لعبة ويجا ومفتاح الدخول للعالم السفلي

ويجا ومفتاح الدخول للعالم السفلي جاهزين؟؟
يالا بينا. .

تحذير: “الحكاية فيها تفاصيل مخيفة وكلام عن عالم السحر والأرواح وممكن تتعب نفسية بعضكم ، فاللي مش هيقدر وقلبه مبيتحملش القصص المرعبة بلاش يكمل “

لكن حبايب قلبي ال Heartless اللي مبيخافوش وبقوا مدمنين أدرينالين , يجيبوا كوباية اللمون بالنعناع علشان يهدوا أعصابهم ويجوا أحكيلهم حكاية اللعب مع الشيطان . .

لعبه ويجا . .

لعبه ويجا . . بتخليك قادر علي دخول عالم الجن والارواح وعالم السحر الاسود ، و بمجرد انك بتلعبها يبقي فتحت علي نفسك ابواب جهنم وبتكون فريسه سهله للجن وبيكون سهل جدا يحصلك مس سفلي او المكان الي لعبت فيه بيتسكن من الجان. .

اللعبه دي اصلها بيرجع لسنة 1200 قبل الميلاد في الصين وكانوا بيستخدموا ألواح متشابهة جدا للعبه ويجا الحالية ، مكتوبه بأسلوب( فوچي) ودا اسلوب للأتصال بعالم الموتي والأرواح بشرط يكون في طقوس خاصه والعاده دي كان بيقوم بيها أحد الكهنة في احدي الديانات وأنه بيستخدم نوع من الكتابه اسمه الكتابه التلقائيه ويمسك العصايه المخصصه ليه ويبدأ في تلاوه صلوات معينة ، ويسيب ايده بدون تحكم فيها بحيث أن الأرواح تبدأ تحركها وهي الي تكتب بنفسها . .

وفي العصور الوسطي بدأت كهنة بتنفيذ نفس الطقوس ولكن الكارثه اللي حصلت أن الأرواح لبستهم عشان تتواصل مع العالم وتقدر تتكلم .

لحد ما الفكره وصلت لواحد امريكي سنه 1890 وبدأ في توزيع اللعبه في كل المحلات وأسواق امريكا ، وانا شوفتها في محل في مانهاتن بنيويورك وفعلا شكلها مش مريح تماماً ، المهم الراجل ده سمها ويجا و معناها “نعم” وانتشرت اللعبه بشكل كبير في امريكا بسبب سهوله وبساطه استحضار الارواح منغير التعقيدات اللي كان بيقوم بيها الكهنه زمان ، وهقولكم دلوقت ازي بيحصل ده. .

استخدام اللعبه بيحتاج قوه قرائه واستيعاب كبير للأرقام والحروف وعشان كدا كانت سهله لناس كتير ، اللعبه مصنوعه من مستطيل من الخشب ، واللوح الخشبي دا منقوش عليه من النص الحروف الابجديه والارقام من 0-9 في قوسين متقابلين وفي زوايه اللوح الاربعه مكتوب كلمات معينه وهي (goodbye_ Ouija_ yes_no ) وموجود مع اللعبه مؤشر اسمه بلانشيتو. .

اللعبه دي بتتلعب بشخصين أو ثلاثه وبتوصل لحد أقصي اربعه ومينفعش تتلعب بأكتر من كدا ومن هنا يجي تحذير !! أن محدش يلعب لوحده ، وكمان لازم يتم تهيئة الجو للأرواح وهي اضواء خفيفه ويفضل اضواء الشموع و بخور ويكون المكان هادي جدا . .

بيتم اختيار واحد من ضمن المجموعه ويسمي “عريف اللعبه” وهو الي بيحضر الاسئله الي بيتم طرحها قبل ما يبدأ اللعب وبيحطوا كلهم صوبعهم علي المؤشر ويبدأ العريف بطرح اول سؤال “هل يوجد أرواح بيننا” ويستنوا كلهم الاجابه من خلال تحريك المؤشر بدون تدخل اي بشري ، اللي بيتحكم فعلياً هو جن من العالم السفلي ، ويتحرك المؤشر نحيه yes وممكن يتأخر الرد او ميبقاش في رد خالص. .

سنه 1901 في مجموعه من الدجالين وعبدة الشيطان استخدموا اللعبه دي في استحضار الأرواح للتواصل معاها وهما الي أضافوا الرموز الي منتشره علي اللعبه دلوقتي وانتشر اللوح دا بشكل مخيف بسبب الحرب العالميه الأولي والحرب العالميه التانيه بسبب رغبه سكان العالم في استحضار أرواح أبنائهم الي راحت خلال الحرب . .

في ناس بتقول إن اللعبه استجابت معاهم واتواصلوا معاهم وناس تانيه بتقول إن اللعبه متحركتش معاهم

ولو هنتكلم عن الابحاث العلميه من خلال تجربه اللعبه المؤشر فعلا اتحرك ! واقاويل اخري بتقول ان المؤشر ممكن يتحرك بسبب وهم عقلك ب تحريك المؤشر ودي طاقه ممكن تحركه وبسبب ايمان الناس في اللعبه دي في فتح بوابه العالم الاخر حصل احداث مخيفه ومرعبة في مختلف أنحاء العالم!!

سنه 1920 في مدينة سرينو بولاية كاليفورنيا كل الصحف اتكلمت عن المدينة دي لان المدينة كلها أصيبت ب الجنون المطلق بسبب لعبه ويجا والشرطه قبضت علي بنت عندها 16سنة بتدعي انها بتتواصل مع الأرواح ومن هنا انعقد اجتماع عاجل بحضور طبيب نفسي يكشف علي قوه عقليه اهل المدينة دي كلهم وفرضوا حظر كامل علي بيع او لعب ويجا .

قصص حوادث لعبة ويجا

بدأت في قصص كتير منها ولد عنده 14 سنه كان متعلق جدا بخالته وخالته دي كانت واسطه روحانيه اهدته لعبه في عيد ميلاده وهي لعبه ويجا وبعد موتها الولد دا متحركش من علي اللعب وخالف اول قاعده للعبه وهي أنه لعب لوحده وبدأت الكوارث تظهر اصوات ابواب تفتح وتتقفل ومنها باب غرفته وعفش بيطير حاولوا يعالجوه مع دكتور نفسي لكنهم فشلوا لكن اتعالج روحيا بعد ما عرفوا ان حصله مس من الجان وكان في مشاهد مرعبه جدا في جلسة استخراج الجان اللي كان الولد بيغرس ضوافره في وشه وبيقطع جلده بشكل بشع لدرجة ان المعالج الروحاني اللي كان بيعالجة والناس اللي معاه خافوا وكانوا بيفكروا يخرجو من الغرفه لأخر لحظة.

قصه تانيه حصلت سنه 2015 لبنت فضلت تجري في المستشفي وهي بتقول أن أرواح شيطانيه لبستها بعد مالعبت اللعبه عن طريق تطبيق من التليفون ، و البنت بدأ يتحول صوتها لصوت مريب ومرعب وتقول كلام مش مفهوم ومنهم كلمه اتفهمت شويه وهي 666 (تلت ستات) ودا رمز الشيطان ودا سبب يرجع انها صنعت لوح خشب مع اصحابها وصنعت المؤشر من الورق المقوى وبدأت مع تحضير الطقوس اللازمه وسألت “ouija can we play” وبعد مرور 10 دقايق متحركش المؤشر وضحكوا البنات ولكن الرد كان صادم لان المؤشر اتحرك علي كلمه “yes” فضلوا في حالة صمت دقايق لحد متجرأت واحده وسألت تاني واستمروا في الأسئلة لحد الفجر وأهل البنت صحيوا والبنات خبوا اللعبه تحت السرير علشان كانوا خايفين أن حد يشوفها ولكن اللعبه مخلصتش لسه زي ما الشروط والطقوس حاكمه.

وتاني يوم جت البنت عشان تخرج اللعبه ولكن المرعب انها ملقتهاش وبعد 3 ساعات البنت سابت تليفونها في غرفتها مع تأكيد كبير أنه في غرفتها لكن رجعت لقته في غرفه تانيه وركز في كلمه مع التأكيد دي !!

وبعد مرجعت لقت صوت همس بينادي عليها ونفس الأحداث بتحصل مع اصحابها وبعد حوالي اسبوع ماتت واحده منهم وكان في سر ورا موتها بس مكنش معروف!

المرعب انهم لاقوا جثتها تحت السرير وفي نزيف حاد من الانف والودان بس الدم كان لونه اسود ولزج وشكله مرعب ولما شرحوا الجثه محدش قدر يوصل لحاجه ولا يوصل لسبب سواد دمها بالشكل البشع ده . .

وبعد اسبوع واحده تانية منهم كانت بتساعد باباها واخوها في قطع الشجر اللي في حديقة بيتهم الخلفية واخوها كان بيستخدم منشار الشجر الكهربائي وكان مشغل المنشار ومسكه في ايده علشان يقطع الشجرة لكن فجأة ظهر تعبان قريب منه واهو ارتبك واتحرك بشكل غير ارادي وكانت اخته جنبه فالمنشار خبطها من وسطها وبدأ يقطع في لحمها مرورا بالعضم لحد ما اتقسمت نصين وسط ذهول و صدمة اخوها وباباها اللي ماكنوش مستوعبين اللي حصل . .

التالتة غرقت في حمام السباحة مع انها بتعرف تعوم كويس ولما اهلها شافوها اتفجأوا لما شافوا علي وشها نظرات رعب مش عارفين ايه اللي وصلها لدرجة الفزع دي قبل موتها بلحظات . .

والرابعة بيتها كله اتحرق وهي ماتت جوه البيت متأثرة بحروقها ولما البوليس حقق في الموضوع اكتشفوا ان مصدر النار كان في غرفة البنت مع ان مكنش في اي دليل علي وجود مواد مشتعلة . .

ولما صاحبه الدور حست أن الدور عليها قررت تحكي كل حاجه ل أهلها ولما الام خدتها هي وصحبتها اللي لسه عايشة كانوا بيعانوا من اقوي انواع المس وبعد علاجهم كانوا لازم يغيروا البيت الي تم لعب ويجا فيه فورا . .

في الاخر احب اقولك إن اللعبه بتسيب أسر نفسي بيوصلك للإنهيار العصبي أو الانتحار وعشان كدا اوعي تفكر ولو لمجرد الفضول انك تعمل حاجه من الحاجتين دول ( لا تلعب ويجا ولا تدخل الغرف الحمراء علي الدارك ويب) وطول ما انت بعيد انت في امان . .

سامع حد بيقول ايه هي الغرف الحمراء؟ ده موضوع كبير ومرعب وللاسف هو بيحصل في نفس العالم اللي احنا عايشين فيه ده .

كاتب المقال :-

Sayed Fouda