Take a fresh look at your lifestyle.

الأبوريجينيز سكان استراليا الاصليين

2٬857

تعرفوا الأبوريجينيز ؟

اللي مسمعش عنهم قبل كدا يجيب مج النسكافيه بتاعه ويجي يقرا قصتهم .. الأبوريجينيز هم سكان استراليا الاصليين وهم اكتر شعب مسالم في الدنيا كلها ، وكانوا عايشين في سلام وامان لحد سنة 1606 لما وصل لأرضهم البحارة الهولنديون ورست أول سفينة لهم على الشواطئ الشمالية لأستراليا .

وبعد كدا بقرن من الزمان قام البحار والمكتشف البريطاني جيمس كوك بثلاث رحلات في المحيط الهادي : –

  • الأولى كانت في الفترة ما بين سنة 1768 وسنة 1771 .
  • الثانية في الفترة ما بين سنة 1772 وسنة 1774 .
  • الثالثة في سنة 1776 .

إكتشاف أستراليا

جيمس كوك رسم خرائط كتير ووصل لحد أطراف آلاسكا في المحيط الشمالي المتجمد ، واكتشف جزر هاواي ونيوزيلندا والساحل الشرقي لأستراليا .

وكانت أول مستعمرة بريطانية تم انشأها في قارة استراليا كانت في مدينة سيدني ، وبريطانيا بعد كدا حولت استراليا لمنفى للمجرميين اللي في الإمبراطورية البريطانية العظمى ، وخلال 8 سنين كان وصل لأرض استراليا 40 ألف مجرم منفي علشان يستطونوها ، يعني الاستراليين الحاليين هما احفاد مجرمين بريطانيا اللي اتنفوا لاستراليا في اول استكشافها متخيلين ؟! ..

وبالشكل ده جيمس كوك بقي أول أوروبي يوصل الساحل الشرقي لأستراليا ، وأعلن ان بريطانيا استولت على الأراضي دي وسمّاها نيوساوث ويلز وبقت أستراليا مستعمرة بريطانية من سنه 1788 ، وبرغم استقلالها ، لكن لحد النهاردة استراليا مازالت تحت التاج البريطاني ..

شعب الأبوريجينيز

نيجي بقي لشعب الأبوريجينيز المسالم .. لما وصل الأوروبيين لشواطئ الأسترالية كانوا مستغربيين من شكل سكانها الأصليين (الأبوريجينيز) علشان كانوا بيمشوا عراة مبيستخدموش غير أوراق الأشجار وجلود الحيوانات ، واوقات كتير كانوا بيكتفوا بتغطية أجسامهم بالأصباغ والنقوش بس ، وكانوا بيستخدموا أدوات بدائية في معيشتهم ، وكانوا بيزرعوا الأرض وبيستخدموا النار علشان يطهروا ارضهم من الآفات علشان يقدروا يزرعوها وكانوا بعيد عن اي تقدم او حضاره لكن كانوا طيبين و ودودين ..

لكن لما السكان الاصليين شافوا الاوربيين خافوا منهم ، وأتقربوا إليهم وظنوا أن ملابسهم وأحذيتهم أجزاء من أجسامهم ، واعتقدوا أنهم أرواح أجدادهم وأسلافهم ..

قهر الأبوريجينيز

الأوربيين كانوا شايفين ان سكان استراليا الأصليين بشر متوحشين .. وده خلاهم يسيئوا معاملتهم واستعبدوهم في الأعمال الشاقة بالمناجم والحقول ،. وبعدين بدأوا يدرسوهم ويعرفوا ردود افعالهم ولما عرفوا انهم ناس مسالمين خدوا قرار ابادتهم ،. وكان لما الانجليز بيهجموا علي قراهم علشان يقتلوهم ويحرقوا اكواخهم كانوا السكان الاصليين بيسيبوا الارض .. ويروحوا ارض تانيه ويبنوا قري جديدة بس للاسف المستعمر الانجليزي كان بيهجم علي القري الجديدة ومكنوش بيرحموا لا ست ولا شيخ ولا حتي طفل وكانوا بيعذبوهم وبيقتلوهم ويدبحوهم في وحشية .

وحط المستعمر الابيض اجرائات قمعية صارمة قضت علي لغة السكان الاصليين اللي كانوا بيتعرضوا للجلد والتعذيب والموت لو اتكلموا بلغتهم الام ، زي ما كان بيعمل الفرنسيين في الجزائريين خلال احتلالهم لأرض الجزائر لما منعوهم بالسجن والقتل من استخدام اللغة العربية ..

وبالرغم من كل ده كان الأبوريجينيز مسالمين برضو واقصي امانيهم العيش في سلام وامان ، وتناقص عددهم ، وهرب كتير منهم إلي الغابات والأطراف البعيدة علشان يقدروا يعيشوا وفق عاداتهم وتقاليدهم ..

عدد السكان الأصليين في أستراليا

وفي فترة الاستعمار الأوروبي لأستراليا من سنة 1788 إلى سنة 1901 ، بلغ عدد السكان الأصليين في أستراليا بين نصف مليون و750 ألفًا ، لكن 50 ألف شخص منهم بس اللي بقوا على قيد الحياة ..

في احصائية سنة 2006 كان عدد السكان الاصليين 517 ألف نسمة وهما منتشريين في جميع الولايات الأسترالية ، ويشكل الأبوريجينيز حاليا نسبة 2.4% من مجموع سكان أستراليا ، ولسة محتفظين بثقافتهم وعاداتهم المميزة واكتر حاجة اشتهروا به الرسم الرمزي اللي بيروي قصة أجدادهم ومعتقداتهم عن كيفية بدء الكون .

في وثائق خرجت سنة 2009 أثبتت أن البريطانيين نشروا عن عمد مرض الجدري القاتل للسكان الأصليين في جميع البلاد اللي استعمرها الأوروبيين واللي حصدت أرواح معظمهم ..

مع ان المؤرخين والعلماء بيقولوا ان السكان الأوائل من شعب الأبوريجينيز (السكان الاصليين لاستراليا) عايشين في أستراليا من 60 ألف سنة وأن قارة استراليا كانت قبل ملايين السنين بتتصل باليابسة بقارة آسيا ، لكن بعد ما انتهي العصر الجليدي وذابت الثلوج حصل فيضان هائل وغمر سطح الأرض وغرق مساحات كبيرة من اليابسة ، واتكون المحيط الهندي اللي فصل الاستراليين عن الآسيويين ، وحصل للسكان الاصليين عزله عن غيرهم من الشعوب الأخرى ..

وبتطلق كمان كلمة السكان الأصليين في أستراليا علي سكان الجزر المحيطة وبالذات سكان جزر مضيق توريس ، ودي المنطقة اللي بين أستراليا وبابوا غينيا الجديدة ( اللي كنت كلمتكم عنهم وازاي بيحنطوا الجثث بتوعهم واللي عايز يقرا الموضوع بتاعهم .. من هنا ..

وكمان بيقال السكان الأصليين للإشارة إلى السكان اللي عايشين في البر الرئيسي من أستراليا وتسمانيا وبعض الجزر الأخرى المجاورة ، ولما علماء التاريخ وصلوا استراليا لدراسة تاريخ السكان الاصليين اجتمعوا كلهم على أن رسوماتهم اللي اكتشفوها في كهوف وتلال جنوب أستراليا تعتبر الأقدم في التاريخ حتى من الرسومات الموجودة في الكهوف الأوروبية ، ومفيش حضارة في العالم تشبهم لأنهم فضلوا معزولين وعلي مدي تاريخهم مندمجوش بالحضارة الإنسانية المعروفة الا من وقت قريب ..

القصة اللي جايا دي هتوريكم الظلم والقهر اللي واقع علي السكان الاصليين لاستراليا لحد النهاردة وصل لأي درجة :-

كان في شاب أسترالي من السكان الأصليين اسمه دانيال لوف عمل جريمة ودخل السجن وقضي العقوبة وخرج لكن السلطات قررت ترحلة من أستراليا ، فاضطر انه يرفع دعوى قضائية على سلطات بلاده امام المحكمة العليا في أستراليا ، لأنهم عايزين يرحلوه إلى بابوا غينيا الجديدة ، مؤكدا أنه من السكان الأصليين باعتراف شعب الموري ، اللي بينتمي إليه ..

وانه قضي عمره كله علي ارض استراليا بدليل انه عنده حاليا 39 سنة ومقيم اقامه كامله في أستراليا من وهو عنده 5 سنين وكان اتولد في بوبوا غينيا الجديدة بلد أمه ، لكن أبوه من سكان أستراليا الأصليين ، والغريب ان دانيال معندوش الجنسية الأسترالية بالرغم من انه صاحب الارض ، ومش بس كدا ده كمان التأشيرة اللي كانت معاه اتلغت بعد ما قضي عقوبة سجن ..

والسلطات وضعت دانيال في مركز احتجاز المهاجرين بعد ما التأشيرة اللي كانت معاه اتلغت بالرغم من انه أب ل5 أبناء أستراليين , فالمحاميين بتوع دانيال قالوا في المحكمة أن السلطات لا يمكنها ترحيله لأنه من السكان الأصليين ، ووالده معاه الجنسية الأسترالية ..

أخته فيوليت اللي معاها الجنسية الأسترالية قالت في مقابلة مع التلفزيون الأسترالي ان دانيال لازم يتمتع بحقوق غيره من المواطنين الأستراليين لان هوية اخوها الأولى هو شعب الموري من سكان أستراليا الأصليين قبل ما تكون له أصول في بابوا غينيا الجديدة ، وسألت فيوليت : “هل نحتاج ورقة تثبت حقنا في البقاء هنا ، واحنا اصحاب الارض من الاف السنين واصولنا متجذرة في البلد دي”..

اللي حصل في استراليا حصل زيه بالظبط في امريكا وفي اماكن تانيه كتير في العالم من قتل وتعذيب وتهجير للسكان الاصليين للاراضي دي ، وده يورينا ان سبب كل المصايب في العالم وراه الاوربيين وخاصتا انجلترا لكن قدروا مع الوقت وباستخدام الميديا والاعلام والافلام انهم يبانوا للعالم بمظهر علي عكس حقيقتهم تماما ..

قصة حقيقية إعداد وكتابة الرائع أ / سيد فودة

قصص حقيقية أخرى أعدها الأستاذ سيد فودة

جزيرة الأفاعي ، لا يُسمح لوجود البشر بها
كاثرين ملكة الدم (18+)
الكندي تيم ماكلين “قصة حقيقية مرعبة”
لغز من ألغاز السفر عبر الزمن
واحد كان بيحب الأكل لدرجة انه كان بياكل أي حاجة كانت بتيجي قدامه حتي لو كانت قطه او كلب او حتي طفل صغير
إستعمال الكلاب في حرب الأتحاد السوفيتي مع هتلر
جورجي دوجا ملك علي الجمر
لغز سفاح أوكرانيا
حديقة الموت
التحنيط بتدخين الجثث في غينيا الجديدة
كيفين كارتر صاحب جائزة بولتزر للصورة مصور صورة طفلة السودان
عبود وزوجته خجاوة جزارين البشر في العراق
مغامر أمريكي في كهوف ولاية يوتا بالولايات المتحدة الأمريكية
اطول كائن حي علي الكوكب أكتشفه العلماء حديثاً
إنقراض سمكة المجداف الصينية القادرة على البقاء على قيد الحياة لمدة 200 مليون سنة
قصة شعار شركة من اكبر شركات الانتاج السينمائي في الولايات المتحدة و في العالم
تعرف مزيداً على كوكاكولا أقدم مشروب صودا
هيوستن Houston أكبر مدن ولاية تكساس

Comments are closed.