Take a fresh look at your lifestyle.

قصة سيسل والماء الاسود في الفندق الملعون

1٬809

متابعينا الكرام معانا اليوم حكاية حصلت في أمريكا وبالتحديد في ولاية لوس انجلوس

تحذير : الحكاية مرعبه ومؤثرة اكتر وممكن تتعب نفسية بعضكم ، فاللي بيتأثر يوقف قرأة لحد هنا .. بس كتيبة ال Heartless 💪🏻💪🏻 مدمنين الأدرينالين ، اللي مجهزين طقوس حكاية نص الليل ، شوفوا مكان هادي في البيت ووطوا الأضاءة علي الأخر وحاولوا تركزوا معايا علشان انا هخدكم معايا النهاردة لعالم غريب شوية .. يالا بينا

بداية القصة

القصة بتحصل في فندق ملعون في لوس انجلوس ، الفندق ده معظم اللي بيدخله بيموت ، يا بيتقتل يا بينتحر لكن في النهايه بيموت موته بشعه ، وكان من اشهر قصص القتل والانتحار هي قصتنا النهارده .. فهاخدكم ونرجع مع بعض 7 سنين ورا في سنة 2013 لما ماتت بنت في الفندق ولحد النهارده محدش عارف ازاي هي ماتت ، الغريب في القضية انها ملهاش اي دلائل واضحه او بصمات دي كمان ملهاش قاتل .. وفي شكوك ان القاتل مش انسي ، ده ممكن يكون من بعد تاني غير البعد اللي احنا عايشين فيه .. مش عايزكم تتلخبطوا وركزوا معايا ، وعلشان تفهموا معايا القضيه هحكيلكم علي حاجات وانتوا اربطوها ببعض .

فندق سيسل 8
فندق سيسل

لعبة Elevator

في البداية هحكيلكم عن لعبه اسمها Elevator game او لعبة الاسانسير ، ودي لعبه مشهورة في المواقع الكورية والصينية ، لو في اللعبة دي قدرت تنفذ الخطوات بدقة وبالترتيب المظبوط هتقدر تدخل البعد الاخر او للعالم الموازي للعالم بتاعنا ..

من شروط اللعبة ان المبني يكون مش اقل من 10 ادوار ، واللعبه تتلعب بداية من الساعة 3 الفجر .. – بتقف قدام باب الاسانسير وبتقول اسم معين للشيطان (بس انا مش هذكره هنا) 13 مرة وبعدين تستدعي الاسانسير – بتركب الاسانسير وتضغط علي 3 ارقام فردية عشوائية ويكون اخر رقم 5 .. – بعد ما الاسانسير بيروح للادوار اللي ضغط عليها وفي النهاية يوصل للدور الخامس ، هتركب بنت مهما حصل اوعي تتكلم معاها او تبصلها .. لانها مش من عالم الانس .. – لما البنت بتركب الاسانسير واول ما الباب بيتقفل اتحرك بهدوء واوعي تلمس البنت واضغط الدور العاشر .. – لما توصل للدور العاشر انت هتكون وصلت للعالم الموازي او البعد الاخر .. لما بتوصل للبعد الاخر بتشوف حاجات غير اللي كانت في العالم الطبيعي بتاعنا ، يعني هتكون في نفس المبني ونفس الممرات لكن باشكال تانيه وديكورات شيطانيه وهتشوف كائنات غير البشر .

اللعبه مرعبه ومخيفة وناس كتير في كوريا والصين ودول تانيه حابوا يغامروا ويلعبوها وكانت نهايتهم الموت او الجنون واللي نجي من الموت حكي عن قصص مرعبه وتفاصيل بشعه شافها في البعد التاني اللي هو باختصار عالم الجان السفلي ..

فندق سیسل

طيب انا سبب اني حكيتلكم عن اللعبة دي لانها احتمال كبير تكون هي مفتاح اللغز بتاع الليلة دي .. وقصة النهاردة بدأت في فندق سیسل في لوس انجلوس , والفندق ده من ابشع الاماكن اللي ممكن تزورها في حياتك وريحة الموت في كل ركن فيه من كتر عدد الناس اللي اتقتلوا وانتحروا فيه ، وتقدر تمييزه بسهولة من الإعلان الاحمر العملاق اللي موجود علي جانبه ، وبيقال انه كان واحدا من أرقى وأجمل فنادق لوس انجلوس في يوم من الايام ، ولكن بعد مرور سنين طويله وتراكم المشاكل المالية , وزيادة المنافسين , الفندق اتحول إلى مبنی كئيب ومخيف ، وبعد ما كان بينزل فيه عالية القوم بقي يعرض غرفه ال700 للناس اللي بيدوروا علي سكن رخيص ، ومن الغريب ان الفندق موجود في منطقه كلها مجرمين ومشردين .

في يوم تيلفون الاداره في الفندق رن ، وكان الاتصال من غرفه فيها بنتين فكانت بنت فيهم بتشتكي من البنت التانيه اللي ساكنه معاها في الغرفه ، والاتنين ميعرفوش بعض ، وكانت بتقول ان تصرفاتها غريبه وبتعمل حركات مخيفه ، وفعلا الاداره نقلت البنت اللي كانت بتشتكي لغرفه تانيه ، وفضلت البنت الغريبه لوحدها في الغرفه ولاحظ بعض نزلاء فندق سيسل بأن مياه الحنفيات في غرفهم بقي لونها أسود وطعمها غريب وريحتها قذرة وفيها عفن ، فا اتنين من النزلاء اتصلوا باداره الفندق وواحد منهم قال الماية لونها اسود ومش نضيفة وطعمها غريب وريحتها مقرفة ، بتفضل لمده دقيقتين بالوضع ده وترجع طبيعية تاني ، وواحده تانية قالت للاداره انها لما كانت بتستحمي الماية كانت نازله سودا وقذرة وكانت هيغمي عليها من الريحة .

آداره الفندق اعتقدت ان في مشاكل في المواسير وان المشكله مش كبيره اوي ، ولكن بعد يومين نزلاء تانيين اتصلوا لاداره الفندق واشتكوا من طعم المايه اللي بيزيد سؤ وقذاره وقالوا انهم بمجرد الشرب منها بيحسوا بالغثيان . . وفي يوم 21 فبراير 2013 جيه للاداره اتصال من نزيل قالهم انا مش قادر استحمل طعم وريحة الماية السودا اللي بتنزل من الحنفيات ، ولو مشوفتوش حل انا هشتكيكم ، وهنا كان فرغ صبر المدير وأرسل عمال علشان يشوفوا ايه المشكله بالظبط ، وبدأوا يشوفوا المواسير لكن مكنش في اي مشاكل في المواسير ، فقرروا يشوفوا خزانات المايه اللي فوق سطح الفندق ، كانوا 4 خزانات كبيرة وكان صعب الوصول ليهم وعليهم اجهزه انزار علشان محدش غير العاملين في الفندق يقدر يروح عندهم ، ولما العمال طلعوا للخزانات وفتشوا فيها ، فاكتشفوا حاجة مروعة.

اكتشفوا جثة متحلله وعرفوا ان الجثة دي لنزيلة شابة و كانت هي دي البنت اللي كانت معاها بنت تانيه واشتكت منها لان تصرفاتها غريبة وبتعمل حاجات تخوف ، فطلعت البنت اللي ماتت هي البنت الغريبه اللي كانت كل تصرفاتها مريبه وكانت اختفت عن الأنظار من حوالي 3 أسابيع ، وطبعا لما النزلاء عرفوا سبب سواد الماية وريحتها القذرة فضلوا لايام يتقيئون اللي في بطونهم من شدة التقزز , ومكنوش مصدقين انهم فضلوا اسابيع بيشربوا ويغسلوا وجوههم وأسنانهم ويستحموا با ماية جثة متحللة بالخزان ، وكان واحد من النزلاء بيتكلم في لقاء تلفزيوني وبيقول وهو مصدوم : ” في اللحظة اللي اكتشفنا فيها الأمر شعرنا فورا بالغثيان وبعدم راحة في المعدة , خصوصا ونحن كنا قد شربنا من ذلك الماء .

حاليا نحن نمر بحالة نفسية سيئة ” القصة أثارت استغراب الناس لما نشرت الصحف تفاصيلها لأول مرة , وكان كل الناس بيسألوا : ايه اللي بتعمله جثة البنت الشابة دي في خزان الماية ؟ ! وبعد التحقيق عرفوا ان البنت دي اسمها إليسا لام وعندها21 سنة وهي كندية من اصل صيني وكانت في اجازة وجت للوس انجلوس وكانت مع تواصل دايما مع اهلها وكانت بتكلمهم كل يوم تقريبا لكن فجأة الاصال انقطع بينهم ومبقتش تتصل بيهم وهما مش عارفين بنتهم راحت فين ، اهلها بدأوا يتوتروا ويقلقوا جدا علي اليسا واتصلوا بشرطة لوس انجلوس ولقوا جثتها بعد اسبوعين من البلاغ .

محققين الشرطة وضعوا فرضيتين لموت اليسا لام :- الفرضية الأولى أن إليسا لام تعرضت للقتل في مكان ما من الفندق واللي قتلها حمل جثتها للسطح ورماها في – الفرضية الثانية ان إليسا ماتت منتحرة , وهي الفرضية اللي رجحت كفتها في النهاية خصوصا وأن تقرير الطبيب الشرعي ما أظهرش وجود أي آثار للعنف على الجثة . وساهم تاريخ إليسا الطبي في تقبل فرضية الانتحار ,لان فهي حسب سجلاتها الطبية كانت بتعاني بمرض نفسي اسمه الاختلال ثنائي القطب , وهو مرض نفسي بيتميز بفترات من الكئابة الشديدة وبيحصل خلالها نوبات من الابتهاج غير الطبيعي اللي ممكن يؤدي بالمريض انه يقوم بأعمال متهورة وخطيرة.

ركزوا معايا اوي فرضية الشرطة اللي بتقول ان إليسا لام انتحرت مكنتش مقنعة للناس حتي من المحققين نفسهم لأن في الفرضية دي عيوب وثغرات كتير ، فعلشان توصل لسطح الفندق كان على إليسا أنها تعدي باب مزود بجرس ونظام إنذار , وحتى لو افترضنا بأنها تجاوزت الباب ده من غير ما ينتبه لها اي حد فأن الوصول للخزانات بحد ذاته موضوع صعب جدا , لان الخزانات في مكان عالي جدا من السطح , بيتطلب التسلق في النزول والصعود , وفوق كله ده في قفل على غطا كل واحد من الخزانات الأربعة الضخمة ، والغريب انهم لما طلعوا علشان يشوفوا الخزانات في البداية كان الباب مقفول يبقي ازاي اليسا دخلت ؟؟ وفي حاجة كمان ، وهي إن الجثة كانت عارية وقت العثور عليها في الخزان , وملقوش أي ملابس بالقرب من الخزانات , فهل إليسا طلعت للسطح وهي عارية ؟ ملابسات القضية بتزيد غرابة واللغز مفيش حد قادر يحلة ، طيب ليه إليسا وهي طالبة جامعية بتدرس في الجامعة في كندا تروح لوحدها لمدينة لوس انجلوس الأمريكية , وليه اختارت فندق سيسيل بالذات ؟

فالفندق موجود قريب من أسوأ حي في المدينة ، اشمعني الفندق ده بالتحديد؟؟ . طيب انتوا اكيد دلوقتي محتارين ومش عارفين يا تري هي انتحرت ولا اتقتلت وكل فرضية من الاتنين في اسباب منطقيه بتنفيها طيب ازاي هي ماتت واترمت في المكان الغريب ده؟في افتراضية تالته الناس بدأت تتكلم عنها وهي ان سبب موت اليسا لام هي لعبه Elevator game لعبة الاسانسير ودخولها في البعد الاخر وان في اطراف من عالم الجن السفلي تدخل في مقتل اليسا ، وهنا نجي بقي عند مقطع فيديو سجلته إحدى كاميرات المراقبة بالفندق في الليلة اللي اختفت فيها إليسا الساعه 3 الفجر ، والفيديو ده خلي في علامات استفهام اكتر حول اختفائها وموتها , المقطع ده مدته أربع دقائق بيصور اللحظات الأخيرة في حياة إليسا لام , وفيه هنشوفها وهي بتدخل إلى أحد مصاعد الفندق وتبدأ بالضغط على أزراره لكنه لا يتحرك , و فجأة تبدأ بتصرفات غريبة جدا , كأنها بتحاول الاختباء من شخص خفي بيلاحقها من غير مانشوفه , وبعدين بنشوفها بتخرج وبتقف عند باب المصعد وبتقوم بحركات تثير الدهشة والاستغراب , وكأنها بتكلم حد لكننا مش شايفين غيرها , وفي الاخر بتبعد عن المصعد فيبدأ المصعد بالعمل من تلقاء نفسه بطريقة غامضة ومريبة .

بعد عرض الفيديو ده الخوف والرعب ملي قلوب الناس والمقطع خلي ناس كتيرتعتقد ان دي مش حادثة قتل عادية زي ما بتقول الشرطة ، وأن ورا موت إليس لام لغز كبير بيحاول حد إخفاءه وطمس خباياه وأسراره فالفتاة غالبا ماتت مقتولة , وبعض الناس بيربط بين موتها وبين أمور هي أبعد من إدراكنا احنا البشر , و بيقسم كتير من اللي شافوا المقطع على أنهم شعروا بالدم بيتجمد في عروقهم لما إليسا سابت المصعد ومشيت وباب المصعد فضل يفتح ويقفل من تلقاء نفسه ، وبيقول اللي شافوا الفيديو من الصحفيين والاعلاميين بأن المصعد شكله مكنش فاضي زي ماحنا متخيلين لكن كان فيه كائنات شرير وشيطانية داخله .

لو فكرنا بنفس فكر المحللين اللي قارنوا بين اللي حصل لآليسا في المصعد وبين لعبه Elevator game فهيكون السيناريو كالتالي : اليسا لام بنت من اصول اسيوية واحنا عارفين ان المنطقه دي من العالم ليهم معتقدات غريبه وتعامل مع المخلوقات السفليه من عشائر الجان والسحر الاسود وحتي الشباب المغامرين بيحبوا يخترقوا العالم الخفيه بدليل انتشار العاب السحر وتحضير الجان ومنها لعبه المصعد ، فمن المحتمل تكون اليسا بعد قرأه عن دخول البعد الاخر قررت خوض التجربة وانها اختارت الفندق ده بالذات بسبب سمعته بسكون الجان فيه بسبب عدد الناس اللي اتقتلت فيه وبسبب انه اعلي من 10 ادوار فجت من كندا للوس انجلوس وكانت طول الفترة بتحضر الطلاسم والتعاويز المطلوبه لدخول البعد الاخر وفي اليوم اللي حصلت فيها الحادثه قررت تبدأ اللعبه بالصعود في المصعد الساعة 3 الفجر واتباع قواعد اللعبه ولما وصلت للدور العاشر قدرت فعلا دخول البعد الاخر وقدرت تخترق عالم الجان والشياطين ولكن مقدرتش تتحكم بعد كدا انها تخرج تاني من اللعبه او من عالم الجان ووفقا لاضطراباتها النفسيه ممكن تكون عملت ردود فعل غلط اثناء وجودها بين عشائر الجن فده خلاهم يقتلوها بالشكل ده اللي مفيش حد من البشر قادر يلاقيله تفسير لحد النهاردة .

ودلوقتي تعالوا اقولكم تاريخ فندق سيسل الأسود . .كان الفندق الضخم ده مسرح لكتير من الأمور الشريرة والملعونة من اول أفتتاحه سنة 1927 ، كتير من نزلاءه ماتوا منتحرين لأسباب مجهولة , طاقة غريبة وقوه خفيه بتسيطر عليهم و يفتحوا نوافذ غرفهم ويرموا نفسهم وينزلوا ميتين في ابشع صوره .. زي مثلا هيلين جيرنياللي ماتت منتحرة بعد ما قفزت من نافذة غرفتها بالدور السابع سنة 1954 ، وجوليا مور اللي ماتت منتحرة بعد ماقفزت من حجرتها بالدور الثامن سنة 1962 و بولين اوتون اللي قفزت من نافذة حجرتها بالدور التاسع و سقطت فوق رأس رجل كان ماشي في الشارع فقتلته معها . .وحصل في فندق سيسل بعض الجرائم الغامضة زي جريمة إليزابيث شورت وكانت اشهر جريمة في تاريخ لوس أنجلوس , و إليزابيث شورت المعروفة بأسم الداليا السوداء واللي محدش عرف لحد النهارده مين اللي قاتلها ، وكانت الشرطة عثرت على جسدها متقطع قطع في مكان قريب من الفندق , وبحسب الشهود اللي شافوها أخر مرة وهي خارجة من واحده من غرف فندق سيسل .

فندق سيسل الملعون كان في يوم من الايام مسكن لبعض القتلة المتسلسلين اللي بيعتبروا اغرب وابشع سفاحين في تاريخ امريكا، وكان واحد منهم هو جاك انترويغر اللي اتولد في النمسا لأم عاهرة وأب مجهول الهوية وأرتكب اول جرايمه سنة 1974 لما خنق شابة ألمانية بحمالة صدرها لحد ما ماتت ، و توالت جرايمه فقتل 6 نساء خلال سنة واحده بس لحد ما تقبض عليه سنة 1976 وخد حكم بالسجن المؤبد و في السجن حصل تحول عجيب لجاك , وبدأ يكتب قصائد وأشعار ببراعة وموهبة كبيرة , وبقت الصحف الكبيره تنشر قصصه وقصائده , وواحده من القصص دي اتحولت لفيلم سينمائي ، وخرجت مظاهرات كبيرة بيقودها بعض أشهر مثقفين النمسا بتطالب بالعفو عنه وفعلا أطلقوا سراحه بدري سنة 1990 , و اتعاقدت معه صحيفة نمساوية مشهورة علشان يعملها تقرير عن الدعارة والجريمة في مدينة لوس انجلوس , فسافر للولايات المتحدة ونزل في فندق سيسل وبدأ في إعداد تقريره , فبقي يقابل رجال الشرطة , ويروح المناطق اللي فيها العاهرات . وفي الفترة دي الشرطة عرت على جثث 3 عاهرات اتقتلوا بأسلوب واحد ,وهو الضرب الشديد و الخنقن عن طريق حمالات الصدر , وبدأت الشكوك تتجه لجاك , لكنه هرب لما حاولت الشرطة القبض عليه في الفندق , ومتمسكش إلا بعد سنتين , وانتحر مشنوق بخيط حذاءه قبل تقديمه للمحاكمة. .القاتل المتسلسل الثاني الذي عرفه فندق سیسل هو السفاح الرهيب ريتشارد را میریز، الرجل اللي نشر الرعب في مدينة لوس انجلوس بشكل محصلش في تاريخ الخمسين ولايه فكان بيقتحم البيوت عشوائي ويغتصب النساء ويقطع اطراف ضحاياه ويخرج احشائهم بسكينة طويلة , وكان بيغتصب اي حد حتي العجائز , وفي إحدى المرات قام باغتصاب شقيقتين في الثمانينات من عمرهم وكانت واحده فيهم عمياء .

جرائم ريتشارد را میریز أفظع وأشنع من أني اذكرهالكم كلها هنا ، وكان راميريز نزيلا في غرفة على سطح فندق سیسل و كان من عبدة الشيطان و كانت جرائمة معظمها طقس من طقوس شيطانية سرية . .را میریز أثار الرعب حتي في نفوس القاضي والمحلفين في المحكمه ، وكان بيهدد بقتل كل اللي في المحكمة وحدث فعلا خلال الجلسات الأولى أن ماتت واحده من المحلفات مقتولة بالرصاص على ايد صديقها اللي انتحر هو كمان بعد ما قتلها والحادثة دي خلت أعضاء هيئة المحلفين يترعبوا من راميريز ظن منهم بأن له ايد في مقتل زميلتهم . . الأمور الفظيعة اللي حصلت في الفندق واللي انا حكيت علي جزء بسيط منها ، خلت بعض الناس تعتقد بأن الفندق مسكون وأن موت إليسا لام بالشكل الغامض والمريب ده مرتبط بشكل أو بآخر بحقيقة وجود جان في الفندق . . اللي هحكيه ده ممكن يكون اغرب جزء في القصة .

ففي سنة 2005 تم عرض فيلم رعب بعنوان ” المياه السوداء ” وقصة الفيلم بتحكي عن سيدة اسمها داليا بتنتقل مع بنتها سيسليا للسكن في شقة بعمارة يشرف عليها رجل اسمه مستر فيك ،و بعد فترة قصيرة من انتقالها يبدأ سقف الشقة يرشح ماء أسود ومن خلال البحث عن مصدر الماية السودا بتقدر داليا من الوصول لخزان الماية اللي علي سطح المبنى وتكتشف وجود جثة داخله لبنت اسمها نتاشا كان والديها سابوها ومشيوا وبقت عايشة لوحدها , وكان صاحب المبني على علم بوجود جثة البنت لكن معملش حاجة ، الفيلم ده اتعرض قبل موت إليسا لام ب 8 سنين , لكن في تشابه عجيب بين أحداث الفيلم وبعض تفاصيل القضية تصل لدرجة ترعب وتخلي عقلك ميبطلش تفكير، طيب ازاي كدا؟ , ففي الفيلم في جثة في ماية الخزان , وفي ماية سودا بتنزل لغرف وحمامات النزلاء ، والمحير اكتر هو أسماء أبطال الفيلم , فالبطلة الرئيسية أسمها داليا , وهو نفس الاسم اللي كان بيطلق على إليزابيث شورت اللي اتقتلت بصورة غامضة والقاتل قطع جسمها لقطع وكانت في فندق سيسل قبل اختفاءها ومقتلها والغريب اكتر هو أسم الابنة سیسلیا .

أنه تحريف بسيط لأسم فندق سيسل ، طبعا كل ده ممكن يكون صدفه .. لكن حصل حاجة اغرب من الخيال ، فبعد موت أليسا لام بفترة قصيرة تفشی وباء السل في حي سکید رو اللي فيه فندق سيسل , والوباء ده ادي لموت العشرات وإصابة الالاف و المدينة كلها بقت في حالة طوارئ .. تخيلوا ايه اسم الجرثومة المسببة للوباء ده ؟ أسمها لام إليسا ( LAM – ELISA ) , يعني نفس أسم إليسا لام ( Elisa Lam ) لكن بالعكس ! قضية إليسا لام أثارت جدل كبير وتم وضع فرضيات ونظريات كتير حاولت تفسير اللي حصل . زي مثلا ان إليسا لام كانت فتاة مريضة بتعاني من اضطرابات نفسية وعقلية , والفيديو في المصعد بيظهر اضطرابها وتوترها وعلشان كدا تفسير الشرطة لانتحارها هو الأقرب للمنطق وخاصتا ان مفيش اي دليل على تعرضها للعنف ، وممكن تكون إليسا لام اتقتلت على ايد حد من العاملين في الفندق و وده بيفسر ازاي جثتها وصلت للخزان من غير ما يدق جرس الإنذار اللي متوصل في باب السطح ، وممكن تكون اليسا كانت ممسوسة ودخلت عالم الجن المرعب ومقطع الفيديو في المصعد هو أكبر دليل على ده , لأنها في الحقيقة كانت بتتكلم مع كائنات غير مرئية , وان الكائن ده هو اللي وداها للخزان أعلى الفندق . . الافتراضية الاخيره ان مقتل اليسا لام كان جزءا من طقوس سرية متوحشة لعبدة الشيطان , تم استخدام السحر الأسود فيها, وده بيفسر كل الأحداث الغريبة المرتبطة بالقضية ، في النهاية كان في بنت عايشة معانا في العالم بتاعنا وقدرها او افعالها وصلوها انها تكون جثة عارية متحلله في خزان مايه علي بعض الاف الكيلومترات من اسرتها وبيتها .

المصادر :https://en.m.wikipedia.org/wiki/Death_of_Elisa_Lamhttps://allthatsinteresting.com/elisa-lam-deathhttps://www.cnn.com/…/california-hotel-water…/index.html

قصة حقيقية إعداد وكتابة الرائع أ / سيد فودة

قصص حقيقية أخرى أعدها الأستاذ سيد فودة

جزيرة الأفاعي ، لا يُسمح لوجود البشر بها
كاثرين ملكة الدم (18+)
الكندي تيم ماكلين “قصة حقيقية مرعبة”
لغز من ألغاز السفر عبر الزمن
واحد كان بيحب الأكل لدرجة انه كان بياكل أي حاجة كانت بتيجي قدامه حتي لو كانت قطه او كلب او حتي طفل صغير
إستعمال الكلاب في حرب الأتحاد السوفيتي مع هتلر
جورجي دوجا ملك علي الجمر
لغز سفاح أوكرانيا
حديقة الموت
التحنيط بتدخين الجثث في غينيا الجديدة
كيفين كارتر صاحب جائزة بولتزر للصورة مصور صورة طفلة السودان
عبود وزوجته خجاوة جزارين البشر في العراق
مغامر أمريكي في كهوف ولاية يوتا بالولايات المتحدة الأمريكية
الأبوريجينيز سكان استراليا الاصليين
الميثلوجيا اليونانية ” سرير بروكرست – Procrustean bed “
اطول كائن حي علي الكوكب أكتشفه العلماء حديثاً
إنقراض سمكة المجداف الصينية القادرة على البقاء على قيد الحياة لمدة 200 مليون سنة
قصة شعار شركة من اكبر شركات الانتاج السينمائي في الولايات المتحدة و في العالم
تعرف مزيداً على كوكاكولا أقدم مشروب صودا
هيوستن Houston أكبر مدن ولاية تكساس

Comments are closed.