الجانب المظلم في حياة واحد من أشهر نجوم السينما ” تشارلي تشابلن “

لو كنت من الناس اللي بتحب الممثل والنجم العالمي تشارلي تشابلن هتزعل اوي من المقال ده ، فنصيحة يعني بلاش تقرأه ، لكن لو مقتنع ان في كتير من البشر عايشين بأذدواجية في الشخصية وبيظهروا بمظهر مختلف عن واقعهم فتعالي احكيلك .

هحكيلك عن الجانب المظلم في حياة واحد من أشهر نجوم السينما في عصر السينما الصامته . جاهز للصدمة؟يالا بينا . .

نبذة صغيرة عن تشارلي تشابلن

أسمه تشارلز سبنسر تشابلن ، و اشتهر بلقب “تشارلي تشابلن” ‏اتولد في 16 أبريل سنة 1889 في انجلترا ، كان ممثل كوميدي عظيم وكان مشهور في كل العالم ، ومش ممثل بس ، ده كان كمان مخرج وملحن وكاتب سيناريو ، اتشهر بشكل غريب في وقت الأفلام الصامتة وأصبح “تشابلن” أيقونة في جميع أنحاء العالم من خلال شخصيته الشهيرة الصعلوك ويعتبر من الشخصيات الابرز في تاريخ صناعة السينما، وامتدت حياته المهنية لأكثر من 75 سنة ، وكان هو أول ممثل يظهر على غلاف مجلة “تايم” الأمريكية، فى عددها الصادر فى يونيو سنة 1925.

الصدمة !!

بعد المقدمة دي احب اقولك ان تشارلي شابلن كان منحرف جنسيا وكان بيعشق اقامة علاقات مع البنات الصغيرة، وكان بيستغل انه نجم كبير ومشهور وكان بيتحرش بالممثلات في فترة عمل الاختبارات اللي كان بيعملها علشان يختار الممثلات لافلامه الجديدة ، وكانت سفالته بتوصل انه بيستغل حاجة البنات للشغل و المال وبيخليهم يمثلوا قدامه ادوار وهما بدون ملابس ، وطبعا كان بيطلب منهم حاجات تانية ولا داعي لذكرها لشده قذارتها ..

وكشفت وثيقه طلاقه من الممثله ليتا جراي Lita Grey، انه كان بيطلب منها ممارسات جنسيه مقززه ومهينه، وكان اضطر للزواج منها بعدما اغراها وهي عندها 15 سنة واقام معاها علاقة وحملت منه ، والده ليتا جراي هددت تشابلن انها هتبلغ الشرطه انه مارس الجنس مع فتاه قاصر ، لو موفقش يتجوزها بعد ما حملت منه (ايام ماكان عندهم اخلاق وشرف وقيم) ، لكن في وثائق بتقول ان تشابلن اجبرها بعد كدا علي الاجهاض، وليتا رفضت ، واستمر زواج شابلن وليتا 3 سنين، وهي الفتره اللي اعترف تشابلن انه خانها فيها مع كتير جداً من النجمات صغيرات السن، لينتج عن انفصالهم اكبر تسويه طلاق ، وكانت بقيمه 825 الف دولار ، ووثيقة الطلاق دي مكونة من 50 صفحة ، وتم العثور عليها في بنك مهجور في مدينه لوس أنجلوس، كان تم بيعها من تاجر التحف البريطاني جون كابيلو، اللي قال “حصلنا عليها من شخص في امريكا كان قد طلب منه ان يتخلص من ملفات قديمه في البنك”.

حفلاته الجنسية

وكان مشهور عن تشابلن انه دايماً بيعمل حفلات جنسية ماجنة هو و صديقه المقرب نجم الأفلام الكوميدية روسكو آرباكل Roscoe Arbuckle لكن سنة 1921 حصلت فضيحة كبيرة هزت المجتمع الأمريكي واشعلت الرأي العام ، لما صديقه روسكو آرباكل أغتصب إمرأة بشكل وحشي وماتت اثناء الإغتصاب ، ومن بعد الحادثة دي انتهت حفلات تشابلن الماجنة . .

فضايح كتير حصلت لتشابلن بسبب انحرافاته الجنسية ادت لتضرر مسيرته الفنية بشكل كبير وبسبب افعالة اللا أخلاقية وممارساته المنحرفة تم حظره من دخول أمريكا ..وحصل لتشابلن واحدة من اشهر فضايحه وقتها وكانت مع بنت من الوجوه الجديدة وقتها وهي الممثلة جون باري Joan Barry وكان عندها في الوقت ده 20 سنة بينما تشابلن كان 52 سنة وبالرغم من فرق السن الكبير بينهم لكنه عمل معها علاقة ولما عرفت انها حامل وقالتله كدا وانها هتفضحه ، خاف وقرر يتزوجها، لكنه بعد الزواج بقي بيعاملها معاملة قاسية وغير أدمية وكان بيوصل الامر انه بيتعامل معاها بسادية ، وبعد فترة قررت چون باري انها ترفع عليه قضية وكل الدنيا عرفت ، واضطر تشابلن انه ينقذ سمعته اللي تاثرت جداً ويدفعلها مبلغ ضخم وفعلا حصل الانفصال .

حظره من دخول أمريكا

وكان فيه محقق من ال FBI اسمه James P. McGraneryو هو اللي كان مسؤل عن التحقيقات في أمريكا عن فضائح تشابلن وموقفه السياسي المعادي للرأسمالية ، وفي سنة 1952 كان تشابلن في إنجلترا بيحضر حفلة لفيلم من افلامه فاستغل جيمس الفرصة واقنع السلطات الأمريكية بالوثائق بحظر دخوله تاني للولايات المتحدة وقالوا لو حابب تيجي تاني يبقي لازم تعمل مقابلة مع المسؤلين بخصوص مواقفك السياسية واعمالك اللا أخلاقية اللي بتتنافى مع قيم المجتمع . . فقال جملته المشهور “لا يوجد لدي أي حاجة في أمريكا بعد الآن. لن أعود لأمريكا ولو ظهر فيها يسوع المسيح”مش عارف ليه قال يسوع المسيح مع انه كان ملحد لا يؤمن باي دين ، لكن هو قال الجمله كدا بالنص ..

وفي النهاية عايز اقولكم ان عالم السينما والمشاهير مليان انحرافات واسرار لو اتحكت ناس كتير مش هتصدق من بشاعتها وانا شخصياً عارف مصايب سودا ميتخيلهاش عقل عن بعض النجوم المصريين وده بشكل شخصي لاني اشتغلت زمان في اماكن وكان ليا احتكاك مباشر بيهم .

كاتب المقال :-

Sayed Fouda

بعض المصادر :-

https://www.google.com/…/perverted-degenerate…/amp/
https://www.wsws.org/en/articles/2018/06/07/chap-j07.html

قصص حقيقية أخرى أعدها الأستاذ سيد فودة

جزيرة الأفاعي ، لا يُسمح لوجود البشر بها
كاثرين ملكة الدم (18+)
الكندي تيم ماكلين “قصة حقيقية مرعبة”
لغز من ألغاز السفر عبر الزمن
واحد كان بيحب الأكل لدرجة انه كان بياكل أي حاجة كانت بتيجي قدامه حتي لو كانت قطه او كلب او حتي طفل صغير
إستعمال الكلاب في حرب الأتحاد السوفيتي مع هتلر
جورجي دوجا ملك علي الجمر
قصة سيسل والماء الاسود في الفندق الملعون
لغز سفاح أوكرانيا
حديقة الموت
التحنيط بتدخين الجثث في غينيا الجديدة
كيفين كارتر صاحب جائزة بولتزر للصورة مصور صورة طفلة السودان
عبود وزوجته خجاوة جزارين البشر في العراق
مغامر أمريكي في كهوف ولاية يوتا بالولايات المتحدة الأمريكية
الأبوريجينيز سكان استراليا الاصليين
الميثلوجيا اليونانية ” سرير بروكرست – Procrustean bed “
اطول كائن حي علي الكوكب أكتشفه العلماء حديثاً
إنقراض سمكة المجداف الصينية القادرة على البقاء على قيد الحياة لمدة 200 مليون سنة
قصة شعار شركة من اكبر شركات الانتاج السينمائي في الولايات المتحدة و في العالم
تعرف مزيداً على كوكاكولا أقدم مشروب صودا
هيوستن Houston أكبر مدن ولاية تكساس