غابة هوبا باكيو المسكونة برومانيا

By Ahmed Hussien Last updated ديسمبر 16, 2021

تحذير: هنحكي عن مكان مرعب واحداث مفزعة وممكن بعضكم يخاف ونفسيته تتأثر ، فاللي مش هيقدر وقلبه مبيتحملش القصص المرعبة يكمل لف علي الفيس بوك او يدخل ينام ..لكن كتيبة ال Heartless تجيب مج النسكافية وتيجي تسمع حكاية المكان اللي راعب اوروبا كلها ..

الغابات المتعارف عليها بتكون عبارة عن مكان فيه شجر اخضر جميل وطيور صوتها حلو وانواع نباتات ومناظر جميله وبتكون عالم ساحر وخلاب ، لكن الغابة اللي بنتكلم عنها مختلفة ، هي عبارة عن متاهة مظلمة ومخيفة ، اللي بيدخل فيها بيضيع وسط بحور من الاشجار والنباتات المخيفة .

غابة هويا باكيو طول الوقت بيتحرك فيها كائنات خفية وبيطير في سماها أجسام مجهولة ! وتحت ظل أشجارها بتسرح اشباح هائمة لتعزف لكم الحانا مرعبة تقشعر لها الأبدان … غابة هويا باكيو من الغابات اللي دارت حولها كتير من القصص الغريبة والغامضة والمرعبة طيب خليني في الاول اقولكم مكانها بالظبط ..‏

مكانها في اقليم ترانسلفانيا في دولة رومانيا ، الموطن الحقيقي لاسطورة دراكولا ، واللي خلي غابة هويا باكيو مختلفة عن اي مكان تاني القصص الغامضة والمخيفة اللي الناس بتحكيها عنها . كانت في البداية غابة زي اي غابة عادية ، وكان سكانها الأصليين عاييشين بكل امان و استقرار .

لحد سنة 1960 وبدأ تحصل احداث و ظواهر غامضة واصوات مرعبة بتتسمع في مكان فيها.. وبالتدريج الامور بقت اصعب والحوادث بتكتر لحد ما بقي العيش فيها مستحيل فقرر سكان الغابة انهم يهجروها ويمشوا .. ومن الوقت ده سمعة الغابة بقت سيئة جدا واتقال عليها كلام واشاعات مرعبة ومخيفة كتير .

تعالوا احكيلكم شوية من الظواهر والاحداث الغامضة و المرعبة اللي خلت من الغابة لغزا كبيرا و بقي اشهر مكان مسكون في رومانيا .. وبقي السكان يطلعوه عليها اسماء مختلفة .. زي غابة الذعر .. و مثلث برمودا اليابسة بسبب ابتلاعها لاي حد يدخلها..

ايه سبب تسمية الغابة غابة هويا باكيو ؟

اللي بيتقال من اهل رومانيا وسكان المناطق المحيطة أن الغابة اتسمت علي اسم راعي اسمه هويا دخل فيها هو وقطيع من الغنم من سنين واختفى هو والقطيع ومظهرش لحد النهاردة .

بعض السكان المحلييين اللي عايشين قريب من غابة هوي بيقولوا :” بمجرد دخولك الغابة المخيفة ، هتحس ان قلبك بيدق بسرعه جدا وهيبدأ الرعب يدخل قلبك بالتدريج ولا اراديا هتتلفت حوليك طول الوقت من كتر احساسك ان في حد بيراقبك وقريب منك لحد ما عقلك يعجز عن التفكير ” ..

دايما فيها أصوات غريبة بتطلع من مكان مجهول في الغابة ، أصوات مرعبة .. اوقات بيظهر صراخ امراة بصوت عالي جدا مصدره مجهول ، واوقات تانية اصوات اطفال بيلعبوا و نساء بتضحك .. ومهما دخلت في اعماق الغابة وبحثت عن مصدر الصوت مش هتلاقي مصدر ، وهتحس دايما ان في حد ماشي وراك ، واوقات بيتسمع صراخ عالي لشخص زي ما يكون بيطلب مساعده حد وبرضو محدش عارف مصدر الصوت .

هصدمك واقولك ان الاصوات المرعبه اللي بحكيلك عنها دي مش بتيجي لوحدها دي بيكون معاها ضباب غريب بينزل فجأة في الغابة فيزيد الجو غموضا ورعب . .مش عايزكم تخافوا احنا لسه في اول الحكاية ، اجمدوا كدا .

في قصص كتير عن زوار الغابة اللي دخلوا فيها ومخرجوش تاني وفِي بعض الاوقات بيعثر على جثثهم منتشرة في انحاء مختلفة من الغابة بعد مرور سنين على اختفائهم ، وده بيحصل منغير وجود أي علامات تدل علي تعرضهم للقتل ، بس في بعض الناس اللي دخلوا الغابة وكان حظهم حلو و نجحوا في الخروج منها لكن برضو بيخرجوا متغيرين وبتكون لعنه الغابة اصابتهم وبيعانوا من طفح جلدي وحروق على اجسادهم .. وفقدان ذاكرة !ايوه فقدان ذاكره .. مبيقدروش يفتكروا اي حاجه حصلتلهم ولا كانوا فين كل الوقت ده .شئ مخيف. . .

ومن اشهر الحوادث كان اختفاء طفلة عندها 5 سنين بشكل مفاجئ . اهلها بحثوا عنها كتير ودوروا في كل مكان من الغابة لكن ملقوش ليها اي اثر و بعد سنوات يأسوا وفقدوا الأمل في انهم ممكن يلاقوها واعلنوا عن وفات الطفلة ..لكن . . حصلت مفجأة وهي ان الطفلة ظهرت تاني بعد 5 سنين .. لكن كانت ناسية كانت فين كل السنين دي .

نيجي بقي عند الجزء اللي يخص فلاد دراکولا . .دراکولا واحد من أهم معالم رومانيا و اشهر طغاتها في الماضي وكان سبب شهرته هي رواية ” دراكولا ” مصاص الدماء اللي كاتبها الكاتب برام ستوكر ، لكن دراكولا الحقيقي مكنش مصاص دماء بالمعنى الحرفي للكلمة ، لكن كان عاشق للدم والقتل وكان بيعذب ضحاياه وكان بيتلذذ بذبحهم وتقطيعهم .

لكن الجزء الاكثر رعبا في قصته فهي طريقته في التمثيل بجثث ضحاياه .. فكان متعود انه يضعهم على (خوازيق )وهي علي شكل مخروطي طويل معدن مسنن من فوق وكان بيقعد الضحيه عليه ويبدأ جسم الضحيه بكل وزنه ينزل ببطئ خلال ايام فيدخل بطنه لحد ما يطلع الخازوق من راسه ، وبعدين بيسيب جثثهم معلقة علي الخازوق لبث الرعب في قلوب اعدائه ، متهيئلي انتوا متخيلين العذاب كان عامل ازاي .. وكان موت دراكولا غامض فالعثمانيين قتلوه وقطعوا رأسه ، لكن محدش يعرف جسدة ادفن فين .. و بعض الاساطير بتقول أنه ادفن سراً في غابة هويا باكيو المنحوسة .. وان روحه الشريرة الملعونة لسه بتتجول في اركان الغابة بالذات في الليل و في الليالي الممطرة ..

والحقيقة ان مش روح دراكولا بس اللي كانت بتتحرك في الغابة ده كمان ارواح الفلاحين اللي رفضوا أوامر النبلاء الرومانيون في انهم ينضموا للحملات الصليبية ورفضوا انهم يروحوا الحرب فاتقتلوا واتقطعت اجسادهم بعد معركة سريعة راح ضحيتها الآلاف من الفلاحين الفقراء المتمردون اللي اتقتلوا بطرق بشعة .. واتحولوا لأشباح بتتحرك في غابة هويا .. والمكان اللي بيتواجد فيها أرواحهم بتجيب معها الضباب الكثيف وبتظهر بالنهار على عكس باقي الاشباح اللي بتظهر بليل .. وعندها عيون حادة لونها أزرق .

طبعا ده علي حسب كلام السكان المحليين اللي ساكنين في مناطق قريبة من للغابة . اسمعوا قصة شبح العروس اللي دخلت الغابة واختفت .كانت في بنت خارجه وبتتمشي مع خطيبها عند حدود الغابة المسكونة ، و في اثناء ماكانوا ماشيين سابت خطيبها فجأة ومشيت في اتجاه الغابة الكثيفة ودخلت في اعماقها .. حاول خطيبها انه يلحقها لكنها اختفت بسرعه في ظلمة الغابة وضاعت وضاع اي اثر لها .الحكومه الرومانية بعتت فرق بحث علشان يدوروا عليها …

لكن كل ده منغير فايدة ، محدش لاقاها ابدا ! فقامت عيلتها و خطيبها بعمل نصب تذكاري لها قريب من المكان اللي اختفت فيه و ده تخليدا لذكراها ، ويقال بأن شبح الفتاة لسه لحد النهارده بيتحرك في الغابة وفِي ناس كتير قالوا انهم شافوها لابسة فستان زفاف أبيض وبتنادي عن خاطبها .. علشان كدا السكان الأصليين طلعوا عليها أسم شبح ” العروسة .. والغريب انها بتظهر للنساء فقط .. لكن هي مش شبح شرير بلعكس كانت بتظهر المحبة و الود لزوار الغابة و بتشاور للاطفال و بتضحكلهم ، عفريته بنت حلال اوي : )اسمعوا بقي اللي اغرب من كدا في الغاية . .

في قلب الغابة موجود دايرة غريبة وغامضة (هتلاقوا صورتها تحت) وهي عبارة عن مساحة دائرية في وسط الغابة خالية من أي اشجار او نباتات و الأكثر غرابة ان الاشخاص اللي بيحاولوا يمشوا في المساحة الخالية دي او حتي قريب منها بيعانوا من مشاعر الخوف والرعب وكمان عدم تذكرهم للمدة اللي قضوها هناك .. و في ناس بتقول انهم شافوا اطباق طائرة بتحوم في سماء الغابة .. وبالتحديد فوق المنطقة دي اضواء غريبة بتصدر منها ، المساحة الخالية دي بقت محور اهتمام و فضول الاشخاص اللي بيهاموا بدراسة الظواهر الغامضة و خدت شهرة كبيرة بينهم . ..

بعض الفرق العلمية اخذت عينات من تربة المساحة الخالية علشان يعرفوا سبب عدم نمو الأشجار فيها لكن جميع النتائج طلعت طبيعية ، وده زود اللغز تعقيد ، وده خلي الناس تتكلم أكثر عن موضوع الاطباق الطائرة ، وبعض السكان قالوا أن المنطقة دي مهبط للمركبات الفضائية وكانت أولى مشاهدات للاطباق الطائرة سنة 1968 واللي كان شافها العسكري الروماني اميل بارنيا .

و بمرور السنين زادت اعداد مشاهدات المركبات الطائرة بتطير فوق الغابة ، و كانت اخر مشاهدة سنة 2002 لما صور اتنين من السكان مقطع فيديو مدته 27 ثانية يظهر فيه جسم مجهول على هيئة سيجار وطوله تقريبا خمسين مترا ، وكان بيطير لفوق وبعدين يتجه ناحية سحابة رمادية اللون ويختفي ، ومفيش حد عارف لحد دلوقتي ايه تفسير الشيء ده .

في علامات استفهام كتير حول الأمور الغامضة اللي بتحصل داخل وفوق غابة هويا باكيو ، ففي اراء بتقول انها روح الكونت فلاد دراكولا الغاضبة ، و اراء تانية بتقول انها ارواح تايهه ومش عارفه طريق للراحه الابدية أو مركبات فضائية محدش عارف هي بتعمل ايه في المنطقه دي . الله وحده اعلم .

غابة هوبا باكيو المسكونة برومانيا 5 — غابة هوبا باكيو المسكونة برومانيا

كاتب المقال :-

Sayed Fouda

قصص حقيقية أخرى أعدها الأستاذ سيد فودة