Take a fresh look at your lifestyle.

قصة أشباح كوين ماري “سفينة الغموض المسكونة”

4٬485

تحذير : الحكاية فيها كلام عن الجان والعوالم السفلية وممكن تتعب نفسية بعضكم ، فاللي بيتأثر يوقف قرأة لحد هنا . .‏‎بس الكتيبة اللي مجهزة طقوس حكاية نص الليل من امبارح تشوف مكان هادي في البيت وتهدي الأضاءة علي الاخر و تركز معايا. .

مدمنين الأدرينالين ، اللي مجهزين طقوس حكاية نص الليل من امبارح ، شوفوا مكان هادي في البيت وهدوا الأضاءة علي الأخر وحاولوا تركزوا معايا علشان انا هخدكم معايا النهاردة لعالم غريب شوية . .يالا بينا . .

قصة سفينة الغموض والأشباح Queen Mary:

سنة 1936 اتبنت سفينة الكوين ماري وهي سفينة بريطانية وتعتبر من اكبر واضخم السفن في العالم لدرجة ان سفينه تايتانك لو وقفت جنبها هتبان صغيرة جدا ، وكان المفروض كوين ماري هي اللي تتسمي تايتانك لان تايتانك معناها ضخم او كبير جدا .

الكوين ماري كانت سفينة سريعة جدا وبتتميز بالفخامة والقوة ، كان فيها حمامين سباحة كبار و5 مطاعم كبار ويعتبروا من افخم المطاعم وفيها 300 غرفة ومكنش بيطلع عليها غير الاغنياء وعالية القوم والمشاهير ، واتسمت بالاسم ده نسبه للملكة ماري اوف تاك ملكة بريطانيا اللي حكمت من سنة 1910 لسنة 1936 .

ولما حصلت الحرب العالمية الثانية استخدموا سفينة كوين ماري لكن استخدامات عسكرية لنقل الجنود والأسري وكانت السفينة تقدر تنقل 800 الف جندي وأسير حرب !! متخيلين حجم السفينة ، حاجه زي مدينة كبيرة في البحر وعلشان كان لونها رمادي وكانت ضخمه بشكل مرعب كانوا بيسموها الشبح الرمادي The gray ghost.

السفينة وقفت ومبقتش تستخدم من سنة 1966 ولما وقفت عن العمل رجعت بريطانيا وبعد فترة اتباعت لميناء لونج بيتش في ولاية كاليفورنيا الأمريكية ، والسفينة راسية في كاليفورنيا لحد النهاردة وبتعتبر ارقي فندق ومتحف في لونج بيتش كاليفورنيا . .لكن . .بقي كل اللي يطلع السفينة سواء من طاقمها والعاملين عليها او من الزوار بقوا يشوفوا ويسمعوا حاجات غريبة ومرعبه وبعد مئات الحوادث بقي معروف في كل امريكا ويمكن في كل العالم ان السفينة دي هي اكتر سفينة مسكونه بالجان والاشباح علي كوكب الارض. .

في اكتر من 50 مليون زائر راح السفينه اللي بقت متحف وفندق علشان يشوفوا السفينه اللي كل الدنيا بتتكلم عنها ويتفرجوا علي كل ركن فيها والسفينه لحد النهارده كل حاجه فيها هي اللي كانت موحوده فيها لما كانت شغاله من 90 سنه يعني لو حد راح هيلاقي الممرات القديمه بالاضاءه الصفرا اللي كانت موجوده ونفس الغرف بنفس الاثاث اللي فيها والمطبخ وحتي الشوك والمعالق وادات المطبخ ، اوقات في ناس بتحب تبات في غرف معينه في السفينه لكن كلهم بلا استثناء بيخرجوا مزعورين من اللي بيشوفوه ويسمعوه . .

طيب ليه السفينه مليانه بالجان والشياطين والارواح اللي بتتحرك دايما فيها ؟ يمكن علشان تاريخ السفينة الدموي والاحداث الوحشية اللي كانت بتحصل عليها من جرائم قتل وموت في حوادث وعمليات القتل اللي حصلت ايام الحرب العالمية التانيه اللي السفينه شاركت فيها ، فالسفينة اتقتل عليها عدد كبير جدا في حوادث مختلفة وكان منهم اللي جثثهم فضلت لفترات طويله قبل ما يكتشفوها ، وده سبب كافي يخلي ارواح الناس اللي اتقتلت تفضل علي السفينة ،. .وكان من الاماكن اللي الناس بتشوف فيها حاجات مخيفه وتسمع اصوات مرعبه هي غرفة المحركات وكانت مكان كئيب ومرعب وكل الناس حتي اللي بيشتغلوا في السفينه بتخاف تقرب من المكان ده وبالذات عند البوابه رقم 13 لان عند البوابه دي بالذات حصلت حادثة بشعة ، بس قبل ما احكيلكم عن الحادثة خليني اقولكم الابواب اللي بتكون في غرف التحكم وغرف المحركات بتقفل ازاي ، الابواب بتكون حديد وسمكها كبير جدا وحجمها ضخم وبتنزل من فوق لتحت لما بتقفل بنظام هيدروليك اتوماتيك ، وبمجرد ضغط زرار الباب بياخد امر ويبدأ ينزل الباب او يطلع علشان يفتح ، فا في يوم كان في شاب صغير اسمه چون عنده 17 سنة بيشتغل علي السفينه وكان في تدريب علي اخلاء الحريق وده بيحصل دايماً علشان يدربوا العاملين علي التعامل في حالة الحرائق ، وفي التدريب كان فاضل 60 ثانية بس والابواب تقفل لكن چون قال لزمايله في التدريب انا هعدي من الباب في اخر 5 ثواني وكان بيضحك وواخد الموضوع بتحدي وهزار وفعلا قبل الباب ما يقفل ب 5 ثواني جري بسرعة وعدي من الباب لكن. .

أشباح كوين ماري

كان نص جسمه بس اللي عدي ونزل الباب عليه وقسمه نصين في مشهد من ابشع المشاهد اللي عديت علي زمايله اللي كانوا واقفين وشافوا الحادثة . . فأغلب المغامرين اللي بيروحوا السفينه علشان يقابلوا الاشباح بيروحوا غرفة المحركات وكل حاجه هناك زي ما هي مفيش اي حاجه اتغيرت ، في ناس راحت وحكت عن اللي بيحصلهم تحت في غرفه المحركات عند البوابه رقم 13 ، يعني مثلا واحد يوتيوبر امريكي راح هناك وكان بيقسم انه بعد ما دخل الغرفه ووقف عند نفس المكان اللي اتقسم فيه چون نصين بسبب الباب سمع صوخات واحد بيطلب المساعده وبيقول انه في اللحظة دي حس ان شعر راسه كله وقف من الرعب وحاول يطلع يحري ويلحق بالمجموعه اللي كانت معاه لكن حد حط ايده علي كتفه وكان بيبص حواليه زي المجنون ومفيش حد غيره والصرخات مستمره ولما طلع فوق فضل يزعق بجنون لاداره السفينه وكان معتقد انهم عاملين الخدعه دي يعني زي فقرة كدا في السفينه لكن الاداره اقسموله ان مفيش اي خدعه في الموضوع وان ناس كتير حصلها كدا لما نزلت وبالذات لما بتكون لوحدها . .

وفي ناس كاتبه انهم حسوا بحد بيتكلم جنب ودنهم في نفس المكان وناس كتير كانت بتسمع كلمه help بصوت شخص بيتعذب من الالم وناس تانيه شافت شبح چون بيتحرك وكانوا بيقسموا انهم فعلا شافوه ومش تخيلات . . لكن كانت ابشع حادثة لما كان في مجموعة شباب في زيارة للسفينة في كاليفورنيا ونزلوا لغرفة المحركات وكان معاهم بنت مش مصدقة كل الكلام ده وكانت بتضحك علي اصحابها علشان خايفين وكانت بتتكلم بتحدي وبتقول لو شبح جون موجود ، انا عايزاك تطلع واشوفك هتعمل ايه فينا!! وانا بتحداك وفضلت كدا اكتر من 10 دقايق وفجأة صرخت صرخة مرعبه لانها حست بحد شد شعرها بقوة وفي الوقت ده مكنش في حد واقف وراها ورجع قالت اكيد دي تهيئات علشان تثبت لنفسها انها صح لكن بعد ما خرجوا من غرفه المحركات البنت وقع عليها قطعة ديكور كانت علي الحيطة عبارة عن بلطة كبيرة بتستخدم للطوارئ وقطعت كف رجليها كله ومحدش عارف لحد النهارده ازاي ده حصل وازاي البلطه وقعت من مكانها اللي هي فيه من عشرات السنين ، البنت بتحكي انها لحد النهارده وبعد مرور اكتر من 7 سنين علي الحادثة بتحلم بكوابيس ومعظمها بيكون فيها شبح چون . .

من الاماكن المرعبه واللي بيحصل فيه اكتر الحوادث هو الدور B وفي الدور ده حصل حوادث بشعه ومن اشهرها حادثة اب قتل كل اسرته بدون معرفه السبب ، كان طبيعي جدا وبدأ يحس بحاجه في عقلة بتقوله اقتل اسرتك وقبل الحادثة كان بدأ يشتكي من الصوت اللي بيجي في عقله وحكي لزوجته وكانت زوجته حكت لاختها اللي معاها هي واسرتها علي السفينه ، وكانوا اتفقوا انه هيروح لدكتور اول ما السفينه ترجع للميناء ويرجعوا بلدهم لكن للاسف ملحقوش ، لانه في يوم دخل الغرفه دبح زوجته وبعد ما خنقها دبح ابنه الصغير والظاهر ان بنته كانت مستخبية في الحمام ولما لقاها دبحها في الحمام وقتل نفسه ، ومفيش حد عارف هو ليه عمل كدا ، وللاسف الجثث فضلت فتره لحد ما اخت الام القتيله قلقت عليها بعد يومين وكسروا الباب ىشافوا المشهد المروع . .

المقتوله
دي صورة البنت اللي ابوها قتلها في الحمام ودي شبحها بيظهر دايما للزوار

وعلشان كدا الناس بتسمع صوت بكاء اطفال في الدور B وبالذات لما بتمر من قدام الغرفه اللي حصل فيها الجريمه ، واوقات الناس بتسمع ضحك اطفال لكن بيقولوا اصوات الضحك بتكون مرعبة اكتر من اصوات البكاء ، وناس شافت شبح البنت ولما شافوا صورتها قالوا هي دي اللي بنشوفها ، وانا هحطلكم صورتها تحت . .البنت بتظهر دايماً في نهاية الممرات في السفينة وخاصتا لما يكون الاضاءة بسيطة فبتقدر تشوفها بوضوح بسيط لكن الكل اجمع علي الرعب اللي بيحصلهم بسبب شكل عنيها . . الغرفة دي من كتر المشاكل والرعب اللي سببته لزوار السفينه وحالات الاغماء اللي بالمئات ، قررت اداره السفينه انها تقفلها تماماً لان الاداره عرفت ان في اكتر من 11 شخص كان دخل الغرفه من الزوار وماتوا في حوادث مختلفه بعد زيارتهم للسفينه بشهور قليلة . .

في مكان تاني بيحصل فيه ظواهر مخيفه وهو حمام السباحه اللي كان خاص بالدرجة التانيه ، وهناك في شبح بنت صغيرة اسمها چاكي ، طيب ازاي عرفوا ان اسمها چاكي ؟؟ لان في تاريخ السفينه كان في بنت صغيره غرقت في حمام السباحه ده وكانوا بيحكوا انها كانت بعد ما خرجوها من المايه كانت ملامح وشها مرعبه زي ما تكون شافت حاجة قبل ماتموت وبعد موت جاكي كان كل اللي في حمام السباحة بيقول انهم بيشوفوها ولحد النهارده هي بتظهر لبعض الناس واصوات ضحكها موجود وناس سمعته والغريب جدا ان بعد الناس اللي بتكون بتصور السفينه وبالذات عند حمام السباحة بعد فتره بيشوفوا صوره بنت صغيرة في الصور ، وفي ناس بتقول انها شافت اثار اقدام لبنت صغيرة علي الارض مع ان حمام السباحة فاضي دلوقتي ، وطاقم السفينه في احد اللقاءات التلفزيونيه قالوا ان كل الناس او معظمهم اللي نزلوا تحت عند حمام السباحة شافوا وسمعوا چاكي واللي صوروا ظهر لهم صورتها وانا هحطهالكم تحت في الصور . .

كوين
أشباح الظلام

اما بقي عند حمام السباحة بتاع الدرجة الاولي فكانت غرقت هناك ست في التلاتينات وبتظهر للناس اوقات وبيعرفوا ان دي شبح بسبب ظهورها واختفائها السريع والمايو القديم اللي لابساه و ناس بتسمع ضحكاتها اللي بتعمل صدي صوت عالي في حمام السباحة لكن مش بيشوفوها ، وفي ناس قالت ان في حد بيلمسهم وبيتنفس قريب من وشوشهم في حمام السباحة. . نيجي بقي للغرفة B340 وهي من اخطر الاماكن علي السفينة والكل بيرفض دخولها لوحدهم حتي طاقم السفينة وكل اللي عدي من جنبها كان بيسمع صريخ وخبط وصوت السراير بتتهز بقوة ولحد النهاردة الاضواء بتفتح وتقفل لوحدها ، الموضوع مرعب لدرجة أن الغرفة دي اتوقف تنضيفها من 25 سنة ، الغرفة دي كانت بتستخدم ايام الحرب في العزل ، لما يكون في شخص مريض بمرض معدي او مميت بيعزلوه فيها وعلي باب الغرفة في قايمة كبيره باسماء الناس اللي ماتو فيها ، وفي غير قايمة الاسماء العامة موجود لوحات باسم كل شخص وكان جاي منين ورايح فين وسبب الموت وكل تفاصيل عنه ، الغرفه مرعبه بشكل بشع . .والمخيف ان في ناس كتير كانت بتصور فيديو عند الغرفه من برا لانها مقفوله بالزجاج ولما بتروح بيتهم وبيتفرجوا علي الفيديو بيشوفوا حاجات غريبه وبيسمعوا اصوات مرعبه مكنتش موجوده في وقت التسجيل . .

وموضوع التسجيل حصل برضو في المطبخ ، وده من الاماكن المخيفة ولما دورت عن السبب لاقيت ان كان في طباخ ايام الحرب العالمية الثانية عمل مشكله من واحد من الجنود والموضوع اتطور لعراك بالايد والامر انتهي بتقطيع الطباخ لقطع بالسكاكين والسواطير بوحشية علي ايد الجنود . .وبصفة عامه في كل السفينه فالأثاث بيتحرك بشكل مريب وده اتسجل في فيديوهات ومحدش لاقي تفسير لده غير ان الاشباح والجان اللي في المكان هو اللي بيحركه ، وهتفضل سفينة الملكة ماري لغز من الغاز الدنيا اللي مفيش حد لاقيله تفسير وهتفضل من اكثر الاماكن رعب في العالم زي جزيرة الدمي في المكسيك اللي اتكلمت عنها قبل كدا ، واللي مشافهاش اللينك اهو

Comments are closed.