أكتشاف البلاستيك

انتوا عارفين ان البلاستيك تم اكتشافة بالصدفة !؟

زمان اوي من الاف السنين كان الناس بتستخدم الصمغ الطبيعي ، عندك مثلاً الإغريق والرومانيون القداماء كانوا بيصنعوا حاجات كتير من الكهرمان الطبيعي ، وكمان الأوروبيون في العصور الوسطى استخدموا مادة الشيلاك، في كساء الأشياء.

طبعاً انت بتسأل نفسك دلوقتي ايه هو الشيلاك ده !؟
انا اقولك . .

الشيلاك دي عبارة عن مادة بتستخرج من إناث حشرة أسمها كيريا لاكا (حاجة زي الخنافس كدا) و الحشرة دي موجودة كتير جدا في الهند وتايلاند. وسبب انتاج الحشرة دي لمادة الشيلاك الصمغية هو انها بتتغذى أصلاً على صمغ الشجر، المهم ان الحشرة بعد كدا بتقوم بإفراز صمغ الشجر على شكل مادة صمغية، علشان تقدر تصنع منه أنفاق وتعيش فيها ، الغريب بقي هو ان عدد الحشرات اللازم لاستخلاص كيلوجرام واحد من الشيلاك بيتراوح بين 50 الف و 200 الف حشرة، وطبعاً ده رقم رهيب .

المهم ان من اكتر من 120 سنة حاول الكيميائي الأمريكي (ليو بايكلاند) انه يصنع مادة صمغية لكن بتركيب كيميائي، علشان تكون بديل لمادة الشيلاك الصمغية لان كان سعرها غالي جداً . .

وحاول بايكلاند انه يمزج مادة الفورمالديهايد والفينول، (والله عارفكم وعارف انكم كسلتوا تقروا اسم المواد) المهم انه عرض المواد دي لدرجة حرارة مرتفعة لكن محاولات ليو بايكلاند فشلت في إنتاج بديل للـ(شيلاك) والتجارب بقي ينتج عنها مواد تانية خالص ، لكن سنة 1907 اكتشف أن المركب الناتج عن تجاربة الفاشلة قابل للتعديل ومتين وغير موصل للتيار الكهربائي ومقاوم للحرارة، وبدأ يفكر ازاي ممكن يستخدم المادة دي ، ومع الوقت وجد أن المادة دي مثالية لصناعة حاجات كتير كالإلكترونيات والهواتف وأدوات المطبخ ومقابض القدور وأدوات القلي والمكاوي . . سجل باكلاند براءة اكتشاف المادة سنة 1909م وسماها في الاول باكليت على اسمه الشخصي ، ومع تطور المادة بقي اسمها مادة البلاستيك . .

وبكدا تم اكتشاف مادة البلاستيك بالصدفة وهما بيحاولوا يصنعوا مادة تانية خالص ، واصل كلمة بلاستيك جاي من الترجمة الحرفية للكلمة الإنجليزية (Plastic)، وهي اصلاً كلمة يونانية ومعناها الشيء القابل للتشكيل والصب.

كاتب المقال :-

Sayed Fouda