانها مكنتش في وعيها لما نفذت جريمتها ، وتوقع الجميع محاكمه طويلة ، و الادعاء العام حذر المحلفين من ان التفاصيل والصور اللي هتتعرض عليهم خلال المحاكمة هتكون بشعة و مروعة وصعب تحملها ، لكن بعد جلسة او جلستين بس غيرت كاثرين اقوالها من بريئة الى مذنبة ، ومفيش حد عارف هي ليه عملت كدا وبعض الناس بيقول أنها عملت كدا علشان تحمي اطفال برايس وعلشان ميسمعوش التفاصيل المروعة اللي حصلت لوالدهم ، وناس تانيه كان ليها رأى تاني وقالوا أنها هى نفسها مستحملتش انها تسمع التفاصيل دي ، فخلال الجلسة الاولى للمحاكمة لما الطبيب الشرعى كان بيتكلم عن اللي حصل لبرايس من طعن وسلخ وذبح ، كانت كاثرين بتهز دماغها بعنف وتحرك ايديها الاتنين بهستيرية ومع مرور دقايق والطبيب الشرعي بيوصف اللي حصل بدأت تخبط راسها في كل مكان في جنون وبسرعة حقنوها بمواد مخدرة علشان يقدروا يهدوها ..

لما اعترفت كاثرين بجريمتها القضيه اتقفلت وكان المحاميين بيحاولوا يخففوا الحكم بادعاء انها مجنونه لكن القاضي رفض بشده واصدر حكم بالسجن مدى الحياة من غير أى فرصة للعفو او اطلاق السراح ، وده بيعتبر أقصى حكم خدته أمرأة فى استراليا بعد ما عقوبة الاعدام ما اتلغت سنة 1984 ..

الناس في المدينه كانت في حالة غضب وثوره من هول وبشاعه الجريمة لدرجة انهم راحوا عند بيت كاثرين ورجموه بالحجارة ودمروه تماما ، اما كاثرين نايت المتوحشة والمتعطشة للدم دايما فلسه مسجونة لحد النهارده ، ومش هتخرج من السجن الا لما تموت ،وكانت الصحف لحد النهارده بتابع اخبارها من جوه السجن وعرفوا انها اتمنعت من العمل في مسلخ السجن .

قصة حقيقية إعداد وكتابة الرائع أ / سيد فودة

قصص حقيقية أخرى أعدها الأستاذ سيد فودة

جزيرة الأفاعي ، لا يُسمح لوجود البشر بها
الكندي تيم ماكلين “قصة حقيقية مرعبة”
لغز من ألغاز السفر عبر الزمن
واحد كان بيحب الأكل لدرجة انه كان بياكل أي حاجة كانت بتيجي قدامه حتي لو كانت قطه او كلب او حتي طفل صغير
إستعمال الكلاب في حرب الأتحاد السوفيتي مع هتلر
جورجي دوجا ملك علي الجمر
لغز سفاح أوكرانيا
حديقة الموت
التحنيط بتدخين الجثث في غينيا الجديدة
كيفين كارتر صاحب جائزة بولتزر للصورة مصور صورة طفلة السودان
عبود وزوجته خجاوة جزارين البشر في العراق
مغامر أمريكي في كهوف ولاية يوتا بالولايات المتحدة الأمريكية
اطول كائن حي علي الكوكب أكتشفه العلماء حديثاً
إنقراض سمكة المجداف الصينية القادرة على البقاء على قيد الحياة لمدة 200 مليون سنة
قصة شعار شركة من اكبر شركات الانتاج السينمائي في الولايات المتحدة و في العالم
تعرف مزيداً على كوكاكولا أقدم مشروب صودا
هيوستن Houston أكبر مدن ولاية تكساس