إستعمال الكلاب في حرب الأتحاد السوفيتي مع هتلر

الدبابات الألمانية

في الحرب العالمية الثانية اللي بدأت سنة 1939 كان الاتحاد السوفيتي وقوات الحلفاء بيواجهوا جيش من اشرس الجيوش في وقتها وهو الجيش الألماني بقيادة هتلر . وكانت الدبابات الالمانية (بانزر-4) وهي من إنتاج شركة كروب وكان تم تطويرها في نهاية الثلاثينات من القرن العشرين كانت من ضمن العوائق قدام القوات السوفيتية وكانوا بيحاولوا يلاقوا حل علشان يمنعوا زحف القوات الألمانية بدباباتهم للأراضي السوفيتية .

• 

• 

• 

الكلاب تفجر الدبابات

وسنة 1941 لقوا فكرة يقدروا بيها يدمروا الدبابات وهي انهم يجوعوا الكلاب ويدربوهم يدوروا علي الأكل تحت الدبابات ، وفضلوا يكرروا الموضوع ده كتير لحد ما الكلاب ارتبط في عقلهم وجود الاكل تحت الدبابة ، فكان الروس في ميدان المعركة بيلبسوا الكلب بدلة فيها 15 كيلوا متفجرات اللي بيتم التحكم فيها عن بعد وأول ما تظهر الدبابات الألمانية قريب ، فيطلق الروس الكلاب الجعانه فتجري علي الدبابة علي امل انها هتلاقي اكل تحتها ، وأول ما الكلب ينزل تحت الدبابة يضغط الجندي على زرار الانفجار وتدمر الدبابة وينفجر معاها الكلب .

بس بعد فترة لقوا ان موضوع التحكم في القنبلة من بُعد مكلف جدا في وقتها و صعب التحكم فيه ، وبقوا يعملوا حاجة تانية .. بقوا يربطوا القنابل المتفجرة في الكلاب ويسبوها في أرض المعركة ، وكان الحزام المربوط بالكلب ، فيه دراع معدن صغير وأول ماينزل تحت الدبابة او المدرعة والدراع يتخبط في الدبابة ويتحرك فاتنفجر فورا .

والتقارير السوفيتية بتقول أن الكلاب دي قدرت تدمر 300 دبابة ألمانية ، وعملت خساير كبيرة للجيش النازي ، لحد ما صدر أوامر من القيادات في الجيش الالماني باطلاق النار على الكلاب اول ما الجنود يشوفوها ، ويحرقوها بقاذفات اللهب .

واستمر تدريب واستعمال الكلاب دي لحد سنة 1996.