حكاية حقيقية لدجاجة عاشت بدون رأس

By Ahmed Hussien Last updated يناير 24, 2022

لو قولتلكم ان في دجاجه ممكن نقطع راسها وتفضل عايشة هتصدقوني؟
لا؟
طيب سيبوا اللي بتعملوه وتعالوا اسمعوا . .

سنة 1945 في مزرعة من مزارع فرويتا بولاية كلورادو الأمريكية، كان في راجل اسمه ليود وزوجته كلارا بيشتغلوا في مزرعتهم الصغيرة علشان يكسبوا من دبح الدجاج وبيعة في السوق . .

وكان “ليود” مسؤل عن دبح الدجاج و الزوجة “كلارا” هي اللي بتنضف الدجاج بعد دبحه .
لحد دلوقتي الاحداث لطيفة والدنيا ماشية تمام .

في مرة كان ليود بيدبح دجاجه لكن حصلت حاجة غريبة اوي .
فلما كان “ليود” بيدبح الدجاجة وبيقطع رأسها، اتفاجئ انها مماتتش وفضلت تجري والدم بينزل منها وراسها مفصوله عن جسمها ، وده خلي ليود وزوجته يستغربوا جدا من اللي حصل ، فاقرروا يحطوها في قفص في فترة الليل.

بس الغريبة انهم لما صحيوا من النوم في اليوم التاني لقوا الدجاجة واقفه بدون رأس ولسه عايشة، فبقول مش مصدقين عنيهم وهيتجننوا من اللي بيحصل.
ازاي منغير راس وعايشة!!

طبعا الحج “ليود” مفوتش الفرصة اللي زي السكر دي وقال لما اعمل اي فلوس من ورا الحوار العجيب ده.
فكان بياخد معاه الدجاجة المفصول رأسها عن جسمها دي للأسواق وبيراهن عليها علشان يوري الناس ان دجاجة راسها مقطوعة بس لسة عايشة، وكسب “ليود” فلوس كتير اوي من الموضوع ده.

بعد كدا جاتله عروض كتير اوي انه ياخد الدجاجه معاه في جولات استعراضية ، وفعلا عمل كدا وكسب فلوس اكتر والموضوع احلو اوي .

و كبر مزرعته واشتري معدات حديثة، وسمي “ليود” وزوجته إسم طمايك” على الدجاجة، وبقت اشهر دجاجه علي وجه الارض عايشة منغير راس .
انا طبعا عارف انتوا دلوقتوا بتفكروا في ايه
هي كانت ازاي بتاكل منغير راس!!

علي العموم مش انتوا بس اللي مستغربين وبتسألوا السؤال ده كان كل الناس عايزين يعرفوا ازاي الدجاجة قادرة تعيش بدون رأس، وازاي قدرت تصمد كل المدة دي ، هي مكنش عندها المنقار اللي بتاكل بيه والأغرب من ده ازاي كانت بتتنفس، وده في الطبيعي يخلي موتها حاجه اكيده .

لكن ليود كان بيستخدم قطرة لإطعام الدجاجة، وكان بينضف القصبة الهوائية علشان تقدر تتنفس ، بس الدجاجه مقدرتش تعيش اكتر من 18 شهر ، فخلال الفترة اللي سافرو فيها لولاية أريزونا، سمعوا صوت الدجاجة وهي بتصيح بصوت عالي وغريب، فافتكروا أنهم نسيوا الأدوات اللي كانوا بينضفوا بيها القصبة الهوائية للدجاجة، فمقدرتش التنفس بشكل طبيعي، حاولوا طبعا ينقذوها بس ملحقوش وكل محاولاتهم لإنقاذ الدجاجة منفعتش ، وماتت عام 1947، بعد ما فضلت عايشة 18 شهراً بدون رأس.

وادي المصدر اهو

https://en.m.wikipedia.org/wiki/Mike_the_Headless_Chicken

كاتب المقال :-

Sayed Fouda

قصص حقيقية أخرى أعدها الأستاذ سيد فودة