Take a fresh look at your lifestyle.

الرقص حتي الموت

2٬107

قبل ماتقروا عايزكم تعرفوا ان القصة دي مش أسطورة خيالية ، دي حادثة حصلت بالفعل و متوثقة في السجلات التاريخية للقرن ال 16، ومكنتش الحادثة الوحيدة ، لان كان في حالات زيها في أوقات مختلفة حصلت في سويسرا وألمانيا وهولندا. .

ندخل في الموضوع بقي. .

دي لوحة لقصة غريبة جدا حصلت لسكان مدينة ستراسبورغ الفرنسية اللي كانت في الوقت ده جزء من الأمبراطورية الرومانية لما في يوليو سنة 1518 لما خرجت أمرأة فرنسية اسمها فراو تروفيا في الشارع وبدأت تلف وتدور وترقص وكل ده وهي ساكته خالص مبتطلعش اي صوت ومفيش اي موسيقي حتي بترقص عليها ، في الاول بعض الناس لما شافوا المشهد الغريب ده كانوا بيضحكوا وبعض الناس كانوا بيستهزءوا وبيتريقوا عليها ، لكن الغريب في الموضوع واللي رعب الناس هو أنها فضلت ترقص لمدة أسبوع كامل، كانت بتنهار كل ليلة ورجليها كلها دم بس كانت بتصحي في صباح اليوم اللي بعده علشان تكمل رقص تاني . . واللي حصل بعد اسبوع ان في كذا واحد انضموا ليها وبقوا يرقصوا هما كمان وبعدها بكام يوم العدد زاد وبقي كل يوم العدد بيزيد لحد ماوصلوا ل 30 شخص بيرقصوا مع فراو تروفيا ، زي ما يكونوا في عالم تاني . .

وفي أغسطس أعداد الناس اللي بترقص وصلت ل 400 شخص وكلهم ماتوا في الاخر بسبب الارهاق والنوبات القلبية والسكتات الدماغية. . بس مع استمرار الوباء العجيب ده في الانتشار بين الناس حاول نبلاء المدينة للأستعانه بالأطباء علشان يشوفوا حل للمرض ده، وحاول الأطباء فك اللغز ووصلوا لكذا تفسير ، الاول ان اللي بيحصل ده حاجة ليها علاقة بالكواكب والفلك ، والتفسير التاني هو ان الناس اتصابت بحمى بسبب ارتفاع حرارة الدم، وعلشان كدا بيرقصوا بشكل مستمر .

والاطباء قالوا ان علاج الحالة دي هو أن الحكومة تفتح ساحات مخصصة للرقص علشان الناس تتعالج من الحمي والحرارة المرتفعة اللي في دمهم ، وفعلا اتخصصت منصتين خشب علشان الناس ترقص فيهم وبقي في فرق موسيقية تابعه للحكومة تعزفلهم ليل ونهار والدنيا بقيت اخر ظأططة بدل الرقص السكوتي العجيب اللي كانوا بيرقصوه ده.

طبعا في نظريات كتير جدا ظهرت ومنها أن علشان مدينة ستراسبورج كان متفشي فيها الفقر والأمراض زي الطاعون والجدري فحصل المرض ده كشكل من أشكال الاضطراب النفسي الجماعي . . وفي نظرية تانية قالها المؤرخ جون والر وهي ان الموضوع له علاقة بالقديس الكاثوليكي سانت فيتوس، اللي كان الأوروبيين بيعتقدوا انه عنده القدرة على لعن الناس وان هو اللي اصابهم بمرض الرقص المستمر . .

وكان في نظرية بتقول أنّ كل الناس اللي دخلوا في نوبة رقص مستمر حتي الموت كانوا بينتموا لطائفة دينية شاذة وهي اللي طلبت منهم الرقص لحد ما يموتوا وكتب التاريخ بتقول ان الشهود علي الاحداث شافوا وسمعوا الراقصين وهما بيصرخوا بأسماء شياطين، كانوا بينفروا بشكل غريب من اللون الأحمر.

وقال عالم الاجتماع الأمريكي روبرت بارثولوميو إن كان في العصر ده مجموعة من الناس كانوا بيؤمنوا بأن الرقص هيجبلهم الحظ الإلهي.

وزي ماقولتلكم الموضوع ده محصلش في فرنسا بس ، ده حصل في بلاد اوربية كتير وكان حصل نفس اعراض الوباء في بلدة ماستريخت الهولندية، وخلي اكتر من 200 واحد من سكان البلدة للرقص فوق نهر موسيل وطبعا الجسر مستحملش الرقص والهز ووقع بيهم وغرقوا كلهم. . واصب الوباء مدينة إرفورت الألمانية سنة 1247 وناس كتير جدا ماتت . . واصاب كمان ألمانيا الغربية وشرق فرنسا سنة 1374 والناس فضلت ترقص لأسابيع وكانوا بيصرخوا وهما بيرقصوا وبيقولوا انهم شايفين حتجات غريبة وبيطلبوا من الرهبان انهم ينقذوهم . .

وفي النهاية هيفضل وباء الرقص لغز من ألغاز الدنيا اللي ملهاش تفسير وهيفضل الصندوق الاسود مليان أسرار

حتي الموت
الرقص حتي الموت

المصادر :

https://www.openculture.com/…/the-dancing-plague-of…
https://www.openculture.com/…/the-dancing-plague-of…
https://www.google.com/…/what-was-the-dancing-plague-of…

كاتب المقال :-

Sayed Fouda

قصص حقيقية أخرى أعدها الأستاذ سيد فودة

Comments are closed.