Take a fresh look at your lifestyle.

طريقة عمل عجينة الصيد في النيل “مكعبات العيش”

358

طريقة الصيد في النيل حداف بمكعبات العيش وعن تجربه

طريقة عمل عجينة الصيد في النيل:

بتروح الفرن وتوصي الخباز بتاع الفرن انه يطلعلك عيش نص سوي وقبل ما بيحطه علي السير بتاع الفرن بيحط رده كتير علي السير مكان ما هيحط العيش وبيجيب كل رغيفين من علي الطاوله يحطهم علي بعض من غير ما يفرد العيش.

نيلي
سمك نيلي

وبعد كده بيحطهم علي الرده اللي حطها علي السير وأهم حاجه ان الخباز بيقلل نسبة النار وبيهدي السير وأول ما يطلع العيش بتديله نسبة تهويه لا تتعدي دقيقه واحده وبترص العيش كله علي بعض وبلفه في قماشه وبعدها بتحطه في كيس بلاستيك وتقفل عليه كويس وده بنسميه (عيش سمك) .

وأول ما توصل علي الدور اللي هتصطاد من عليه بتكون مجهز زجاجه مياه لتر مثلاً بتكون مجهزها من بالليل في قلبها دقيق وزيت التوم اللي بيجي من عند العطار وبتكون ضايفهم علي بعض وحاططهم في الزجاجه وبتكون نسبة السيوله بتاعتهم زي نسبة سيوله زيت الطعام لما تيجي تصبه من الزجاجه وبتزفر طبعاً بيهم كويس ثم بتطلع رغيف واحد من عيش السمك وتقطعه قطع صغيره جداً وتزفر بيه كمان معاهم.

العدة المستخدمة للصيد بمكعبات العيش:

عود جبر محترم طوله لا يقل عن 4.20 مترمكنه قويه للترقيد علي التقايل يبدأ مقاسها من 4000 وانت طالع.

الخيط المستخدم:

خيط أساسي لو خيط بريد هيبقي أفضل حاجه مقاس 50 علي المكنه ويكون براند مش شعبي ولو نايلون من العادي أقل حاجه أساسي من 60 لـ 70خيط الرمال.

لو هتحط بريد للرمال خليه مقاس 25 أو 30 ولو نايلون أقل مقاس 40 السن المستخدم سن من 5 أو 6 عدل مش ملوي

طريقة التطعيم:

بتقطع العيش نظام المكعبات الصغيره بمقاس الـ 1 سنتيمتر أو بزياده 2 ملي (1.2) وبتدككه في السن وبتدكك من 4 لـ 5 قطع في السن وتيجي لآخر قطعة عيش في السن بعد ما بتدككها بتعكسها في السن علشان تغطي السن وطبعاً الرمال وش واحد وطوله لا يقل عن متر ولا يزيد عن متر وربع وفوقه المدور وفوق المدور رصاصه حره مقاس 4 أو 5 حسب تيار وسرعة المياه.

وأهم حاجه انك متسبش العود من ايدك ولو عاوز تسيبه من ايدك فلازم تكون رابط العود في أي حاجه علي الدور علشان ميطيرش منك في الميه مع ضربة السمكه.

السمك المستهدف اللي ممكن تصطادة بالطريقة دي:

سمكة البني – المبروكه – البياض – اللبيس وقليل ما يدخل عليه القرموط

وأخيراً ادعولي بتمام الشفاء وربنا يرزق الجميع ويديم صيدكم يارب بكل خير نقلا عن / شريف البنهاوي

Comments are closed.