وادي الكواكب في ليبيا أحد عجائب الدنيا

By Ahmed Hussien Last updated ديسمبر 18, 2021

وادي الكواكب الليبي من أحد عجائب الدنيا !!

النهاردة هنروح ليبيا

انا سافرت ليبيا سنة 1998 وكنت حابب البلد والشعب الليبي الطيب الكريم بس للأسف كانت سفريات آقصر من اني الف فيها وأكتشف كل الطبيعة الساحرة هناك ، لكن ده ميمنعش أني الف في كل ركن في الكتب وعلي الإنترنت ونشوف كنوز ليبيا العظيمة . .

ليبيا من البلاد اللي مليانه اسرار والغاز محدش عارف يحلها ، ومن الألغاز دي كرات حجرية تشبه الكواكب علي مسافة 30 كيلو متر بمنطقة الكفرة في الصحراء الليبية و كل الصخور والأحجار و حتى الرمال في المكان ده متشكلة بطريقة تشبه الفضاء وخلفية الكواكب زي اللي بنشوفها في الصور والآفلام اللي بتتكلم عن الفضاء الخارجي ، و بيوصل حجم بعض الكرات الحجرية لحجم بيت كبير ، ومتوسط قطر كل صخرة ” كوكبية ” 10 متر تقريبا . .

والغريب أن الكرات الكوكبية دي مش موجودة في اي مكان في الدنيا الا في ليبيا ومفيش حد يعرف أيه السر ورا الشكل الغريب للكرات الحجرية في المكان ده ولا متكونه من اية أو ازاي . .

وادي الكواكب واد جاف جدا و أرضيتة صخرية صلبة مفيش فيها ماء ولا بينموا فيه زرع ، وعلشان كدا الوصول له صعب وشاق جدا علي السياح لأن الطريق له بعيد ومتعب ، لكنه بكل تأكيد يستحق الزيارة حتي لو متعب لأنك في النهاية هتشوف مشهد خيالي وكأنك سافرت للفضاء الخارجي ..

عندي أمل الحكومة الليبية تهتم بالأكتشاف الأثري العظيم ده وتسهل علي السياح الوصول له لأني متأكد ان في سياح هيجوا لوادي الكواكب من كل مكان .