علاج ارتجاع المرئ

بسم الله الرحمن الرحيم متابعي موقع البريمو الغاليين مقال اليوم عن إرتجاع المرئ وطرق علاجه فعلاج ارتجاع المرئ عمره ما كان أدوية وفقط !!! بدليل إنك بتلاقي مرضى كتير جداً أخدوا أدوية كتير ولفوا على دكاترة كتير وبرضو مفيش فايدة ! ، نفس الشكوى أو بتخف وترجع أو تختفي قليلا وترجع تاني أو مستمرة على طووول !!

طيب فين المشكلة ؟! وإيه الحل القاطع ؟! وهل ده مرض مزمن ملوش علاج ؟! ولا بيتعالج عادي والمريض بيخف منه ؟!

أقول لحضراتكم بالنسبة للدكاتره:

أولا وأهم حاجة : لازم نسمع المريض كويس جداً علشان نعرف منه التاريخ المرضي ، ومدة الأعراض ، و إيه إللي بيزودها و إيه إللي بيخففها ….. إلخ وإيه أدوية الارتجاع إللي أخدها ؟

ولازم نعرف وزنه ، ونظام أكله ، ونومه ، وطبيعة عمله ونمط حياته ، وأحواله النفسية والإجتماعية …. إلخ.
والتدخين والمسكنات والمخدرات والمهدئات ، وأدوية الضغط والقلب والسكر …….. إلخ.

ونفحصه كويس جداً بالموجات الصوتية ،هتقولي إيه علاقتها بارتجاع المرئ ؟! هقولك حاجات كتير ( نعرف منها اخبار المرارة إيه ؟ والكبد الدهني , وبطن المريض بصفة عامة …. إلخ )

وبعدين ممكن نحتاج نعمل منظار تشخيصي ،
علشان نشخص صح إذا كان ده ارتجاع مرئ فعلاً ، ولا مرض آخر زي : القلب ، الرئتين ، إلتهاب عضلات وأعصاب القفص الصدري !

ولو أعراض ارتجاع مرئ ، هل سببه :

_ ارتجاع المرئ ( GERD)
_ ‏ ولا فتق الحجاب الحاجز ( Hiatus hernia )
_ ولا اتساع فتحة الفؤاد ( incompetent cardia )
_ ولا انقباض المرئ نفسه ( diffuse esophageal spasm) ولا ……. إلخ.

وبعدين نحدد هل ده ارتجاع مرئ من فترة قريبة ولا مزمن ولا عنيد ( Refractory GERD) وهل مصحوب بزيادة حامض المعدة ولا هي طبيعية والمريض معندوش حموضة ولا حاجة .

وبناءا على كل ما سبق :

لازم أهم حاجة نركز على ( تغيير نمط حياة المريض) ، ودي أهم نقطة في العلاج ومن غيرها المريض مش هيخف لو لف على كل الدكاترة !!!
وبعدين هنقرر الموضوع هيمشي (علاج دوائي) ومتابعة فقط ( وطبعاً ده في الغالب ) ، ولا هنضطر نلجأ للجراحة ( في حالات نادرة جداً ).

وبعدين نقرر نكتب بعض الأدوية الخاصة ب مثبطات الحموضة وتنظيم حركية الجهاز الهضمي ، وربما باسطات العضلات والمهدئات !!
ونتابع المريض ، ونصبر على العلاج .
وممكن نزود جرعات الأدوية ، وممكن نغيرها ! حتى يتم الشفاء التام بإذن الله.

وقبل ذلك كله بقول للمريض :

ما أنزل الله من داء إلا أنزل له دواء علمه من علمه وجهله من جهله.
فعليك بالاستعانة بالله ، والأخذ بالأسباب الطبية المعتبرة
مع كثرة الدعاء والاستغفار والصدقة .
يحدث الشفاء بإذن رب الأرض والسماء.

ملحوظة : لا يتم العلاج إطلاقا عن طريق الفيس أو التليفون أو الواتساب للأسباب السابقة ، ومواعيد عملي الحكومية والخاصة معلنة للجميع على صفحتي الشخصيه.

مع تمنياتي للجميع بدوام الصحة والعافية نقلا عن د.السيد إمام _ المعهد القومي للكبد بالقاهرة