نتعرف اليوم علي قصة اكتشاف البنج او مادة التخدير فقبل سنة ١٨٤٦ كان اي مريض يحتاج الي تدخل جراحي بيتم ضربه علي دماغه بحجر حتي يفقد الوعي او اجباره علي شرب كميه كبيره من الكحول حتي الثماله ثم يقوم عدد من الرجال الاشداء بتكتيفه ليقوم الجراح بالعمل وقتها وكان فيه مرضي كتير بيموتوا من شدة الألم رغم نجاح الجراحه نظريا.
اكتشاف البنج ( اكتشاف مادة التخدير ) :
لحد ماجه طبيب الأسنان الأمريكي وليام مورتون اثناء حضور احد المسرحيات الكوميديه ولاحظ ان الممثلين اللي كانوا بيستخدموا غاز النيتروز والمعروف بغاز الضحك قبل العرض لما له من تأثير رافع للمزاج العام ويسبب الضحك واحد منهم وهو بيجري علي المسرح اتجرحت قدمه وقعد ينزف وهو مستمر في التمثيل دون ان يشعر بأي الم وقتها .
بدأ وليام مورتون الربط بين غاز النيتروز وتسكين الألم وقرر يستخدمه وبعد ابحاث فضل عوضا عنه انه يستخدم غاز الاثير في التخدير وبالفعل قام مورتون زي النهاردة يوم ١٦ اكتوبر من ١٧٤ سنه في مستشفى ماسوت جوست بواشنطن بتخدير مريض يدعي جيلبرت ابوت للجراح الأمريكي جون وارين لاستئصال خراج تحت تأثير غاز الاثير لتكون اول جراحة يتم اجرائها تحت تأثير المخدر في التاريخ .
وفي نفس الوقت تقريبا كان الجراح الأمريكي ايضا كروفورد لونج بيستخدم نفس الغاز في عمليات الولاده والبتر ولكن في ولاية جورجيا عشان كده احنا النهاردة في يوم ١٦ اكتوبر من كل عام بنحتفل بما يسمي اليوم العالمي للتخدير فكل الشكر والحب لجميع الزملاء الأفاضل من أطباء التخدير اللي مفيش واحد علي كوكب الأرض تقريبا لا يدين لهم بالفضل في تسكين آلامه هو او احد اقاربه ولولاهم ما استطاع اي جراح اداء عمله في هدوء وبسلام تام ، شكرا لكل الزملاء وكل سنه وانتم طيبين واحنا منقدرش نعيش من غيركم و النهاردة بالذات مفيش ولا عيان شادد ولا بيتحرك ولا بيصحي والضغط مضبوط والقلب هادي وكله في السليم .
دكتور / Hany Mehany
Comments are closed.